¹ Noah jang boni basathu khe Madai hamthai riba, ode thiba, "Yerphalangthing bangdaophalangthing ode phirthima ha gablaitharthing. ² Phirthima ha hang gnang dongyaba birbaiyaba dao buthu, hahmang ha daobaiyaba buthu dimlangt ha nah dongyaba buthu nisi khe nuhi khinthing. Khrip jadi khe nisine yaophatharkha. ³ Khrip maobaiyaba hang gnang buthu nisini khlaihi jimu jama. Khrip gakhrang buphang khe ang nisine ribalai, duha ang nisine khrip jadi khe yaophathardu. ⁴ Tikhabo hang dongdusi mogong khe daji- bede tikhade bising ha bithi dongkho. ⁵ Tikhabo nisini bithi, bithi ha nisini hang dongyaba, boni baslai ha ang sainphinma. Khrip buthu nihabo ang nangjaodu. Asaba subung jarni daphlung khe sthaire tikhade, bo sthaijaoyaba ni khlaihi, sthaiyaba ni basao ha ang bisar khlaima. ⁶ Sere subung sthaidu, bo subungbo sthaijaoma bede tikhade Madai jarni saogarilai jasosi marsi khe sangsaiba. ⁷ Ningde, yerdaophalangthing bangdaophalangthing, phirthima khonglang jang gablaithar." ⁸ Odehe, Noah ode bojang baosi basathu dongyarao jang Madai sasinlaiba, ⁹ "Ani khlaihi, nisi khna! Nisi jang ode nisi ni sahrikh surikh jang ¹⁰ ode khrip hang gnang ning jang dongphayarao, dao buthu jang, mih buthu jang, phirthima ha ning jang dongphayaraosi jang rung niprang baigobuyaraosi jang phirthima ha hang gnang dongbasi jang ang smai dangma. ¹¹ Odejang, hang gnang khe ang musini sainkhalibo di jang sdamyakha thihi smai dangdu. Phirthima khe sdammane musikhalibo diyungma denang niyakha." ¹² Madai thiba, "Khrip hang gnang ning jang baosi dongyaba ode khrip sahrikh surikh jang ang jang nini gejer ha smai dangyaba ni daogari ebo jama. ¹³ Ang jang habsao ni gejer ha smai dangyabani daogari jimi ha jengkhlong mander baigoma. ¹⁴ Phirthima ha ang jimi baigorikhaning, jimi ha jengkhlong mander nujaonang, ¹⁵ odehe ning jang ang jang ode khrip hang gnang jang smai dangyaba khe ang wainsophinlanang. Hang gnang khe musikhalibo diyungma jang sdamyakha. ¹⁶ Jimi ha jengkhlong mander baigoba khe ang nunang ode phirthima ha dongyaba khrip hang gnang jang Madai thaoglao ni khlaihi smai dangyaba khe wainsomane." ¹⁷ Odehe Madai, Noah khe thiba, "Phirthima ha dongyaba khrip hang gnang jang ang smai dangyaba ni daogari eboniing." ¹⁸ Rung niprang Noah ni basathu baigobuyarao jakha Shem, Ham ode Japheth. Ham jakha Kanaan ni bupha. ¹⁹ Ebo gthambo Noah ni basathu ode ebo gtham niprangniing mulug ha jonkhro gablaitharba. ²⁰ Noah jakha hahdam danghi jiyaba subung, bo barising dangba. ²¹ Bo ju lingba ode baola jaba. Bo noh ha langtha thuhi dongba. ²² Ode Ham, Kanaan ni bupha, bupha langtha thuhi dongba khe nuhiba ode boni buphlung jang bada khe thanghi sainthihiba. ²³ Odejang, Shem jang Japheth wadu lahi bonsi ni phagrong ha suguba, ode yahon gede langba ode bupha khe ri gainbriba. Bupha langtha jaba khe nuyamani khlaihi bonsi yahon gede naiphinba. ²⁴ Noah baola rabani yahon ha boni basa gididaothaoyaba sumu khusi dangba bo tharmailakha. ²⁵ Odejang, bo thiba, "Kanaan khe sahrithai ridu. Bo badathu ni lemng jamaithing." ²⁶ Bo ar thibakho, "Madai, Shem ni Madai, hamthai rithing ode Kanaan boni leng jathing. ²⁷ Japheth ni raji dedao dedao jathing, ode bo, Shem ni noyahm ha noh dangthing. Kanaan, boni leng jathing." ²⁸ Diyungma debani yahon ha Noah maithai jang rjatham maithaidan dongba. ²⁹ Khrip jang Noah rjasugu maithaidan maithai habsao ha dongba ode boni hayu jamba.