¹ Mughaye lingo, buno munashwa kwaghibwa ² Kubuno mukaghibwa kuyangana na bumukwaghya, nu mu kalingikwa na kilingiko kimukulingika nacho. ³ Ki chasula walola kiti cheli mu liso lya muninu, nu ntukumona ku kisughu cheli mu liso lyobe? ⁴ Nu buni buunabula muninu: Shigha nikutuche kiti cheli mu liso lyobe, uwe wite kisughu mu lya lyobe? ⁵ Mwengelele, tucha tanga kisughu cheli mu liso lyobe, nu inga walola busogha kutucha kiti cheli mu liso lya muninu.

⁶ Mweleshaghe mbwa bikai bya sanana, nu mulekelaghe tutungwa twinu kweli mpunu, banashwa kutunanta nu kwenda ku mweli nu kubatwa.

⁷ Museghe nu mukeleshibwa; mulonde nu mukamona; mushumye ku lumbi nu muk'ighulilwa. ⁸ Kubuno olya wasegha, akeleshibwa, nu olya ukulonda, akumona, nu akw'ighulilwa olya washumya ku lumbi.

⁹ Ku benywe nai unelesha mwana waghe ikoi, ndi amwema kampampa? ¹⁰ Ali, ndi amwema kisonga, akamwelesha bulighi? ¹¹ Ndi lino, benywe bantu babi, mukumana kwelesha bana binu bisogha, buni So winu wa mw'ighulu ntakelesha bikai bisogha ku babo bamwema byo?

¹² Binsai bimukushima bantu babakitile, mubakitile byo nubo, kubuno u bwatenda mulembe nu balenganya.

¹³ Mutingile gha kitiko kikeke. Kubuno mwingilo u munene, nsila sa kwabucha sa tanuka, nu bengi bakwingila agho. ¹⁴ Tondo, kitiko cha bumbutana nu nsila sa kwenda ku kalamo sa kegha, bakeke u bakutinga muso.

¹⁵ Mwindange na balenganya ba bwisa. Bakushwa ku mweli bashwalile nshulu sa mbuli, kashi nti mpagha. ¹⁶ Mukabamanilila ku myanya sabo. Munakola bighuma bya mutini mu mikele ali tini mu mighunga? ¹⁷ Muti musogha ukukonamyagha bighuma bisogha, tondo muti mubi ukukonamyagha bighuma bibi. ¹⁸ Muti musogha unsai taunakonamya bighuma bibi, ali muti mubi taukukonamya bighuma bibi. ¹⁹ Muti unsai utakonamya bighuma bisogha nti wakalwa nu kulekelwa mu kaya. ²⁰ Kashi lino mukabamanilila ku myanya sabo.

²¹ Babo bakunimana Mukota, Mukota! tabakingila bansai mu bukota bw'ighulu, tondo olya w'inene wakita bwa bwashima Tata weli mw'ighulu. ²² Ubo busi bengi bakambula: Mukota, Mukota, tatwakitagha bulenganya mw'ishina lyobe? Tatwatibitagha basumbu kw'ishina lyobe? Nu twakitagha bitangalo bingi kw'ishina lyobe? ²³ Agho lino nkababula bwasibwasi: Nshabamanile, muntukile, benywe bakiti ba mabi.

²⁴ Uchasula, olya ukwongwa bino bitondo binkutenda nu kubikita, akasusana na mutegheleshi wobakile numba saghe ghantata n'ikoi. ²⁵ Mbula salokile, misalo sashwile, biswa byatingile nu bisundile kweso numba; tas'endukile, kubuno sakomilwe gha ntata n'ikoi. ²⁶ Tondo olya wongwa bino bitondo binkutenda, nu ntabikita, asusana na mughasanga wobakagha numba saghe mu museghe. ²⁷ Mbula salokile, misalo washwile nu biswa byatingile nu kwisunda kweso numba; sendukile, nu kusambuka bubibubi.

²⁸ Yesu, mu kushila kutenda ibyo bitondo bingi, kikembe chaghanaghanagha na meghisha maghe; ²⁹ kubuno abagha akweghesha anga wite bukulu, nu ta anga basanshi babo.