¹ Yesu, ingilagha mu bwato, nu asokagha kitatenge mu kwenda ku musumba waghe. ² Nu lola, bamwekelagha wabensekile bighansa ayamile ku mughu. Yesu, alolagha lukatisho lwabo, ing'atenda na wabensekile bighansa: Wabagha na maghala, mwana wani, bwaghi bobe bwashighililwa.

³ Kuubo, bamoi ku Batili ba milembe batendagha mu mitima sabo: Whono muntu enegha Ghongo. ⁴ Nu Yesu, mu kumana milenganya sabo, atendagha: Buni bumwite milenganya mbi mu mitima sinu? ⁵ Kubuno, ki kisogha mu kutenda: Bwaghi bobe bwashililila ali kutenda: Imaluka, nu tabanga? ⁶ Nu buno, mumane buno Mwana wa muntu ghano ghansi ite bwangato bwa kushighilila bwaghi: Abulagha wabensekile bighansa: Imaluka, tola mughu wobe, nu nda kobe ku numba. ⁷ Nu imalukagha nu kwenda kwaghe ku numba. ⁸ Kikembe mu kulola ku'ubo, chakatwagha na boba, nu kughanula Ghongo weleshishe bantu bubo bwangato.

⁹ Mwa mukutuka agho nu kwenda bulai, Yesu alolagha mulume umoi ikalile gha kishiki cha kulighya, u kumanwa Matayo. Amubulagha: Njange. Whoso mutu imalukagha nu kumuyanga. ¹⁰ Ghabinde Yesu abakama kulya mu numba, lola, batakatisha bengi nu bantu ba myanya mbi, bashwagha kulya ghamoi nawe nu ghamoi na begheshibwa baghe.

¹¹ Bafalisayo mu kumona kubo, babulagha begheshibwa baghe: Buni bukulya Mukota winu ghamoi na batakatisha, nu bantu ba myanya mbi?

¹² Ghongwagha Yesu ku bubo, inga'tenda: Babeli bankambwe, ntabite nkasa sa musakishi, tondo basambi. ¹³ Mwende, mumane kino kitondo: Naboghela lukogho, nu ta bisansa. Kubuno, nshashwile kumana basanana, tondo bisa bwaghi.

¹⁴ Agho, begheshibwa ba Yoani bashwagha kweli Yesu, nu kumubula: Kubuni beshwe nu Bafalisayo tukw'inania indya mu masegho, nu begheshibwa bobe tab'inanie indya mu masegho?

¹⁵ Yesu abakulagha: Binda bi'nen'isonga banaba na bongwa nu nen'isonga echeli nabo? Bindi bikashwa mpina nen'isonga akakukumwa, nu agho bakinania indya.

¹⁶ Takuli unalanda kibe cha ngwaya kisogha ku kitetutetu; Kubuno kineka kibe kinene kweso nshulu, nu kiboto nti cha tanuka. ¹⁷ Tabekwindagha maku masogha munda na malegha m'indisha; ndi tobo, malegha nti matika nu maku nti makubhuka; nu malegha nti mashimila; Tondo bakubikagha maku masogha munda na malegha masogha, nu maku nu malegha nti m'indanga busogha.

¹⁸ Mukubatenda ibyo bitondo, lola, mukulu umoi ikagha nu kukoma mashwe maghe ghabusho bwaghe, nu kumubula: Kikumi chani chalekana kano kaluma; Tondo, shwa umubikile maboko, nu alame. ¹⁹ Yesu imalukagha nu kumuyanga ghamoi na begheshibwa baghe. ²⁰ Nu lola, mukashi umoi wabagha akusulula mikilha myaka ikumi n'imbili, ashwagha kumbusa kwaghe, nu kukata gha kunilwagha nshulu saghe.

²¹ Kubuno itendiagha mu mutima waghe: ndi nakosha kukata ku nshulu saghe, nti nalama.

²² Yesu akebatukagha nu ingatenda mukumwengelesha: Wabagha na maghala mukinga wani, lukatisho lobe lwakulamya. Nu mukashi whoso alamagha mweso nkungu.

²³ Yesu mu kwika mu numba sa mwami, nu alolagha bakini ba tupyelele nu kikembe kinene. ²⁴ Ing'ababula: Mushighelele; kubuno kikumi ta cha kwile, tondo chayamile. Nu bamusekagha. ²⁵ Ghabinde kikembe cha kukuka kumbugha, ingilagha nu kukata kuboko cha kikumi, nu kikumi kimalukagha. ²⁶ musaghu wasandabanagha ku myelo s'oko.

²⁷ Mukutuka agho, Yesu ayangwagha na byuku bibili, bya bagha bikulekela mulenge: Tukwile lukogho, Mwana wa Daudi! ²⁸ Mukuba abasa ku numba, byuku byashighelelagha kweli, nu Yesu ababulagha: Mwakatisha buno inakita ibyo? Naki, Mukota, bamwakulagha.

²⁹ Agho, a bakatagha ku miso, kubabula kutenda: Mukitilwe kuyangana na lukatisho lwinu. ³⁰ Nu miso mabo mashibukagha. Yesu abananiagha bubibu, kilo muntu wampa umanagha. ³¹ Tondo, mu kutuka agho, basandabanyagha nkulu saghe mu kisi kinsai.

³² Gha babagha bakwiyendela, lola, bekelagha Yesu kalumbu kite musumbu. ³³ Musumbu gha tibitwagha, kalumbu katendagha. Nu kikembe chaghanaghanagha kutenda: Kitondo anga kino takimonekagha ko mu Isilaeli.

³⁴ Tondo Bafalisayo batendagha: Kutingila mukulu wa basumbu u mwakutibita basumbu.

³⁵ Yesu atimbile mu minsumba nu myelo insai, mu kweghesha munda na ma Sinakoki, mu kusansa musaghu musogha wa bukota, nu mu kulamya nsambo nu busokoluma bunsai. ³⁶ Mu kulola kikembe, abakwilagha chombo, kubuno chabagha chakutwa nu kusandabana, anga mbuli sitite mulangi. ³⁷ Agho, abulagha begheshibwa baghe: Buusi buli bwingi, tondo bakiti ba nkashi u bakeke. ³⁸ Museghe kashi kweli nene buusi, asinge bakiti mwa mu buusi bwaghe.