¹ Muntangu Yesu kakulumuka ku mongu, kibuka kimbidi kilanda. ² Ye tala, muntu wukala kimbefu ki buazi bukafinama wu fukama ga ntual'ani, ye wuta: Mfumu, go zoledi, lendi kunkumisa wu gedila. ³ Yesu wu lambula koku, wu nsimbidi, ye wu goga: nzoledi, kala wu gedila. muna ntangu yina kaka wu gedila mu buazi buani. ⁴ Kunima Yesu wu goga: wu kikeba mu kugogila ku muntu; kansi nda kisonga ku ngudi zi nganga, ye gana nkayilu di sonika Mose, mukusande mana ma bakadila bonsu kimbangi. ⁵ Muntangu Yesu kakota ku Kapenawumi, mbuta kibuka kibinuani nkama wu n'gogisa, wu ndodikila, ⁶ Ye wu ntela: Mfumu, kisadi kimunu wuna wuleka muna nzo, wuna ye kimbefu ki nitu yi zelangana ye wuna ye mpasi zi ngolu. ⁷ Yesu wu ntela: si ngienda, ye sa yi mbelusa. ⁸ Mfumu binuani bikibuka nkama wu vutula: Mfumu, kina wu fuana ko mukusa nde wu kota ku nzo munu; kansi goga kaka n'gogo mosi, ye nsadi munu sa ka beluka. ⁹ Kadi, munu yi tumamanga ku ba mbuta, ngina ye binuani yi tumanga; ye ngi ta ta ku yunkaka: nda wenda! ye wedi; ku wu nkaka: nza! ye wisidi; ye ku kisadi kimunu: gangila dina! ye ta bogangila. ¹⁰ Kunima ku n'wa, Yesu wu toma yituka, ye wu tela ku bakulu bakedi ku nlandanga: yi talutela bo, kani ku Isayeli kisamona ku lukuikilu luneni lumpila yo. ¹¹ Yidina, yi talutela bambidi si batuka ku kutukilanga ntangu, ye ku kudimukinanga ntangu, ye si bakala ku mesa ye Abalayama, Isaki ye Yakobi, muna kimfumu ki mazulu. ¹² Kansi bana ba kintinu si babageta ku tombi di ku nzila, kuna si kukala bidilu ye nkuetisu yi menu. ¹³ Buna Yesu wu ta ku mfumu binuani bikibuka nkama: nda wenda, bugangimina bonso buna lukuikilu luaku. ye muna ntangu ya yina kaka nsadi wu beluka. ¹⁴ Yesu wu yenda kunima kuna nzo Petelo, kuna wu mona nzitu wu nkentu wu leka ye wu kala kimbefu. ¹⁵ Wu simba koku kuani, ye kimbefu kikatuka; kunima wu telema, ye wu nsadila. ¹⁶ Mu nkokila, banata ku mbela Yesu kibuka kibantu bena ye mpefi zimbi. wu kula mpefi zimbi mu n'gogu wani, ye wu belusa bambefu bakulu, ¹⁷ Mukusa nde malungana mana kasamuna Isayi, mbikudi: wu baka ku konda ku ngolu kuetu, ye wu nata bimbefu bietu. ¹⁸ Yesu, bukamona kibuka ki ngolu ga mbel'ani, wu gana lutumu nde baluta ku simu di nkaka. ¹⁹ Nsoniki wu mosi wu finama, ye wu ntela: Mfumu, si kulandanga kuakulu ku si wenda. ²⁰ Yesu wu mvutudila: zi mfuengi zi vuidi nua miawu bakotanga, ye zi nuni zi zulu zi vuidi mazala; mansi muana muntu kavuidi kifulu ki kafueti tula ntu ku. ²¹ Wu wunkaka, ga kati ki minlongoki, wu nteledi: Mfumu, ungana nsua ngienda nteti yi zika se diamu. ²² Kansi Yesu wu mvutudila: wu ndanda, ye yambula bafua bakizika bawu kibeni. ²³ Wu mata muna n'lungu, ye banlongoki bani ba n'landa. ²⁴ Ye tala, kitambu kineni kitelama muna masa ye nlungu wakulu wu zingama ye masa. ye yani, wu kala wu leka. ²⁵ Minlongoki bafinama ye bamvumbula, ye ba goga: Mfumu, wu tugulusa, tufuidi! ²⁶ Wu batela: mudiambu dinki lunina ye bunkuta, bantu ba lukuikilu lunduelu? buna wu telama, wu nuanisa kitembu ye mbu, ye kudingalala kukala ku ngolu. ²⁷ Bantu bobo bakala ye kuyituka bumbidi: nani yoyo, ugoganga, kuntuala mupepi ye mbu bitatumama? ²⁸ Muntangu kakuma ku simu dinkaka, muna nsi Ngadalieni, bantu bodi ba mpefi zimbi, batuka kuna maziami, bayisa kuntual'ani. bakala ye ngansi zi ngolu kani muntu kalutidingi kuna ku. ²⁹ Ye tala, bakata: nki kina ga kati kibetu ye ngeyi, Muana Nzambi? keti wisidi gogo mudiambu di kutu kuamisa ku ntuala ntangu? ³⁰ Gakala mu kitamina ye bawu kibuka kineni ki ngulu kikala mukudia. ³¹ Mpefi zimbi zi dodokila Yesu, ba goga: go wu tukudidi, wu tufila muna kibuka kiba ngulu. ³² Wu batela: nda luenda! batuka ye bakota ku bangulu. ye tala, kibuka kiakulu ki ngulu ki ye kigeta muna masa ye bafua bakulu muna masa. ³³ Ba baye kubadikingi balemuka, ye bayenda bakulu kuna mbanza mu kuzayisa makulu ma masalama. ye mamakuma ku mpefi zimbi. ³⁴ Buna bantu ba mbanza yakulu batuka mu kukutana ye Yesu; ye, muntangu yi bamona bakulu, ba ndodokila kimana kakatuka mu kizunga kibawu.