¹ Muliyuva ndyo linya Jesus kwarupukire mundjugho aka shungire kuntere ya lifuta. ² Makura mbunga yayinene ayiyapongo yimukundurukide, makura aperama muwato a shingiri moomo shirugho ntjosho mbunga yayo yina yimana kuntere. ³ Makura Jesus ava tantere vininke vyavingi muvifanikito ashi, "Mukuni ghumwe kwayendire aka kune. ⁴ aka hokwere kukuna, mbuto yimwe ayi were mundjira, makura vidira aviya aviyilipo nu. ⁵ Ano mbuto yimwe ayiwere pa mawe, opo padiliro livhu lyadjuni. Nakadidishi kare kayimene, morwa livhu lyapo lisheshu unene. ⁶ Apa lya puma liyuva ayi pii ayi kukuta mukondashi kudereko ndandani. ⁷ Ano mbuto yimwe ayi were mumiya. Apa dakuralire miya avayi mini po mbuto. ⁸ Ano mbuto yimwe ayi were palivhu lya liwa ayi kuru ayi yita ntanga lifere, eyi yimwe dimurongo ntano-na mwe, ano eyi yimwe dimurongo ntatu. ⁹ Oghu akaro namatwi ghakuyuva, ayuvhe!"

¹⁰ Makura varongwa avaya vaya pure Jesus ashi, "Morwa nke ghuna kughambera muvifanikito?"

¹¹ Jesus alimburura na kughamba ashi, "Mbyevi shi anwe vavi mupa mukuyuvako mahoramo gha Untungi waliwiru, ano kukwavo kapi vavi vahorwera. ¹² Morwashi kehe uno akaro navintu, ngava vimuvhukitira, ano koghu apiro kukara navyo ngava mughupa nampili avi akara navyo kare. ¹³ Mbyo ngoli nakuvaghambitira muvifanikito: mbyovyoshi nampili vakare na mentjo, vavo kapi vamonanga, ntani nampili vakare namatwi, vavo nakuyuvashi, ndi ashi vakwate lighano. ¹⁴ Kwavo nko lyatumbukira lipumbo lya Jesaya ash: 'Kumatwi ngamuyuvita ano ngoli kapi ngamuvikwata lighano; kumentjo ngamumonita ano ngoli kapi ngamuvimona.

¹⁵ Morwashi dimutjima damuhoko ghuno dakukuta, akare matwi ghado, kwakumbandera. Vavo kwaferera kumentjo ghavo ashi vadire kumonitako, kumatwi vadire kuyuvitako, ano kudimutjima vadire kukwata lighano, vadire kukutezurura, ano ame Karunga nidire kuva verura.

¹⁶ Ano ngoli mentjo ghenu haragopa mukondashi ghagho kumona, akare matwi ghenu nagho haragopa, morwa ghagho kuyuvha. ¹⁷ Ushiri nakumutantera ashi, Vaporofete navahungami vavangi vaholire navo kumona evi muna kumona, ngoli kapi vavimonine, vavo nka kwaholire kuyuvha evi munakuyuvha, ngoli kapi vaviyuvhire.

¹⁸ Teghererenu ngoli kushifanikito sha mukuni. ¹⁹ Ntjeneshi muntu ayuvhu nkango daUntungi waliwiru, ngoli adire kudi kwata lighano, makura munyengi ghuye kuya kuyashakanamo nkango edi vanakunu mumushima wendi. Oyino ndjo ngoli mbuto vakunine mundjira. ²⁰ Mbuto eyi vakunine pamawe muntu wakuyuvha nkango, kare kayi tamburako naruhafo, ²¹ ngoli ghuye muderemo ndandani mumwendi, ntani nka ghuye kapi akora. Nange apamoneke udito ndi mahepeko mukonda ya nkango, makura ghuye kudjonauka po. ²² Mbuto eyi vakunine mumiya, muntu wakuyuvha nkango ngoli shinka shendi shavi vya udjuni ghuno nevi vyalimona makura kudipaya mo nkango adire kuyita viyimwa vyaviwa. ²³ Ene ngoli mbuto eyi vakunine palivhu lyaliwa, muntu wakuyuvha nkango makura ghuye kudikwata lighano. Oghu ndje ngoli ayimango, ayite ntanga lifere, pamwe murongo ntano-na yimwe, ndi ashi dimurongo ntatu.

²⁴ Jesus kwa vatantilire nka shifanikito shimwe ashi: "Untungi waliwiru kwafana yira muntu ogho akunino mbuto yayiwa mulifuva lyendi. ²⁵ Ano vantu apa varalire, munyengi wendi aya ayakunumo mushoni muvilya makura akayenda. ²⁶ makura mbuto apa yakulire yivare, mushoni nagho aghu monekemo. ²⁷ Vakareli vanturaghumbo makura avaya, avaya mutantere ashi, 'Nturaghumbo, nani kapi wakunine mbuto yayiwa mulifuva lyoye? Mushoni ne kuni ghuna kutundilira?'

²⁸ Makura ghuye ava limburura ashi, 'Munyengi ndje avi ruwano vino.' Vakareli ava mupura ashi, 'Ghuna shana tuyende tuka vidure mo ndi?'

