¹ Mwebyo bindi, Yoani Mupatishi ikagha nu kusansa kitondo mu kalula ka Yudea. ² Atendagha, mwinsungule mu mitima kubuno bukota bwa mw'ighulu bwalembekela kwika. ³ Yoani u whoso wabalikwagha na mulenganya Isaya ghatendagha: Linu'ishuki lya olya ukutanda mulenge mu kalula: Mulongomanye nsila sa Mukota, mulingimanye byendeshi byaghe.

⁴ Yoani abagha na nshulu sa myosa sa ngamiya, nu mutunda wa lukwe mu kibunda. Alyagha minkula nu buki bwa mbala. ⁵ Bantu ba Yelusalema, Yudea insai, nu mu ntungo insai sa Yolodani bendile kweli; ⁶ Nu mu kusambala bwasibwasi bwaghi bwabo, bapatishibwagha mu lusi lunene Yolodani.

⁷ Tondo, mu kulola Bafalisayo bengi nu Basadukayo bamwikila buno bapatishwe ababulagha: Kilongo cha malighi, nai wabakengesha kutina mushibu ukashwa? ⁸ Mube na manya sa kushigha bwaghi, ⁹ Nu tamwitate: Bulahimu u Tata, kubuno nkubabula bwasibwasi mu mano makoi Ghongo anatucha mo bana ba Bulahimu. ¹⁰ Nu isagha lyabikwa kalai gha mashina ma miti; nu muti unsai utakonamya bighuma bisogha ukashindwa nu ku lekelwa mu kaya.

¹¹ Ine, nkubapatisha na masi, buno nibiche mu kushila bwaghi; tondo olya ukushwa kumbusa kwani ite bwangato kuntinga, nu nshinakosha kukandula mishighi sa bilato byaghe; we, akabapatisha mu Muusa Musogha nu kaya. ¹² Ite lweli lwaghe mu kuboko; akakukula mulungu waghe, nu kukunsumanya ngano saghe mu kigholo chaghe; tondo akalekela mpapa mu kaya ka takushima.

¹³ Agho Yesu atukagha ku Galilaya kwika ku Yolodani kweli Yoani, buno apatishibwe nawe. ¹⁴ Tondo Yoani ananagha, mu kutenda: Ine nema kupatishibwa nowe, nu uwe washwa ku neli! ¹⁵ Yesu amwakulagha: Unanaghe mweno nkungu; kubuno bwatunganana tukuche kinsai cha bulili. Nu Yoani ntamunaninde lingo.

¹⁶ Ghabinde Yesu apatishibwa, atukagha mu lusi. Nu lola, ighulu lighukagha, nu alolagha Muusa wa Ghongo wakumba anga kilinga nu kwikala ku mubili waghe. ¹⁷ Nu lola, ishuki lyongwibwagha ko kutuka kw'ighulu mu bino bitondo: Whono u Mwana wani unashima, muwe u munabika mwelamo wani unsai.