¹ Ruvede runya Jesus kwa pitire mu mafuva mu liyuva lyo Sabbata. Varongwa vendi ndjara yava kwa tire, makura ava tameke kutjoraura ntafu va lye. ² Opo va vimonine vafalisayi, ava mutantere asi: "Kengasi, Varongwa voye kuna kuruwana evi vasweneka muliyuva lya Sabbata."

³ Jesus ava limburura asi, "Kapi mwavarura evi aruwanine Ndafita, opo ya mukwatire ndjara kumwe navantu vendi? ⁴ Ayendi mundjuwo yaKarunga, a ka lye mboroto da ndjambo, edi vava dilikire kulya, nkwa ndi vaPristeli tupu vadi pulitilire. ⁵ Ndi walye kapi mwa vharura mu veta ya Karunga asi, vaPristeli weni omu vava tukire veta ya liyuva lyo Sabbata muntembeli ngoli naghu ndjoni si? ⁶ Enne ngoli ame kuna ku mutantera asiw apitakano ntembeli mpwali mpa pa. ⁷ Ndi mwa yiva asi vinke dina kutanta nkango dino, 'Ame ufenkenda nahoro, kapishi ndjambo,' ndi kapi muna pangura vano vakupira ghu ndjoni. ⁸ Mbye Mona muntu ndje mwenya Sabbata nka."

⁹ Jesus apa atundirepo makura akangena mu Sinagoge davo. ¹⁰ Tatererenu, mwa kalire mukafumu wakufa liwoko. Vafalisayi makura ava pura Jesus asi, "Vya pulitira mu kuverura mu liyuva lyo Sabbata ndi?" No lihano lyo kurenka si vamuwane undjoni.

¹¹ Jesus ava limburura asi, "Opo munakara mukatji kenu are akaro no ndjwi yimwe tupu, enne nange ayi were mulikwina, makura adire kayi upa mo muliyuva lyo Sabbata? ¹² Pa muntu na ndjwi are wamu lyo po? Mpo ngoli asi muliyuva lyo Sabbata kuvhura kuruwana mo vyamu lyo." ¹³ Makura Jesus atantere mukafumu unya asi, "wonyonona liwoko lyoye." Makura uye awonyonona, liwoko aliveruka likare yira unya lyo. ¹⁴ Vafalisayi makura ava rupukamo, va ka kuyonge asi weni omu vamuruwana Jesus mpo si va mudipaye.

¹⁵ Jesus apa avi nongonwine vino, makura atundupo. Vantu vo vangi ava mu kwama, makura uye ava verura navantje. ¹⁶ Makura ava pa mpilikida asi ndi kapisi va mu yiyauke, ¹⁷ morwa asi ditike mo nkango da mu porofete Jesaya, atantiro asi, ²² Makura mutwiku umwe ntani nka uye sipurupuru, akaliro na ndemone, ava muyita kwa Jesus. Uye amuverura, makura atameke kumona no kughamba nka. ²³ Mbunga mudima makura ayi tetuka, na kutanta asi, "Ngoli uno mukafumu ne mona Ndafita ndi?"

²⁴ Ngoli vafalisayi apa vayuvire mbudi yino, avare asi uye kapi atjida nga mo mpepedona no nkondo dapeke, nkwandi no nkondo da Belisebubu, mukondi wo mpepodona."

²⁵ Apa amonine Jesus asi mo vana kuhayara ngoli, makura ava tantere asi: Kehe sino sirongo sakutavakano shene ngashihanaukapo, yikare nkurumbara ndi mundi wo makutavakano wene kapi nga uyimana. ²⁶ Nangeshi Satan kutjida mo Satan, makura kupakara ngoli likutavaghano. Weni ngoli omo untungi wendi ghuyimana? ²⁷ Nangeshi ame mpepo dadidona kuna kuditjidamo nankondo daBelisebubu, makura ava vana venu nankondo dare vaditjidanga mo? Mukonda yevino mpo ngoli vakarera vapanguli venu. ²⁸ Ngoli nangeshi nankondo daKarunga natjidanga mo mpepo dadidona, yivenu ashi untungi waKarunga ghunamuyere.

²⁹ Weni muntu omu avhura kungena mundjugho ya lipenda akavake mo vininke vyendi hana tanko kumanga lipenda olyo? Ntani angena akavake mo vininke vyendi mundjugho.

