¹ Nu mu kumana begheshibwabaghe ikumi nu babili, abeleshagha bwangato bwa kutibita basumbu, nu konia nsambo nu bughongole bunsai. ² Ongwa mashina ma ntumwa ikumi na babili. Mutangi, Simoni wamamwagha Petelo, nu Andele muto waghe; Yakobo, musikila wa Sebedayo, nu Yoani, muto waghe; ³ Filipo, nu Matoloma; Toma, nu Matayo, muntu wa kulighya palata, Yakobo musikila wa Lufayo, nu Tadeo; ⁴ Simoni wa Kanana, nu Yuda wa Kaliota ukasigha Yesu.

⁵ U mughanso w' ikumi na babili basingilwe na Yesu, gha shilagha kubelesha mibiko seno: Mwendaghe ku batakatisha ba bilongo, mwingilaghe ku misumba sa Basamalia; ⁶ tondo mwende ku mbuli sashiminde sa numba sa Isilaeli. ⁷ Mwende, musanse misaghu, nu mutende: Bukota bw'ighulu bwalembekela. ⁸ Mulamye basambi, mubuche bakwile, mwengye babembi, mutibite basumbu. Mweleshibwe tughu, mwesane bya tughu. ⁹ Mwekaghe nolo, bikulo ali falanga mu bibunda binu; ¹⁰ ali nsagho sa lughendo, ali nshulu imbili, ali mikalabanda; kubuno mukiti wa mulimo emana kughebwa indya lyaghe. ¹¹ Mu musumba ali mwelo u mwingila mo, mulonde muntu u nabasekela; nu mwikale mo kwikila busi bwa kwenda. ¹² Mukwingila mu numba, mwa mukashagha samba, ¹³ nu ndi numba sa tunganana, boolo bumwite bwikale mo; tondo ndi tamwatunganana, boolo bwinu bubakulukile. ¹⁴ Ndi tababasekela nu kubongwilila bitondo binu, mutuke mweso numba ali mw'oso musumba nu nti mwatitula mukungu wa mashinshi minu. ¹⁵ Nababula bulili: busi bwa kwaghibwa, whoso musumba, ukaaghibwa kutinga kisi cha Sodoma nu Gomola.

¹⁶ Lola, nabasinga anga mbuli mu nkatighi na mpagha. Mwategheleshagha anga bulighi, nu kubota anga bilinga, ¹⁷ Mwabagha miso na bantu; kubuno bakabalekela ku lusu lwa bashushi, nu kubapunda na bususu mu ma Sinakoki mabo; ¹⁸ ba kababulutila kuli bakulu ba misumba kubushi bwani, nu ku bami, buno bateneneke ku beli nu ku batakatisha. ¹⁹ Tondo, gha bakabesana, tamwimbushe kiki kimwatende ali ki mwababule, bimukatenda mukeleshibwa byo mweso nkungu; ²⁰ kubuno, ta benywe u mukatenda, nti Muusa wa So winu u ukatenda munda mwinu. ²¹ Mubuto akesana mubuto waghe ku lukwo, nu mubuti mwana waghe; bana bakimalukila babuti babo, nu ku bita. ²² Mukasombwa na bansai kubushi bw'ishina lyani; tondo olya ukalinda kwikila bibyo, u ukona. ²³ Gha bakabayungyayungya mu musumba whoso, mwatinilagha mu ungo. Nababula bulili, tamukashila kutimba myelo S'isilaeli nu Mwana wa muntu nt'ika.

²⁴ Mwegheshibwa ntaghimba mwegheshi, ali mukiti ntaghimba mweme waghe. ²⁵ Bwalumba mwegheshibwa akatwe anga mwegheshi waghe, nu mukiti anga mweme waghe. Ndi bamanagha nene numba buno u Belesebuli, buni lino bubakamana bantu ba numba saghe!

²⁶ Tamubakwe boba; kubuno takuli chabisilwe kitakabisulwa, ali cha kindo, ki takamanwa. ²⁷ Binkubabula mu bulimaswa, mwabitendagha bwasibwasi; nu bimukwongwa mu kutui, mwabinsasagha mu mashumba. ²⁸ Tamukwe boba bwa babo banakosha kwita mubili nu taban'ita mutima; tondo, mukwe boba whoso un'ita mutima nu mubili mw'ishiba lya kaya. ²⁹ Ta bekughushagha tusoni tubili ku kakulo kamoi? Nu, taku wampa wabo unakoloka ndi nta kushima kwa So winu. ³⁰ Nu nshuli sa matwe minu insai saghansilwe. ³¹ Kashi mukwaghe boba; mwaghimba bubibu tusoni. ³² Uchasula, olya ukantata mu miso ma bantu, nine nkamutata kweli Tata wani wa mw'ighulu; ³³ tondo n'olya u kantuna mu miso ma bantu, nu ine nkamutuna kweli Tata wa mw'ighulu.

³⁴ Mumanaghe buno nashwile kulisha boolo mu kisi; nshashwile kulisha boolo, tondo mwele. ³⁵ Kubuno nashwile kulisha kwengucha muntu n'ise, mukinga na nina, mwanakashi na ninabyala; ³⁶ nu muntu akaba na baghini ba mu numba saghe. ³⁷ Olya washima ise ali nina kuntinga, nta tunganana ku neli, nu olya washima musikila waghe ali mukinga waghe ku ntinga, ntatunganana nine; ³⁸ olya ut'eka musalaba waghe, nu kunjanga, ntatunganana nine. ³⁹ Olya ukalanga kalamo kaghe aka kashimisha, nu olya ukashimisha kalamo kaghe ku bushi bwani akakamona.

⁴⁰ Olya wa basekela nti'ansekela, nu olya wansekela nt'asekela olya wansingile. ⁴¹ Olya wasekela mulenganya buno eli muleganya akakaswa indigho lya muleganya, Nu olya wasekela wisanana buno isanana, akakaswa indigho lya basanana. ⁴² N'onsai ukelesha mwana muto kata kamoi ka masi makwasa kubuno eli mwegheshibwa wani, bulili nkubabula buno, ntakashimisha kibhu chaghe.