¹ Mu kulembekela Yelusalema, nu kwika ku Betefage bwighi na mwinduko wa Miseituni, Yesu asingagha begheshibwa babili, ² mu kubabula: Mwende ku mwelo weli kubusho bwinu; mwasange mpunda sakandilwe kano nu chana ghamoi na nina; mwabakandulagha, nu kun'ekela bo. ³ Ndi muntu ababusha kitondo, mwa mwakulagha: Mukota ite nkasa nabo. Nu mweso nkungu nti abamekulila bo.

⁴ Bibyo, bikagha buno bibelelele byatendwagha na mulenganya: ⁵ Mwabulagha mukinga wa Siona: Lola Mwami wobe ashwa ku weli, isala bubobelelo abakamile gha ntata na mpunda, mpunda nu chana cha mpunda.

⁶ Begheshibwa bendagha nu kukita bu bwabulaghwa na Yesu. ⁷ Bashwagha na mpunda nu chana cha mpunda, babikagha nshulu sabo ghantata nu kumwikasha kuso. ⁸ Bantu bengi ba kikembe baansagha nshulu sabo mu nsila, bango bakalagha ntabe sa miti, nu kusibika mu nsila. ⁹ Babo bendagha kubusho nu kuyanga Yesu bakughile: Hosana kwa Mwana wa Daudi! Akasanilwe ghoso washwa mw'ishina lya Mukota! Hosana mwa mw' ighulu.

¹⁰ Mu kwika mu Yelusalema, musumba unsai mwabagha kabilikito, nu batendagha: Unai whono?

¹¹ Kikembe chakulagha: U Yesu so mulenganya wa ku Nasaleti, mwa mu Galilaya.

¹² Yesu ingilagha mu numba sa ku kumbamila. Atibitagha bansai babagha bakughusha nu bakughula mu numba sa ku kumbamila; Endulagha mesa ma benganyi nu bishumbi bya baghushi ba bilinga. ¹³ Nw'ing'ababula: bwatililwe numba sani sikamanwa numba sa masegho. Tondo benywe, mwasighalula mukumba wa bimbi.

¹⁴ Byuku nu babensekile bighansa bashighelelagha kweli. Nu abalamyagha.

¹⁵ Mwa mukumona bitondo bisogha byakitagha, nu bana bekulekela milenge mwa mu numba sa kukumbamila: Hosana kwa Mwana wa Daudi! Tondo Bisankogha banene nu bansashi bonganilwe.

¹⁶ Bamubulagha: Ukongwa, bi bakutenda? Yesu abakulagha: Naki. Tamunusomagha ibyo bitondo: Watukishe lwanso mu kanywa ka bana, nu babo ba kumoma?

¹⁷ Nu mu kubashigha, atukagha mu musumbanu kwenda ku Betania, u kwayamagha.

¹⁸ Munindunindu, mu kukuluka mu musumba ing'ongwa nsala. ¹⁹ Mu nsila amonagha ku muti moi ashighelela ku weli, tondo ntasangagha ku kena, bisughu umpanga, nu aubulagha: Kighuma champa kikonamaghe kuwe! Nu agho muti wakamagha.

²⁰ Begheshibwa mu kulola kuubo baghanaghanagha, nu kutenda: Buni bwakama uno muti mu kano kaluma?

²¹ Yesu abakulagha: Nababula bulili, ndi munabinde na lukatisho nu ta munisikimile ku byatinga ku uso muti, tondo munabulile whoso mwinduko: Tomoka agho nw'indekele mu kitatenge, bunabind' obo. ²² Kinsai kimukasegha kutingila lukatisho nu masegho, mukeleshibwa cho.

²³ Yesu endagha mu numba sa kukumbamila, nu, mu kweghesha, bisankogha banene nu bakungu ba bantu, bashwagha kumubula: Ku bwangato ki u kuukukita eno myanga, nu nai wakweleshishe bubo bwangato?

