¹ Adapun parihal Karajaan Saruga sama aya seko urakng tuan rumah nang bakaapm sidi kaluar ngagoik urakng untu ngarajaan kabon anggur e. ² Apas ia sapakat ba urakng-urakng koa upahe sadinar saari, ia nyuruh urakng-urakng koa ka kabon anggure.

³ Kira-kira jam sambilan aapm ia pun muok ia nee ada agik urakng-urakng lain nganggur ka pasar. ⁴ Jare ka dangan koa: “Ampuslah ugak ka kabon anggurku ba ahe nang pantas ana ku bareatn ka kao. Tarus ampuslah dangan koa.

⁵ Kira-kira jam dua balas ba jam tiga gumarek ia muok agik ba minjawat hal nang sama aya tai. ⁶ Kira-kira jam lima gumarek ia muok agik ba namuik urakng-urakng lain ugak, tarus jare ka kabatnne koa: “Ngahe kao nganggur maan ka dian saarianan?

⁷ Ja kabatnne koa ka ia: Barang ina ada urakng nang ngupah kami. Jakatae ka kabatnne: Ampuslah ugak ka kabon anggurku.

⁸ Sawaktu ari maam tuan koa bakata ka mandore: Sarui'klah nang karaja-karaja koa ba bayarlah upahe, mulai dari nang taama' dudi sampe nang masok paling doho'k.

⁹ Tarus ataknglah kabatnne nang mulai bakaraja kira-kira jam lima kabatnne koa narima masing-masing sadinar. ¹⁰ Lalu ataknglah kabatnne nang masok paling dohok, sangkae namua' manyak, tapi kabatnne pun masing-masing narima sadinar ugak. ¹¹ Sawaktu kabatnne narima' upah koa, kabatnne koa mareco ka tuan koa, ¹² jare: Kabatnne nang taama' dudi nyian kahe karaja sa jam, tapi kao nyamaan kabatnne ba kami nang saari-arianan bakaraja barat ba nagaratn angat mataari.

¹³ Tapi tuan koa nyahuti' seko dari antara kabatnne koa: “Kamaru', aku ina balaku ina adil ka kao. Buke' me dirik udah sapakat sadinar saari? ¹⁴ Taaplah bagiannyu ba darilah; aku maok mareatn ka urakng nang masok dudi nyian sama aya nu nyu. ¹⁵ Ina me aku bebas magunaan milikku sasuai kamaoan atiku? Gek dangki me ati nyu, barang aku murah ati?

¹⁶ Yakoa ugaklah urakng nang paling dudi ana jaji nang paling doho'k ba nang paling doho'k ana jaji nang paling dudi.”

¹⁷ Sawaktu Yesus maok ampus ka Yerusalem, Ia nyarui'k ka dua balas murit-Te tarus bakata ka kabatnne ka tangah maraga: ¹⁸ “Angkitn diri'k ampus ka Yerusalem ba Anak Manusia akan disarahatn ka imam-imam kapala ba ahli-ahli Taurat, ba kabatnne koa ana akan mare Ia ukuman mati. ¹⁹ Ba kabatnne ana akan nyarahatn Ia ka bangsa-bangsa nang ina' nganal Jubata, biar Ia di olo'-olo'an, dipalasah ba disalipatn, ba ari ka talu Ia ana akan dibangkitatn.”

²⁰ Lalu ataknglah uwek na anak-anak Zebedeus, tarus ia ba na' anak-anak Zebedeus koa ba sujut ka adapatn-Ne untu minta sasuatu ka Ia.

²¹ Ja Yesus: “Ahe nang kao maoan?” Sahute: “Bare'klah parentah, biar kadua anakku nyian muih duduk ana ka daapm Karajaan Nyu, nang seko' duduk ka sabalah kanan-Nyu ba mamg seko' agik duduk ka sabalah keba'knyu ²² Tapi Yesus nyahuti', ja kata-E: “Kao ina nauan, ahe nang kao minta. Bisa me kao nyocok cawan, nang harus Aku cocok?” ja kabatnne ka-Ia: “Kami bisa.”

²³ Yesus bakata ka kabatnne: “Cawan-Ku memang ana akan kao cocok, tapi parihal duduk ka sabalah kanan-Ku gek sabalah keba'k Ku, Aku ina ba hak mareatn koa. Koa ana akan dibareatn ka urakng-urakng bagi sae Apak-Ku udah nyiapatn iya.”

²⁴ Nangar koa beralah ka sapuluh murit nang lain ka badua adik baradik koa. ²⁵ Tapi Yesus nyarui'k kabatnne tarus bakata: “Kao nauan, kade pamarentah-pamarentah bangsa-bangsa marentahi' rakyatte ba kokot basi ba panguasa-panguasa majaanan kuasae karas sidi ka atas kabatnne. ²⁶ Ina' me yakoa ugak ka antara kao. Barangsae nang mao' jaji ayak ka antara kao, haruslah ia jaji palayannyu, ²⁷ ba barangsae mao' jaji panguasa ka antara kao, haruslah ia jaji ambanyu; ²⁸ sama aya Anak Manusia atakng buke untu dilayani', tapi untu malayani' ba untu mareatn nyawa-E jaji tabusatn bagi urakng manyak.

²⁹ Yesus ba murit-murit-Te kaluar dari Yeriko, urakng manyak rami-rami nunaan Ia. ³⁰ Ada dua urakng buta nang duduk ka pinggir maraga nangar, kade Yesus lewat, lalu kabatnne koa ngampak: “Jubata, Anak Daud, kasihatni'klah kami!” ³¹ Tapi urakng manyak koa nagur kabatnne biar kabatnne koa diam. Tapi kabatnne koa makin kuat ngampak, jare: “Jubata, Anak Daud kasihatniklah kami!” ³² Tarus Yesus baranti ba nyarui'k ia badua. Ia bakata; “ahe nang kao maoan biar aku pabuat baginyu?”

³³ Sahut kabatnne: “Jubata, biar mata kami bisa nee'” ³⁴ Tarus tagaraklah ati Yesus di belas kasihatn, lalu Ia nyangkam mata kabatnne ba sakoa ugak kabatnne nee lalu nunaan Ia.