¹ Lukikenga mu kusadila lunungu luenu ga ntadisi bantu, mu monoka; bunkaka, ka silubaka nsendu ko, ku tata benu wuna mu mazulu. ² Buna nkutu bu wuta gana nkayilu, kubudi mpungi ku ga ntual'aku, bonsu bu gangilanga bankua disu ku nsi lukaya mu zi nzo zi bisambu ye mu zi nzila, mu sa nde bantu baba sika. Yiluteledi biawu mukedika, bakibakidi nsendu bawu. ³ Kansi go ta gana nkayilu, bika koku kuaku ku lumonsu ka kuzayi ko mo mata ganga ku kiyakala, ⁴ Mu sa nde nkayilu waku wu ganuka mu nsueki; ye Tat' aku, yu wu monanga mu nsueki, si ka ku vutudila wawu. ⁵ Bu si lusambila, kalukadi ko bonso ba mesu ku nsi lukaya, ba zolanga sambila batelama mu zi nzo zi bisambu ye mu mpambu zi nzila, mu sa nde ba monika ku bantu. yi luteledi buawu mu kedika, ba bakanga nsendu' awu. ⁶ Kansi ntangu ta sambila, kota kusuku diaku, kanga kielu kiaku, ye sambila Tat'aku wuna gana ga kifulu ki nsueki; ye Tat'aku, wu monanga mu kinsueki, si kakuvutudila. ⁷ Buta sambila, ku bulumuna ku ngogu mi nkatu, bonso ba mpakano, ba kiyindulanga nde mu ngogu mina si kabawila ⁸ Ku kifuanikisi ku bawu ku; kadi tata benu zeyi nki luna biawu mfunu, nteti ka n'lunlombedieti ku. ⁹ Tala bonso buna lufueti sambila; tat'eto wuna mu mazulu! nkumbu'aku yi zitusua; ¹⁰ kimfumu kiaku kisa; luzolu luaku lugangama ga ntotu bonso kuzulu. ¹¹ Wu tugana wunu dimpa dietu di lumbu ka lumbu; ¹² Wu tuyambudila mambi meto, bonso betu bu tuyambudilanga mintatu mieto; ¹³ Kutu nati mu mpukumunu ku, kansi wu tutanina ku bankua ma mbi. Kadi ku ngeyi kuvuisukidi, mu ntangu zakulu, kimfumu, ngolu ye nkembu. Ameni! ¹⁴ Go si lulemfukila ku bantu mambi mawu, tata benu wuna ku mazulu si ka lulemfukila diaka; ¹⁵ Kansi go ka lulemfukila bantu ku, Tata benu kalendi kululemfukila mambi menu ku. ¹⁶ Bu luminanga nsoki, kalukadi mu kiadi ku, bonso bantu badisu ku nsi lukaya, tuse tuayu tukitukanga na yembele, mu kusonga ku bantu nde beta mina nsoki. yi luteledi mu kedika, bakitambuluedi nsendu'awu. ¹⁷ Kansi go tamina nsoki, kusa mazi ku ntu'aku ye sukula luse luaku, ¹⁸ Mpasi mu konda songa ku bantu nde ndeyi tamina nsoki, kansi ku Tat'aku yuna gana ga kifulu kinsueki; ye Tat'aku, yu monanga mu kinsueki, si kakuvutudila buawu. ¹⁹ Ka lukikutikila ko kimvuama ki ga ntotu, mbumbu ye mbumbuluka bibebisanga, ye gana befi ba tobulanga ye yibanga; ²⁰ Kansi lukutika kimvuama kienu mu mazulu, kuna mbumbu ye mbumbuluka ka bifuasanga nkutu ku, ye kuna befi kabalendi tobula kani kuyiba ku. ²¹ Kadi kukuna kimvuama kingeyi, yikuna diaka kuna ntim'aku. ²² Disu dina muinda nitu. go disu dingeyi dina mavimpi, nitu'aku yakulu yina mu kia; ²³ Kansi go disu diaku kadina mu mavimpi ku, nitu'aku yakulu si yikala mu tombi. go buna kia kina mu ngeyi yi tombi, bueyi sa bukadila buneni bu tombi kiokio! ²⁴ Ga nkatu yu fueti sadila mfumu zodi. kadi, evo sa kamenga yu mosi, ye sa kazola wunkaka, evo sa kabundana ye wumosi, ye menga wu nkaka. ka lulendi sadila Nzambi ye Mamon ku. ²⁵ Yidina yiluteledi: kalukadi mayindu ku mu luzingu luenu mu bi sa ludia, kani mu diambu di nitu zenu, nki sa luvuata. moyu ka wulutidi ku madia, ye lutila mvuatu? ²⁶ Lutala nuni zi zulu: ka ba kunanga ko kani yonzika, ye ka ba kutikanga nkutu ku mu bilundulu; ye Tata mazulu wu ba dikilanga. ka lubalutidi ku mu mfunu? ²⁷ Nani mu banu, mu mayindu menu, lendedi yika mfoko mosi koku kuani mu luzingu luani? ²⁸ Ye mudiambu dinki luna mayindu mudiambu di mvuantu? lufuanikisa bonsu lilia muna maya; ka salanga ko evo tunga; ²⁹ Mudina yiluteledi nde Solomo nkutu, mu nkembu'ani wakulu, kavuata ko bonsu mosi mu biawu. ³⁰ Go Nzambi ta vika buna titi di masodi, di dita zinga wunu, ye mbasi si di getuka, keti si ka lu vika ko go ta ganga n'kutu mau ku bantu ba minu ki nduelu? ³¹ buna Ka lu ketalala ku, ye ka lu gogi ku nde: nki si tu dia? nki si tu nua? nki si tu vuata? ³² Kadi bio bima biakulu, ba mimpani ba sosanga biau. Tatenu gu zulu zeyi nde luna ye biau m'funu. ³³ Lu sosa nteti luyalu ye lunungu lu Nzambi; ye bio bima biakulu si bilu ganukila gana zulu. ³⁴ Ka lu ketalala ko buna mudiambudi kilumbu ki mbasi; kadi mbasi yani mosi si ka yidika kiau. Konso kilumbu kina ye mpasi zani.