¹ Madai, Jakob khe thiba, "Baija, Bethel ha thang ode oraha dongtha. Nini bada Esau niprang ning khailangbaha ning jang nujaoyaba Madai ni khlaihi oraha hahbim salam." ² Odejang, Jakob, boni nokhor ni subungrao khe ode bo jang baosi dongphayarao khe thiba, "Nisi niha mlai ni madairao dongyaba khe lemkhla, jar khe gthar khlaipinla ode jarni rijem gainslaila. ³ Odehe jing maolanghi Bethel ha gakhulangnang. Madai ni khlaihi ang oraha Hahbim salamma, ang waimu nanghi dongba ha ang khe sere khadema rima ode ang asaba ha thangba ha ang jang sere dongphama?" ⁴ Odejang bonsi, bonsi niha bajini madai buthu jang bonsi ni khmaothai buthu khe Jakob ne yaophatharba. Shechem gba ha Oakphang dongyaba ha Jakob, bo buthu khe phiphba. ⁵ Bonsi daophalangba ha, sarebare ni thol buthu ni subungrao ni kha ha Madai khinthai riba odehe bo subung buthu Jakob ni basathu jang rikhphaya jaba. ⁶ Kanaan haphai ni Luz ha Jakob sophaiba. (Bo jakha Bethel), bo jang baosi boni subungraobo dongphaba. ⁷ Oraha bo habim salamba ode bo hahthan khe El Bethel thiba, bede tikhade, boni bada niprang bo khailangba ha, Madai oraha, bo jang nujaoba. ⁸ Rebekah ni sao naiyahjikh Deborah thiiba. Bethel ni Oakphang bakhla ha bo khe phiphba, ode bo hathn khe Allon Bakuth thiba. ⁹ Paddan Aram niprang Jakob phaipinba ni yahon ha, Madai bo jang nujaophinhi hamthai ribakho. ¹⁰ Madai bo khe thiba, "Nini bumude Jakob, tikhabo nini bumu khe Jakob thihi jirikhyakha. Nini bumude Israel jama." Odejang boni bumu khe Israel dengba. ¹¹ Madai, bo khe thiba, "Angde Gabara Madaise. Yerthing phaithing. Nini gede jahi raji baigoma, nini sahrikh surikh niprang rajarao baigoma. ¹² Ang, Abraham ne, Issac ne hahyam riyaba khe ang ninthane yaophadu. Ning thiibani yahon habo ang nini sahrikh surikh ne hahyam rimakho." ¹³ Bo jang sainlaiyaba hahthan niprang MKadai gakhulanglaba. ¹⁴ Madai, Jakob jang sainlaiyaba hahthan ha, Jakob mihthong gongsi gaiba. Oraha bo lingyaba yaosandi yaophaba ode boni basao ha tho lukhruba. ¹⁵ Madai, Jakob jang sainlaiyaba hahthan khe Jakob Bethel thihi bumu dengba. ¹⁶ Bethel niprang bonsi daophalangba. Ephrate niprang bonsi gjain dongba ha, Rachel niha nana hajaima jaba. Bo hamsiniing sajaoba. ¹⁷ Bo sajaosaiba ha, hojaijikh, bo khe thiba, "Dakhin, bede tikhade nini ha duha basa hajaima. ¹⁸ Bo thikhglikh thanglikh jaba ha, bo, boni basa ni bumu Ben-Oni dengba, tikhabo boni bupha Benjamin thiba. ¹⁹ Rachel ni hayu jamba ode Ephrate thangyaba lama ha bo khe phipba (Bo jakha Bethlehem). ²⁰ Boni mahngkhlung ha Jakob mihthong gaiba. Rachel ni mahngkhlung dinibo dongkho. ²¹ Israel daophalanghi niing dongba ode mih naiyaba nohju yahon ha, bo nohsa dangba. ²² Bo hahthan ha Israel dongba bubli ha Reuben, boni buphani khrangphajaoyaba nobrajikh Bilhah jang thuphalaiba, ode bo grao khe Israel khnaba. Jakob niha basathu jigin dongba. ²³ Leah jang boni basathu hajaiyarao jakha Jakob niha hajaijenyaba Reuben ode simeon, Levi, Judah, Issachar, ode Zebulun. ²⁴ Rachel jang boni ha hajaiyarao jakha Joseph jang Benjamin. ²⁵ Rachel ni dangyahjikh Bilhah jang hajaiyarao jakha Dan jang Naphtali. ²⁶ Leah ni dangyahjikh Zilpah ni basathu jakha Gad jang Asher. Ebo buthu khrip Jakob niha, Paddan Aram ha hajaiyarao. ²⁷ Abraham jang Issac donglangyaba kiriath Arba ni Mamre (Hebron) ha Isaac, Jakob ni bupha dongyaba ha Jakob phaiba. ²⁸ Isaac, maithai jang rjasi bisabri maithai habsao ha thahnghi dongba. ²⁹ Isaac ni singli jamsoba ode boni phagararao khraorao bojom jaba. Esau jang Jakob boni mahngathi khe phipba.