¹ Buna Yesu, gu goga ku n'kangu ye ku ba n'longoki, samueni: ² Ban'soniki ye ba Falisayi ba fonga muna n'suni gu Mose. ³ Lusala buna ye lutala makulu ma si kalutela; kansi ka luyangi il bonso buna bisalu biagu. kadi ba goganga, ye ka basala ko. ⁴ Ba kanganga bizitu bizitanga, ye batulanga bio gana magembu ba bantu, kansi ka bazola ko ba basonga n'lemvu. ⁵ Basalanga mambu magu makulu mu ku kimonikisa ku bantu. mudiambu ba vuatanga binkutu binda, ye bena bitaba binda bi tomisanga m'vuatu miagu; ⁶ Bazolanga kifulu kinteti muna n'kinsi, ye biti binteti muna nzo zi Nzambi, ⁷ Bazolanga ba bagana mboti mu bifulu bi bantu ba mbidi, ye ba babikidila ku bantu Mfumu, Mfumu. ⁸ Kansi benu ka lukibokidisa m'fumu ko; kadi yu mosi kaka guna Mfumu'enu, ye luna benu kulu ba mpangi. ⁹ Ye ka lubokila muntu ko ga ntotu tat'enu; kadi gu mosi guna tat'enu, yuna guna muna mazulu. ¹⁰ Ka lukibokidila ba n'tuadisi ko; kadi gu mosi guna n'tuadisi'enu, Klisto. ¹¹ Gu neni gana kati kibenu si ka kala n'sadi'enu. ¹² Konso muntu si gu kizangula, kakulumu ka, ye konso muntu si gu kikulumuna si ka zanguka. ¹³ Kiadi kubenu, ban'soniki ye ba m'falisi luna ye tuse todi! mudiambu lutakanga ku bantu kimfumu ki mazulu; si ka lukota kio ko benu bamosi, ye kaluta yambula kio ko bakota bantu ban'kaka ba zoledi ba kota. ¹⁴ Kiadi ku benu ban'soniki ba m'fuadisi disu ku nsi lukaya; mudiambu lugondanga nzo zi ba n'kuidi, ye luzolanga lu kimonikisa mu bisambu binda bi luvunu; mu kikuma kina si lukala mu mfundusu yi ngolu. ¹⁵ Kiadi ku benu, ban'soniki ye ba m'fadisi disu ku nsi lukaya! mudiambu lu talemuka m'bu ye n'totu mu kusa nde yo kena yada ko kansi ka kuikila mambu ma ba Yudewo: ye muntangu kakumini, lu kikumisi muana mosi gu bilungi nkumbu zodi kulutila benu. ¹⁶ Kiadi kubenu, bantuadisi bifue mesu! luzayisanga: go muntu didi ndefi mu tempelo, ka kima ko, kansi muntu didi ndefi mu wolo di tempelo, kotedi. ¹⁷ Bantu ba kondedi ngangu ye bifue mesu! nki kilutidi mu kuganga, wolo ga nzo Nzambi yi gananga n'kayilu gu wolo? ¹⁸ Go muntu, luzayiza bo diaka, didi ndefi mu kin'longu, kagena diambu ko; kansi, go muntu didi ndefi muna n'kayilu guna gana kin'longu, yani guna gu kota. ¹⁹ Bampofi! nkiki lutidi ku gonga, n'kayilu go kin'longu kiyokanga n'kayilu? ²⁰ Yani yu gu dianga ndefi mu kin'longu gu dianga ndefi muna kin'longu ye muna bima biakulu bina gana ntandu. ²¹ Ye yani gu dianga ndefi mu kin'longu gu dianga ndefi mu kin'longu ye muyani yu gu zingila mo, ²² Ye yani yu gu dianga ndefi muzulu, gu dianga ndefi gana kiti ki kimfumu ye kuyani yu guna gu fonda. ²³ Kiadi kubenu, ban'soniki ye ba m'fadisi mesu ku nsi lukaya! mudiambu lufutanga kibuku ki kumi ki mente, aneti ye dikime, ye nde lutasisa mamena m'funu ngolu muna n'siku, lunungu, nkenda ye ku kuikama: yi mana ma lufueti ganga, konda kugeta mambu man'kaka. ²⁴ Bantuadisi ba zi mpofi! ba kulanga biningi ningi ye lu minanga mbisi yi kavalu. ²⁵ Kiadi kubenu; ban'soniki ye bam'fadisi mesu ku nsi lukaya mudiambu lu sukulanga nima ye kopu ye longa, ye nde muna kati mu teba ye mvindu ye batebedi ye nsatu zimbi. ²⁶ M'fadisi, kifue mesu! sukula nteti kati ki kopu ye di longa, mukusa nde ku nzila diaka kukuma ku mboti. ²⁷ Kiadi kubenu, ban'soniki ye bam'fadisi mesu ku nsi lukaya, mudiambu lutafuanana ye maziami mpi mata monika mamboti ku nzila, ye muna kati mateba ye biyisi bi mvumbi ye mpila zakulu zi mambu mambi. ²⁸ Benu mpi diaka, kunzila, luta monika ba mboti ku bantu, kansi kuna kati luna luteba ye luvunu ye masumu. ²⁹ Kiadi kubenu; ban'soniki ye bam'fadisi mesu ku nsi lukaya! mudimbu lu tatunga maziami ma ba mbikudi ye lu tatomisa ntoni zi ban'kua lunungu, ³⁰ Ye buna luzayisanga: go tuzinga muntangu yi batata betu, nga katukala kimvuka ko ye bagu mu kutiamuna menga ma ba mbikudi. ³¹ Lu takitela kimbangi benu bamosi nde luna bana bo bagonda ba mbikudi. ³² Lutebisa kitesu ki ba tata benu. ³³ Zinioka, bana ba kigansi! bue si lutinina mu mpasi zi bilungi? ³⁴ Mudina, tala yi lufidisi ba mbikudi, ban'kua nduenga ye ba n'soniki si lugonda ye si lukoma ban'kaka, si luzuba mi nti ban'kaka muna nzo zi Nzambi zenu, ye si lu baniokuna mbanza muna mbanza. ³⁵ Mu kusa nde mabua muna benu menga makulu ma bantu ba kondedi kikuma ma muangana gana ntotu, tuka menga ma Abeli gu n'kua masonga nate ye kuna menga ma Zakayi muana gu Balasi, yu lugonda kati ki tempelo yi ki n'longu. ³⁶ Yi talutela bo mukedika, mana makulu si mabua gana kati kikubu diodio. ³⁷ Yelusalemi, Yelusalemi, gu gondanga ba mbikudi ye gu gondanga mu matadi bana baba kufilanga, n'kumbu kua yi zola yi kutakasa bana baku, bonso nsusu yi vundanga bana bani kuna nsi mage mani, ye kaluzola bo ko! ³⁸ Tala, nzo benu si yisala yi mpamba. ³⁹ Kadi, yi talutela bo, si ka lu mbona diaka ko tuka bungangi, nate yi kuna si n'lutela: ka sambuka yuna yu gu kuisa mu zina di Mfumu.