²⁹ Ghuye ava tantere ashi, 'Hawee. apa mukadura mo mushoni, manashi mukadulilira navilya. ³⁰ Shuvenu tupu, vikure kumwe dogoro shiruwo sha kuyangura, ntani ngani tantera vayunguli ashi, Hovenu tanko kupongaika mushoni, mughu mangayike vitungu, muushore, makura vilya muvitware kughutara wande.'"

³¹ Jesus ava tantere nka shifanikito shimwe ashi: "Untungi waliwiru kwafana yira ntanga ya rukokotwa eyi akunine mukafumu ghumwe mulifuva lyendi. ³² Mbuto yino ndjo yayididipo pa ntanga nadintje. Ene ngoli nange yinakuru kupi takana viyimwa navintje vya mushikunino, makura vidira kuya viya tunge vikorogo vyavyo kudimutavi."

³³ Jesus ava tantere nka shifanikito shimwe ashi: "Untungi waliwiru kwafana yira hingo eyi ahupire mukamali, ature mumahemere matatu gha utura, dogoro ayi shashita utura nauntje."

³⁴ Vininke navintje evi Jesus kwavitantilire vantu muvifaniko. ³⁵ Kudereko evi ava tantilire ghanashi mushifanikito, ashi ditike mo ngango adi aghambire muporofete ashi: "Ame ngani yashura kanwa kange muvifanikito, ngani ghamba vininke evi vya horamo kundilira kulishito lya udjuni."

³⁶ Jesus apa amanine kurekera mbunga, makura akayenda kumundi. Varongwa vendi ava muyere vayamupure ashi: "Tufatwilire shifanikito sha mushoni wa mulifuva."

³⁷ Makura mbyo ava vatantilire ashi: 'Mona muntu ndje mukuni wambunto yayiwa. ³⁸ Lifuva lyene ngo udjuni ghuno. Mbuto yayiwa mbovo vahameno untungi waliwiru. Ano ngoli mushoni mbovo vahameno kwaSatana. ³⁹ Munyengi ogho aya kunino mo mushoni, ndje ngoli mudjonauli, muyangu ghuhura wa udjuni, ano ngoli vayanguli mbo va engeli. ⁴⁰ Moomu tupu vapongayikanga mushoni vakaghuture mulikuru ndiro, mo nka ngoli ngavikara paghura wa udjuni. ⁴¹ Mona muntu ngatuma vaengeli vendi, vaya pongayike vapukiti na vanandjo muudjuni. ⁴² Makura ngavavavukumine mumundiro wakutwera, omo ngava lira nakukukwetja mayegho. ⁴³ Makura vantu vavahungami ngavavembera yira shite sha liyuva muUntungi wa shavo. Oghu akaro namatwi, ayuvhe.

⁴⁴ Untungi waliwiru kwafana yira ghungawo ogho wahoramo mulifuva. Mukafumu kughuwana ntani kughuhoreka. Muruhafo rwendi kuyenda akaghulite navintje evi akara navyo, aya ghuliteko lifuva linya.

⁴⁵ Ntani nka, untungi waliwiru kwafana yira mughuli ogho a shanango kughura mpako yayiwa. ⁴⁶ Nangeshi anawana mpako yamulyo po unene, makura kuyenda akaghulite navintje evi aweka, ayayighure.

⁴⁷ "Waro nka shimpe, untungi waliwiru kwafana yira likwe olyo teya mulifuta, olyo lya kwatango kehe shishitwa. ⁴⁸ Ntjeneshi linayura, muhugi kulikokera paghurundu. Makura kushungira vahangwire vininke vyaviwa mushuma, ene ngoli vyavidona kuvi fukumina kunya. ⁴⁹ Mo ngoli ngavikara kuughura waudjuni. Va engeli ngavaya mukuyahangura vadona kuva hungami. ⁵⁰ Ngava vafukumina mumundiro wakutwera, omo mo ngava lira na kukukwetja mayegho.

⁵¹ "Muna viyuvhu vininke navintje vino ndi?" Varongwa ava limburura, "Nhii."

⁵² Makura Jesus ava tantere ashi, "Mpo ngoli ashi kehe uno mulirongi matjangwa ogho akaro murongwa muUntungi waliwiru yira mwenya ndjugho, wakughupamo vininke vya vipe navi vya kare mughuntungi wendi."

⁵³ Apa amanine kughamba vifanikito ovyo, Jesus makura atundupo akayenda. ⁵⁴ Makura Jesus aya ngene mumukunda wendi, nakuya ronga vantu muSinagoge. Vitundwamo vya vatetukitire ava ghamba ashi, "Kuni awana ukonentu wendi ghuno mukafumu ntani navino vitetu? ⁵⁵ Oghuno mukafumu nani kapishi mona mushongi vipirangi? Vawina nani kapishi vanya vatwenya ashi Maria? Vakuru vendi vavakafumu nani kapishi va James, Joseph, Simon, na Judas? ⁵⁶ Vakuru vendi vavakamali nani kapishi kumwe twakara navo ndi? Kuni avi wana vininke navintje vino?"

⁵⁷ Vyavaguvitire mukonda yendi. Ngoli Jesus ava tantere ashi, "Muporofete kudereko oghu ngava vhura kutambura mushirongo shamwene ndi ashi muliro lyamwene." ⁵⁸ Kapi ana ruwana vitetu navintje vino mukonda yakudira lipuro mumwavo.