³⁰ Kehe uno adiro kuhamena kukwande aku limba name, ano kehe uno wakudira kupongayika name, kuhanaura.

³¹ Mpo ngoli nakumutantera ashi, kehe ndjo na lishwaghu vantu kuvhura kuyiva dongonwenapo, ngoli lishwaghu lyaku mpepo yakupongoka nakulidongononapo shi. ³² Kehe uno wakughamba nkango yayidona kwa Mona muntu, ghuye kumu ghupirapo. Ngoli kehe uno wakughamba nkango yayidona ku mpepo mupongoki, ogho kwato kumu ghupirapo, ndi nampili mu udjuni ghuno, ndi ogho ngauyoko.

³³ Nangeshi mutante ashi shitondo shiwa na nyango yasho yiwa, ndi murenke ashi shitondo shitondo shidona nanyango yasho yidona, myevishi kunyango nko vadimbwiliranga shitondo. ³⁴ Ene ngoli anwe vana vavambaroka, anwe muvadona, weni ngoli omu mughamba vyaviwa? ³⁵ Morwa ovyo vyayuro mumutjima kanwa nako mbyo kaghambanga mbyovyo. Muntu wamuwa kushorora vyaviwa vyamuungawo wendi wauwa, ene ngoli muntu wamudona kushorora vyavidona vyamuungawo wendi waudona. ³⁶ Ngoli ame kuna kumutantera ashi, kehe yino nkango yakupira mulyo, aghambanga muntu, ndjo kukenita muliyuva lya mpanguro. ³⁷ Mbyovyoshi kunkango doye nko ngava kupongwera, ano kunkango doye nko ngava kupangwilita nka koko."

³⁸ Makura valirongi vamatjangwa na vafalisayi ava tantere Jesus ashi, "murongi, atwe tunasha ghuruwanepo shitetu tushimone."

³⁹ Jesus makura ava limburura ashi: "Vantu vaweno vavadona varushonda mbo vana shano shitetu. Kwato nka shitetu shakuvaruwanena nkwandi shitetu sha mu Porofete Jona. ⁴⁰ Yira moomu tupu akalire Jona mayuva matatu mwi na matiku mushira sha limuntjwi, mo ngoli naye Mona muntu ngakara mayuva matatu mwi na matiku kuntji ya livhu. ⁴¹ Muliyuva lya mpanguro vakafumu vamu Ninive ngava pirukira vantu ava vavape undjoni, morwa ashi vavo kwakushighulire kuliyuvito lya Jona, Monenu, oghu apitakano Jona mpwali pano. ⁴² Hompa wamukadi wakumbindakano ngashapuka muliyuva lya mpanguro ya vantu vamuhoko ghuno avape undjoni, mbyevishi ghuye kwatundilira kughura waudjuni aya teerere ukonentu wa Salomoni, monenu, wakupita kana Solomoni mpwali pano.

⁴³ Nangeshi mpepo yayidona ayi tundu mo mwa muntu, yayo kurenda-renda mushirongo shamburundu, yishane shane ghuturo, makura apa yidira kuwana ghuturo. ⁴⁴ Makura yayo kutata ashi, 'Kuna kuvyuka kundjugho yande oyo narupukire.' Ene ngoli apa yikavyuka kuyawana ndjugho vanayikwere yinakene. ⁴⁵ Makura yayo kuvyuka yikashimbeko nka mpepo dimwe ntano nambiri dadidona kupita kana yene. Makura dado kungena ditunge mo. Viruwana vya murwana gho kukara vyavidona kupita kana vyakuhova. Navantu vavadona vamuhoko ghuno mo ngavakara ngoli.

⁴⁶ Jesus haka hokorwe mukughamba atantere mbunga, nani vawina navaghuni vendi vana yimana pandje, vanashana kughamba naye. ⁴⁷ Makura muntu ghumwe amutantere ashi: "Vanyoko navaghuni voye pandje vanakara, vanahoro kuhoro kughamba nove."

⁴⁸ Makura ghuye amu limburura ashi: "Vanane vakuni ntani navo vaghuni vande nka ne vakuni?" ⁴⁹ Makura ghuye aghonyonona lihoko lyendi kuvarongwa kumwe nakughamba ashi: Kengenu, Vanane navaghuni vande mbava! ⁵⁰ Morwashi kehe ghuno wakuruwana viruwana vya vavava vamuliwiru, ndje mughunyande, ndje mpandjande, mbo Vanane mbovo."