¹ Kawesemy tahe biuwetyy suu wana relemy rexihure, kia ibutumy aõnaõna tuu rỹimyhỹre relemy rexihulere ² Debò inatxi txuu tahe Deuxu ibutumy aõnaõna riwinyre, kia tahe rexielehynyre ibutumy taõmysỹdỹỹna ribi aõnaõna riwinyre ribi. ³ Tai tahe debò inatxi txu tarybewihikỹ tamy riwahinyre, kia tahe rihitxinyre txuu brebunamy ratyhydỹỹmy rỹimyhỹre wesemy, kia heka itxuu tii aõnaõna ibutumy riwinymy rahure, kia tahe iu rexielehynyre. ⁴ Kia heka kawesemy biuwetyy su wana riwinyre. Kia tiubo Deuxu biuwetyy su wana riwinyreu, ⁵ Kia asi, alòbròna wana riwinyyõhyyre, kiemy dori Deuxu biulòra-diteònyõhyyde, kia inyõ ijõdike aõkõre, su-ò ròbròkemy. ⁶ Ka su ribi tahe bee ròhònymyhỹ, kia su-di rytynymyhỹ. ⁷ Taita su node ribi Deuxu iny riwinyre. Tii teasỹ ribi tary-di ribunyre, kia tahe rielewesedỹỹnyre, kawese ribi tahe iny irumy rỹimyhỹremy relere. ⁸ Irahudi talie Deuxu òworu riòreõ ribrònyre, Éden subede iraruki, ibedeki tahe hãbu rihãwadỹỹnyre tii inymy riwinyrehewa. ⁹ Deuxu heka tai bederade òtaòta ibutumy riumydỹỹnyre, kia awimy raratynymyhỹre iny ritokremy. Kia òworu tyaki bederadeõ rỹimyhỹ, kia iny dee bedewihikỹ riwahinymyhỹre, kia bederadeõ taile rỹimyhỹ, kia iny dee aõnaõna binabina aõnaõna wiwi my iny rierynanymyhỹre wahe. ¹⁰ Kia Éden ribi bee ròhònymy raremyhỹ, òworu rituunymyhỹre, kia Éden ribi ròhònymy rexiwirareamyhỹre, kia inaubiòwamy bero my relemyhỹre. ¹¹ Komy heka Pisom bero rare, kia Havilá bede riyrawonymyhỹre, tai manarỹsỹhỹkỹ rahonymyhỹre bedeki. ¹² Kia manarỹsỹhỹkỹ ihãwa ludu heka manarỹsỹtyhyhykỹ rare, kia aderòna tule tai isirare, kia manarỹsỹ òtaòta tule. ¹³ Kia inatxina bero tahe Giom inire; kia ibutumy Cuche bede-di riyrawonymyhỹre. ¹⁴ Kia inataõna bero tahe Tigre inire, kia heka Assíri iraru bede txi ròhònymyhỹre. Kia inaubiòwana bero tahe Eufratesi inire. ¹⁵ Taita Deuxu, hãbu Éden oworu ki rihãwadỹỹnyre, kia idi tarukimy rarekremy, kia tai aõwi ribrònykremy. ¹⁶ Deuxu hãbu dee myỹ tarybetòedỹỹna riwahinyre: —Kai aõwaxina bederaty aõtxile oworu my rỹimyhỹre birỹsỹkre, ¹⁷ kia bederaderaty iny dee aõnaõnawiwi aõnaõnabinabina erydỹỹnana riwahinymyhỹre sohojile ta uritre irỹsỹõmykre. Uritre kia bederaty rỹsỹõmykre; kia birỹsỹkre txuu kai inatyhymy burukre. ¹⁸ Irahudi Deuxu rarybere: —Kia heka awi aõkõ rare hãbu ixi sohojimy ratxike. Tamy inyõ ariwinykre iwiòhedỹỹdumy, kia iwese yrybule urihimyòmy riòhòdỹỹnymy rarekremy. ¹⁹ Irahudi Deuxu su ribi aõnaõna riwinyre, ibutumy iròdu debure, kia ibutumy nawii, tii tahe hãbu-ò riwyre rininirenykremy. Kia tahe tii boho inidi my ratxirenyre, hãbu tamy inireny riwahinyre. ²⁰ Tii nawii nawii rininire, kia ibutumy iròdu iinyerymy rỹimyhỹre, iròdu iròdu debure rỹimyhỹre rininirenyre. Ka hãbu tahe iwiòhedỹỹdu ihoõhyyre, kia iwese urihimyòmy riòhòdỹỹnykemy. ²¹ Taita Deuxu hãbu ritỹhidỹỹnyre inihikỹmy. Kia tii rõrõmyhỹ wanawana, Deuxu iwitxiti ritare, kia riratybònyre iribi iwitxiti ritare ribi. ²² Kia iwitxiti ribi Deuxu hãwyy my riwinyre, kia tahe hãbu-ò ridyre. ²³ Taita hãbu rarybere: