¹ Vyakalire ashi apa Jesusa amanine kughamba nkango dino, ghuye a tundumo muGalilea ntani nakuya kuruha mukunda rwa Juda oro rwakaliro kunyima ya Mukuro waJordani. ² Mbunga yayinene aya mukwama, ntani ghuye ava verura nkokunya.

³ Vafalisayi vayire kwendi, ava musheteke, mukughamba kwendi, "Vyapulitira mukafumu a kombe mukamali wendi mukehe yino konda ndi?"

⁴ Jesusa a limburura na kughamba, "Kapi mwa varura ashi ogho ava shito kutundilira kuntamekero kwavashita mukafumu na mukamali ndi? ⁵ Ghuye ogho a vashito naye kwaghambire, Nakonda yino mukafumu nga shuva vashe ntani na vawina aka kupakerere namukamali wendi, ntani vantu ovo vaviri ngava kara rutu rumwe tupu.' ⁶ Vavo kapishi vaviri nka, nani ngoli rutu rumwe. Mpo ngoli ovyo a gwanikita Karungu kumwe, kapishi pakare ghumwe a vigaghunune

⁷ Vavo ava ghamba kwendi, "Morwa nke Mosesa atu rawiranga ashi tutape mbapira yakukukomba makura ntani vamutuma mukamali ayende?"

⁸ Ghuye a ghamba kwavo, Morwa yadimutjima denu dakukuto, Mosesa myo amu pulitiranga mukombe vakamali venu, ano ngoli kuntamekero kapishi mundjira yino vyakalire. ⁹ Kuna kumutantera anwe kehe ghuno wakukomba mukamali wendi pahana konda yalishondero, nakukwarako wapeke, ana shondere ngoli; ntani mukafumu wakukwara mukamali ogho vakomba naye ana shondere."

¹⁰ Varongwa ava ghamba kwaJesusa, "Ntjne ngoli mo vakukara vantu na mukamali wendi, kapishi viwa kukwara."

¹¹ Ano ngoli JEsusa a ghamba kwavo, "Kapishi kehe ghuno kwatambura vighamba vino, ano ngoli nkwandi mbovo tupu vavipa. ¹² Mpovali vapiro kuwapera kukwara vavo ngoli mo vakara kutunda mumara ghava nyokwavo, ntani mpovali vamwe ovo varughana vantu, ntani mpovali vamwe vakurughana naghumwavo mukonda ya ghuntungi wa liwiru. Kehe ghuno a shetekereko kutambura lirongo lino, ali tambure."

¹³ Makura vanuke vamwe ava vayita kwendi mposhi aya vakambeke maghoko ghandi pavo ntani na kuraperera, ano ngoli varongwa ava vatughumukiri. ¹⁴ Ano ngoli Jesusa a ghamba, "Pulitirenu vanuke vavadidi, kapishi muva shweneke kuya kwande, ghuntungi wa liwiru kwavo wahamena." ¹⁵ Ghuye a kwata maghoko ghendi pavanuke, makura atundupo panya.

¹⁶ Ava kenge, mukafumu ayiro kwa Jesusa ntani a ghamba ashi," Murongi, shininke munke shashiwa nirughana ngani wane monyo wanaruntje?"

¹⁷ Jesusa a ghamba kwendi, "Vinke ghuna kumpulira kuhamena vinke vyaviwa? Shininke shimwe tupu shashiwa, ano ngoli ntjene ghuna shana kungena muliparu, tikitamo dimuragho."

¹⁸ Mukafumu a ghamba kwendi, "Dimuragho munke?" Jesusa a ghamba, "Kapishi kudipagha, kapishi kushondera, kapishi kuvaka, kapishi kukonga, ¹⁹ Fumadeka vasho na vanyoko, ntani hora ghunyoye yira moomo wakuhora naghumoye."

²⁰ Mukafumu ghona a ghamba kwendi, vininke navintje vino kwavitikitangamo. Vinke nka ovyo napumbwa?

²¹ Jesusa a ghamba kwendi, "Ntjene washana kutikiliramo, yenda, ghukaulite limona lyoye, ntani ghukatape kuvahutu, ntani ngaukawana limona lyoye muwiru; ntani yiya ghunkwame." ²² Ano ngoli mukafumu ghona apa ayuvire ovyo a ghambire Jesusa, atundupo ghuye ana guvu, ghuye kwakalire na limona lyalingi.

²³ Jesusa a ghamba kuvarongwa vendi, "Vyaghushiri nakumutantera, ghudito shiri mukafumu wangawo kungena mughuntungi waliwiru. ²⁴ Ntani nka kuna kughamba kwenu, vyarerupa kwa ngamero apite mulintjo lyantonga makura mukafumu wangawo a ngene mughuntungi waliwiru."

²⁵ Varongwa vendi apa vaviyuvire, vatetukire ghunene ntani ava ghamba, "Are ngoli ngaparuko?"

²⁶ Jesusa ava kenge ntani a ghamba, "Kuvantu vino ghudito, ano ngoli kwa Karunga vininke navintje ghureru."

²⁷ Makura Peturusa a limburura nakughamba kwendi, "Kenga, twashuva navintje ntani twakukwama ove. Vinke ngoli ngatuwana?"

²⁸ Jesusa avatantere ghushili naku mutantera," mumwaka waghupe opo Mona muntu ngaka shungira pa shipuna shaghu Hompa shaghuyerere, anwe mwankwamo nanwe ngamu kashungira pavipuna vyaghuHompa ronambiri, mukukapangura marudi ronambiri ghava Israel. ²⁹ Kehe ghuno a shuvo mundi, vakuruvendi, vamughuni, vashe vawina, vana ndi shirongo mulidina lyande ngakawana vikando lifere limwe ntani ngakapinga liparu lyanaruntje.

³⁰ Ano ngoli vangi vakuhova kakara vakuhulilira, ntani vakuhulilira kakara vakuhova.