¹ Kubuno bukota bwa mw'ighulu bwa susana na muntu umoi nene numba, mu nindunindu asingagha bakiti ba milimo kw'iswa lyaghe lya misabibu. ² Alaghanagha nabo musanga umoi ku busi, nu ing'abasinga ku misabibu. ³ Atukagha mu sisatu, nu asangile bango gha kishiki batakukita kena. ⁴ Ababula: Mwende nu benywe ku misabibu sani, nu nabeleshe bibyo bya tunganana. ⁵ Nubo bendagha. Atukile lingo na nkungu mutuba nu sa mwenda nu kukita ubo nubo. ⁶ Gha tukagha nas'ikumi n'emoyi, asangagha bango babagha gha kishiki, nu kubabula: Buni bumwikalile ghano musi mughimaghima nu tamukukita kena?

⁷ Bamwakulagha: Tatwite watweleshishe mulimo. Ababulagha: Mwende nu benywe ku misabibu sani.

⁸ Mw'igholigholo mukulu nene misabibu abulagha mulangi waghe wa bikulo: Mana bakiti, nu beleshe indigho, kulingila ku bashinda kwika ku basoki. ⁹ Babo bas'ikumi n'emoi bashwagha, ku kweleshibwa na muntu musanga umoi. ¹⁰ Basoki bashwagha kumbusa, kumana buno beleshibwe bingi, tondo beleshibwagha na muntu na musanga umoi. ¹¹ Mu kubitola, bishushumagha ku mukulu nene numba,

¹² nu kutenda: Bano bashinda bakitile mulimo wa nkungu emoi, nu wabalingimanya na beshwe, bakutwagha na nkashi nu kilungu musi mughimaghima.

¹³ Akulagha umoi kubo: Mwinda wani, n'shakitile bubi; Tatwalaghanagha nowe musanga umoi? ¹⁴ Tola olo lobe, nu iendele. Nkushima n'eleshe whoso mushinda bigheshe na byobe.

¹⁵ Tabwaswagha nikite na bikulo byani bunashima? Buni buwandola na liso libi buno nili mubi? ¹⁶ Ububo, ba bashinda bakaba basoki, nu basoki bakaba bashinda.

¹⁷ Yesu mu kubakama ku Yelusalema, atolagha begheshibwa ikumi na babili bo binene, nu kubabula mu nsila: ¹⁸ Lola, twabakama ku Yelusalema, nu Mwana wa muntu abikwe mu maboko ma bisankogha banene nu basanshi. Bamwaghye lukwo. ¹⁹ Nu bamwesane ku batakatisha, buno bamusekelele, bamupunde na bususu, nu kumwinda ku musalaba; nu ku bindi bisatu akatuka ku bakui.

²⁰ Agho, nina wa bana ba Sebedayo ashighelelagha kweli Yesu na bana baghe, nu kumukomela mashwe buno amuseghe. ²¹ Amubushagha: Ki washima? Ing'amwakula: Lekula buno bana bani babili babano bikale mu bukota bobe, umoi kw'indume n'ongo kw'ikashi lyobe.

²² Yesu tendagha: Ntukumana bi ukusegha. Munakosha kunywa kaata kananywe. Batendagha: Batendagha, tunakosha?

²³ Nu ababulagha: Bulili mukanywa kaata kani; tondo byakw'ikala kw'indume nu kw'ikashi lyani, ibyo tabyakushima kwani, nu bikeleshebwa ku ba babikindwe na Tata.

²⁴ Abo ikumi mu kongwa kubo, bishushumagha kwabo banabo babili. ²⁵ Yesu abamanagha, nu kutenda: Mumane buno bami ba bilongo ba kubatetembya, nu bantu banene nti babakita bakobe. ²⁶ Ta bukaba bo mu kantighi na benywe. Tondo olya washima kuba mukulu winu, abaghe mukiti winu; ²⁷ Nu olya ukushima kuba mweme, abe mukobe winu. ²⁸ Ubwashwile Mwana wa muntu, ta kubuno akitilwe milimo, tondo akitile bango nu kwelesha kalamo kaghe kaba indigho lya bengi.

²⁹ Mukutuka ku Yeliko, kikembe kinene chayangagha Yesu. ³⁰ Nu lola, byuku bibili, bikalile mu ntungo na nsila, mu kongwa buno Yesu akutinga, balekelagha mulenge: Tukwile lukogho, Mukota, Mwana wa Daudi. ³¹ Kikembe chabasughilagha nu ku bakobya; tondo, batendagha bubibu: Tukwile lukogho, Mukota Mwana wa Daudi!

³² Yesu imalagha, ku bamana, nu ku babusha: Ki kimwashima nibakitile? ³³ Bamubulagha: Mukota, miso mitu mashibulwe. ³⁴ Mu chombo kinene, Yesu abakatagha ku miso mabo; nu agho balolagha nu kumuyanga.