¹ Joseph khe Egypt ha labuba. Pharaoh ni subung gedeba Egyptsa Potiphar, Sonthurirao ni hoja, Ishmaelsarao niprang Joseph khe braisoba. ² Madai, Joseph jang dongphaba ode bo hamseniing gnang jaba. bo Egyptsarao ni gedeba ni noh ha dongba. ³ Bo jang baosi Madai dongphaba thihi boni bubra tharmaiba ode snadi khusi dangdu, Madai yaoblai mairidu. ⁴ Boni muh nojor ha, bo khasaojaokha. Potiphar niha bo khusi dangba. Joseph khe, Potiphar, boni noh khe naisoyah dengba boniha dongbasi naisotharmane bo khe dengba. ⁵ Boni noh khe naisomane Joseph khe dengba niprang, Joseph ni khlahi Egyptsa ni khrip jadi buthu khe Madai, hamthai jang gablairitharba. Potiphar ni noh ha dongyabasi ni basao ha ode hahdam habo hamthai jang gablaitharba. ⁶ Odejang, Joseph ni basao ha, Potiphar jamsi naisomane hodaitharba. Jar makham jiba khe garhi, bo musi bisar khlaima nangyakha. Joseph hamsining depha jupha ode majangbi. ⁷ Odejang, boni bubra ni nobrajikh, Joseph ni basao ha muhsa glaiba ode Joseph khe thiba, "Ang jang thupha." ⁸ Tikhabo bo, niyaba ode gedema ni nobrajikh khe thiba, "Noh ha ang snadi khusi dangdu dangya ani gedema, ani basao ha musi naisodaoya ode bo ani basao ha, naisomane jamsi hodaitharkha. ⁹ Angthane dedaohi ebo noh ha saosibo dongdaoyakha. Ning khe garhi ane khrip jadi hodaitharkha, bede tikhala ningla boni nobrajikhse. Ang bedehe Mdai ni basalai ha elai phap khusi dangphuma?" ¹⁰ Sainsibai sainsi bo, Joseph jang thuphamane singba tikhabo Joseph, bo jang thuphaya thihi niyaba. ¹¹ Sainsikhali Joseph noh ha khusi dangmane thangba. Okhalini ni basain ha noh ha subung saosibo giri. ¹² Masainjikh, bo khe ri ha remthaohi thiba, "Ang jang thupha." Bo jarni ri khe dangkhlaihi noh niprang khaihunlangba. ¹³ Jarni ri khe, boni yaoha dangkhlaihi khaihunlangba khe nuhi, ¹⁴ bo noh ni subung buthu khe longthimtharba ode thiba, "Naila, Potiphar labuyaba Hebrewsa jing khe laji phunukha. Bo, ang jang thuphamane khalihi aniha phaiba ode ang jirikhkhaoba. ¹⁵ Ang jirikhkhaohise, bo jarni ri khe dangkhlaihi khaihunlangba." ¹⁶ Boni nobra phaiyasi, Joseph ni ri khe, bo khriph ne phunuphalangba. ¹⁷ Bede bede jaba, bo sainthitharba, "Ning, jini ha labuyaba Hebrewsa, ang khe laji phunuba. ¹⁸ Ang nerkhaohi, jirikhkhaohise, bo jarni ri khe dangkhlaihi, khaihunlangba." ¹⁹ Boni nobrajikh, jathai jayaba grao khe nobra ne sainthiba, "Nini dangyahsa ang khe elai khlaiba." nobra khnahi hamsining thampsi baigokha. ²⁰ Potiphar, Joseph khe remhi, raja jang jebjaohi dongyarao jang baosi Joseph khe alongkho ha jebriba. Bo alongkho ha jebjaohi dongba. ²¹ Tikhabo Madai, Joseph jang baosi dongphaba ode gibi gibi donghi khadejaoba. Alongkho ni naisoyahbo boni basao ha, Madai khadema ririba. ²² Alongkho ha jephjaoyarao dongbasi khe naisomane khlaihi Joseph ne yaophatharba. Bonsi oraha snadi khusi dangdu, Joseph naisomani bubain jatharba. ²³ Alongkho naisoyah, jarni khusi ni habaha musi waimu nangma nangyakha bede tikhade Madai bojang dongphaba. Bo asaba khusi dangkhabo, khusi yaoblai maijaoba.