Kikando 4

1 Agho, Yesu ekilwe mu kalula na Muusa buno alingikwe na Kahinga. 2 Gha tinjagha bindi makumi manai musi nu lundi ntalile, ing'ongwa nsala. 3 Mulingiki, mu kushighelela kweli, amubulagha: Ndi uli Mwana wa Ghongo, bula mano makoi maghaluke tumpampa. 4 Yesu amwakulagha: Bwatililwe: Muntu ntanaba gho mu kulya tumpampa umpanga, tondo na kitondo kinsai ki kutuka mu kanywa ka Ghongo. 5 Kahinga amwekagha mu musumba wa sanana, amubikagha gha ntata 'gha numba sa kukumbamila, 6 nu kumubula: Ndi uli Mwana wa Ghongo indekele ghansi; kubuno bwatililwe: Akabula Baghenshi baghe kubushi bobe; nu bakakweka mu maboko, buno kughulu kobe takukitale kw'ikoi. 7 Yesu amubulagha: Bwatililwe lingo: Ntukalingika nukilo Mukota, Ghongo wobe.

8 Kahinga amwekagha lingo ghantata gha mwinduko mulai, amuloshagha bukota bunsai bwa kisi nu nkumbu sabo, 9 nu kumubula: Nkakweleshe bino binsai, ndi wankomela mashwe nu kunkumbamila. 10 Nu Yesu amubulagha: Tuka, Kahinga! Kubuno bwatililwe; ukakumbamila Mukota, Ghongo wobe, nu ukamukitila nkashi w'inene. 11 Agho Kahinga amushighagha. Nu lola, baghenshi bashwagha kweli nu kumukitila nkashi.

12 Yesu, mu kwongwa buno Yoani akanda, endaghaku Galilaya. 13 Atukilagha ku Nasaleti nu kwenda kwikala ku Kapelenaumu bwighi na kitatenge, mu mwelo wa Sabuloni nu wa Nafutali, 14 buno bibelelele byatendwagha na Mulenganya Isaya:
15 Bantu ba Sabuloni nu ba Nafutali ku tungo sa bwighinghi na kitatenge, mu kisi cha ghaleshila na Yolodani, nu cha Galilaya cha betekatisha,
16 bantu babo, babagha mu bulimaswa, bikalagha mu bulimaswa, balolile ku chengeshi kinene; nu babo bifalagha mu kisi nu mu kilimelime cha lukwo, chengeshi chabasaninde.

17 Tukila agho Yesu alingilagha ku sansa musaghu, nu mu kutenda; mughalule myanya sinu mbi, kubuno bukota bwa mw'ighulu bwa lembekela kwika.

18 Bwabagha akutabanga mu mutili wa kitatenge cha Galilaya, alolagha mibuto imbili, Simoni, ukumanwa Petelo, nu Andele muto waghe, babagha bekulekela kakila mu kitatenge, kubuno babagha babughi. 19 Ababulagha: Mu'njange, nu nkabakita babughi ba bantu. 20 Nwa'gho, bashighagha tukila nu kumuyanga.

21 Mu kutuka agho ikagha bulai, alolagha kw'engo mibuto imbili, Yakobo musikila wa Sebedayo, nu Yoani muto waghe, babagha mu bwato ghamoi na Sebedayo, ise wabo, nu babagha bakulanda tukila twabo. 22 Abamanagha, nw'agho bashighagha bwato nu ise wabo, nu bamuyangagha.

23 Yesu atimbile Galilaya insai, mu kw'eghisha mu masinakoki, nu kunsasa musaghu musogha wa bukota, nu mu kulamya nsambo insai nu busokoluma bunsai bwa bantu. 24 Nkulu saghe sendagha ku Suliya insai, nu bamwekinde babagha na nsambo nu mbabasho ninginingi, sa basumbu, sa lungu, sa babensekile bighansa, nu 'abalamishe. 25 Kikembe kinene chamuyangagha, kutukila Galilaya, Dekapoli, Yelusalema, Yudea, nu kuleshila kwa Yolodani.