²⁴ Yesu abakulagha: Nu ine nkubabusha lubusha lumoi; nu ndi mwanakula nw'ine nti nababule ku bwangato ki bunkukita eno myanga. ²⁵ Lupatisho lwa Yoani lwatukilagha kuni? Ndi lwa kw'ighulu ali lwa bantu? Tondo, bimbushagha gha basambana: Ndi twamwakula buno lwa mw'ighulu, nti abula buno buni bumwindagha ku mukatisha, ²⁶ Nu ndi twamwakula lwa bantu, twakwa bantu boba, kubuno bansai bekukata Yoani buno mulenganya. ²⁷ Agho, bamwakulagha Yesu: Tatukumana. Nu we ing'ababula: ninengo nshababule ku bwangato ki buunkita eso myanga.

²⁸ Buni bumwalola, mulume umoi abagha na basikila babili ing'a babula wa nkulha: Mwana wani, nda ukite mulimo buno busi mw'iswa lyani lya misabibu.

²⁹ Amwakulagha: Nshikushima. Kumbusa kwagho, inkulukagha mwa mu mutima, ing'enda.

³⁰ Inga abula woso ngo ubo nubo. Nu whoso mwana amwakulagha: Nashima e mukota. Nu ntendagha. ³¹ Nai ku babo babili wakitile bwashimagha ise wabo? Bamwakulagha: Wa nkulha. Nu Yesu ing'ababula bulili bantu ba tughutughu nu baluwawa bakabatangila mu bukota bwa Ghongo. ³² Kubuno Yoani ashwagha ku mweli mu nsila sa sanana, nu tamwamukatishishe, tondo bantu ba tughutughu nu baluwawa, bamukatishishe; Nu benywe balolagha kwibyo, tamwaghalukile nu kumukatisha.

³³ Mwongwilile ungo mushumo: Kwabagha mulume umoi nene numba, ashikagha misabibu. Atimbyagha mukolo mulw'iswa, nu kutima mushinga wa kukandila mo, ing'obaka kalokesho, nu ashighagha balimi nu kutuka mu kisi. ³⁴ Mu kuba bindi bya buuse byenela, asingagha bakiti baghe kweli balimi ba misabibu kubuno amone mbuto s'iswa lyaghe. ³⁵ Balimi ba misabibu, bakatagha bakiti, inga bapunda umoi nu kwita ungo nu wa basatu bamusundagha makoi. ³⁶ Asingagha lingo bango bakiti bengi ku ba basoki; nu balimi ba misabibu babakitilagha ubo nubo. ³⁷ Kumbusa, asingagha ku beli musikila waghe, mukutenda: Bakwe boba musikila wani.

³⁸ Tondo, babo balimi ba musabibu, mu kumona ku musikila waghe, batendagha ghabasambana: Lola nene mwandu, mushwe, tumwite, nu twiyangike mwandu waghe. ³⁹ Nu bamukatagha, bamulekelagha kushinda iswa nu kumwita. ⁴⁰ Nu agho, Busi buk'ika nen'iswa, buni bwakakita abo balimi ba misabibu?

⁴¹ Bamwakulagha: Akabashililisha abo bantu ba tughutughu, nu kwesanil'iswa ku bango balimi ba misabibu bakamwelesha mbuto mu bindi bya buusi.

⁴² Yesu ababulagha: Tamwasomagha Mitilo: Ikoyi lyatebwaghana bobaki, u limashishe numba? Nu kweli Mukota u kwatukila ibyo, nu cheli kighanaghana ku miso mitu?

⁴³ Uchasula nababula, mukanaghwa bukota bwa Ghongo nu bukeleshebwa kingo kilongo kikamwelesha mbuto. ⁴⁴ Olya ukawa kwilyo ikoi akabelekela kulyo, nu olya ukendukilwa nalyo, akaghoghwaghoghwa.

⁴⁵ Mu kushila kwongwa mamo mashumo maghe, bisankogha banene nu bafalisayo bamanagha buno bo'u bakutekulwa na Yesu. ⁴⁶ Nu balondagha ku mukata 'tondo bakwagha kikembe boba, kubuno bamukatagha buno eli mulenganya.