¹ Lisabato ni lya khahwa, mumavwevwe shivala shishimwami khu litukhu lyu khurhanga mu lisitsa, Malya Magadalena na Malya wali wundi vatsya khuhensa ha shilindwa. ² Hensa, shivala shya techera, shichira ingerosi yu Mwami yikha khurula mwikulu, niyitsa ni kolonkominya lichina lyali mu mulyango kwi shilindwa, niyikhalakhu. ³ Likondo lyelye khuli luheni, ni tsinguvu tsye tsyali tsindavu huli likhonsa. ⁴ Vasikali vali valindi shilindwa varhia muno, nivatechera nukhukwa khuli vakhutsu. ⁵ Na ingerosi yavolera vakhali yavo, "Mukhava nu vurhi tawe, shichira manyi mukhava Yesu yavambwa." ⁶ Ali hanu tawe, shichira yisimukukhe, khuli yavola. Hambi mu hense ha yalikhitswa lwavamuvikha yumu. ⁷ Mutsi vwangu muvolere vechitswi veve, "Umali khwisimukukha khurhula mu vakhutsu, Hensi, atsitsanga imberi wenyu khutsya igalilaya. Mulamulola iweneyo, loli, mali khumuvolera."

⁸ Vakhali yavo varhanga luchendo khurhula ha shilindwa vwangu, ni vitsule vurhi navutswa khaandi nivali nu vuyansi vunyikhi, virukhaka vatsya khuvolera vechwitsi veve. ⁹ Hensa Yesu yakana navo navola, "Mirembe!" Vakhali yavo visunda himbi khuye, niva mwinamira nu khumukumira khu virenje vyevye, nu khumuha luyali. ¹⁰ Na Yesu yavavolera, "Mukhari tawe, tsi muvavolere vamwavo vanje vatsi igalilaya. Iwene yeyo valandola."

¹¹ Lwa vakhali yavo vali ni vatsitsanga, valala khu vasikali va lindanga ha shilindwa vatsya mwitaala, nukhu volera vasalisi vakali vuli shindu shyosi shyali shikholekhe khuvo. ¹² Lwa vasalisi vakali vakana na vasakhulu, vakhana vuvehi, ni vaha vasikali tsisenti tsinyikhi. ¹³ Nivava volera, muvolere vandu, 'Vechwitswi veve vitsi vutukhu valiva muviri nukhukoni.' ¹⁴ Niva makhuva yaka kalatukha mu marhoyi ka kavana, khutse khulalomoloma neye khu muvule khusumbulwa khali hati. ¹⁵ Khulwayako vasikali vavukula tsisenti ni vakhola khuli vali nivavolerwe. Makhuva yaka kalanda mu Vayahudi khaandi katsiliranga khali lwene yulu.

¹⁶ Na vechitswi veve likhomi nu mulala, vatsya igalilaya, khu shikulu shya Yesu yavalaka. ¹⁷ Lwa vamulola, va mwinamira, navutsa valala muvo vali nili hayahayitsa. ¹⁸ Yesu yitsa khuvo namoloma navo navavolela, "Mbererwe vunyali vwosi mwikulu nu mulilova, ¹⁹ Tsi mukhole vandu vyi tsimbya tsyosi khuva vechitswi vanje, muvabatise mu lyirha lya Baba, lyu Mwana na Roho Mutakatifu ²⁰ Mu vekitse khu kumira mekitso kosi kanda mulaka. Hensi, inse ndi halala na munye matukhu kosi, khutukha khu shiheri."