¹ Jesusa a kuwu varongwa vendi murongo no vavili kumwe nakuvapa nkondo kupitakana mpepo do kunyata, ku di tjidamo dirupuke, nakuverura kehe rudi rwo mauvera ha ku kusuva-suva. ² Weno madina ha vapositoli murongo no vavili ngo hano. Wakuhova, Simoni (owu kava kuwanga nka Peter), ntani Andreasi muunyendi; Jakopo mona Zebede; ntani Johanes muunyendi; ³ Filipus, ntani Baritomeu; Tomasa; ntani Mateus mufutiti mutero; Jakopo mona Arufeusi, ntani Tadeusa; ⁴ Simoni wo mupampi; ntani Judas Isikalyoto owo amu soroliro.

⁵ Avano murongo navaviri Jesus ava tumu. Ava rondora nakughamba, "Kapisi muyende kulivango vatunga vahedana, ntani kapisi muka ngene mudoropa yo vaSamaritani. ⁶ Yendenu tupu kuntjwi do ku kombana mumundi wava Israeli; ⁷ ntani omu muna kuyenda, yuvitenu no kughamba asi, 'untungi wo liwiru waya papepi.' ⁸ Verurenu vakuvera, rambwitenu vafe, kakushurenu vakavingondwe, ntani katjidenu mpepo dadidona. Mahoko-hoko muna viwana, kavi tapenu mahoko-hoko. ⁹ Kapishi mushimbe kehe ngorodo, ndi siliveli, ndi ngoporo mutundjato twenu. ¹⁰ Kapishi mushimbe ndjato damuruyendo rwenu, ndi vikoverero viviri ndi vicapa, ndi virughanita, murughani kuparukira mundya dendi. ¹¹ Kehe nkurumbara ndi mukunda mu kakenga, kapaparenu mo wo muwa, no kukara naye dogoro ngamu kavyuke. ¹² Apa mukangena mu mundi, mororenu. ¹³ Ntjene mu mundi muwa, renkenu mpora yenu yikare pa payo. Enne ngoli ntjenesi kapisi yiwa, renkenu mpora yenu yi mu vyukire naumwenu. ¹⁴ Kovo nga va ka mudiro ka mutambura ndi kuteyerera ku nkango denu. Apa nga mutunda mu mundi owo ndi nkurumbara, ku ku kumunenu mbundu yitunde ku mpadi denu. ¹⁵ Vy0 usili na ku mutantera, ngavi kapitakana livango lya Sodoma naGomorrah mu liyuva lyo mpanguro nta oyo nkurumbara.

¹⁶ "Kengenu, ame kuna ku mutuma yira ndjwi mukatji ko mambungu, mposi karenu muna rungarara yira vambaroka ntani muna kuruka yira maputukuwa. ¹⁷ Nomenenu vantu! vavo ngava mutapa nwe ku mpanguro, ntani ngava kamutowonena mu sinagoge davo. ¹⁸ Makura nga va mutwara kumeho ya nguuru na Hompa mukonda yande, nga muvape umbangi ntani no ku vahedana. ¹⁹ Apa ngava mukwata, kapishi mgamukupakere shinka kuhamena weni ndi vinke ovyo tuka ghamba, morwa evi vyakughamba ngava vimupa anwe paruvede ndoro. ²⁰ Morwa kapishi anwe ngamu kaghambo, ano ngoli mpepo ya shenu oghu ngaghambo mumwenu. ²¹ Mukurwamuntu ngatokwera mughanyendi kumfa, ntani shamuntu monendi. Vana ngavashapuka nakukulimba nava kurona vavo nakuvatokwera kumfa. ²² Ngava munyenga kehe ghuno mukonda yalidina lyande. Ano ngoli kehe ghuno ngadidimiko dogoro kughuuhura, ogho muntu ngaka yoghoka. ²³ Apa ngava muhepeka anwe mushitata shino, tjwayukirenu kwakukwamako, vyashiri nakumutantera, anwe kapi ngamu yenda kupitira mushitata shaIsraeli kumeho mona muntu ngaka ye.

²⁴ "Murongwa kapi a pitakana mushongwa wendi, ndi mukareli pawiru yamuhona wendi. ²⁵ Vya wapa murongwa ashi ghuye a kare yira mushongi wendi, ntani mukareli yira muhona wendi. Ntjene vavo ngavayite muhona wamundi Belisebuli, weni ghunene wamadina vamutwenya varangweka vendi.

²⁶ Mpo ngoli ashi mwasha vatjira, morwa shi kwato osho shavando eshi ngashi diro kuhoroka, ntani sha sha vando eshi ngavadira kuyiva. ²⁷ Kehe vino nakumutantera mumundema, kuvighamba mughukenu, ntani kehe vino muna kuyuva mumatwi ghenu kadidi, ngava viyuvita pawiru yandjugho. ²⁸ Kapisi muvatjire ovo va dipayango rutu ano ngoli kwato kuvhura kudipaya monyo. Nani tjirenu oghu a vhurango kudjonaghura navintje monyo ntani natu mulivango lyo lidjonawiro. ²⁹ Mandjunge maviri kapi va ha ulita na silinga mbili? Ano kwato limwe lyagho lya werango palivhu hana ku liyiva senu. ³⁰ Ano ngoli nampili huki dakumutwe woye dapwa kudivarura. ³¹ Kapisi kutjire. Anwe mulyo kupitakana mandjunge ghamangi. ³² Mpo ngoli ashi kehe ghuno wakuntongonona ame kumeho yaVantu, name nka ngani kamutongonona kumeho yavavava muliwi. ³³ Ano ngoli oghu antjwenango ame kumeho yavantu, name ngani kamushwena kumeho yavava muliwi.

³⁴ "Kapishi mu ghayare ashi ame kwa yera niyite mpora pano palivhu. Ame kapi na yera niyite mpora, ano ngoli likunyengo. ³⁵ Morwa kwayera niya ture ghunkore pakatji kamwanuke wamukafumu navashe, ntani ghunkore pakatji kamwanuke wamukadona navawina, ntani ghunkore pakatji kamuntu nangumweyendi. ³⁶ Mukafumu nkore dendi ngava kara mbovo varangekwa vendi. ³⁷ Oghu ahoro vashe ndi vawina kupitakana ame kapi a ngwapera; oghu ahoro monendi wamukafumu ndi monendi wamukadona kupitakana ame kapi angwapera ame. ³⁸ Oghu adirango kudamuna shilivindakano shendi nakunkwama me kunyima kapi a ngwapwra me. ³⁹ Kehe ghuno wakuruvha liparu lyendi ngali kombanita. Ano ngoli wakulikombanita liparu lyendi morwa rwande ngali wana.

⁴⁰ "Oghu a mutamburango nwe kuntambura me, ntani oghu a tamburango me nka kutambura oghu a ntumo me. ⁴¹ Oghu a tamburango muporofete mulidina lyamuporofete ngakawna ndjapo yamuporofete, ntani oghu a tamburango mukafumu wamuhungami mulidina lyamukafumu wamuhungami ngakawana ndjapo yamukafumu wamuhungami. ⁴² Kehe ghuno wakutapa kwaghumwe wavano vavadidi namoiri nkinda yamema ghamatenda a nwe mulidina lyamurongwa, vyashiri na kumutantera nwe, uye kapi ngakara nandjira mukukombanita ndjapo yendi."