¹ Abram bisabri maithaiji soba ha, Madai, Abram jang nujaohi thiba, "Angde Gabara Madaise. Ani grao ha dong, gjai dadang. ² Odehe ang ning jang smai dangnang ode nini ha badamma yerphalangrinang." ³ Abram, boni ha gonglaiba ode Madai, bo jang sainlaihi thiba, ⁴ "Ani gede niprangde, ang ning jang smai dangdu. Ning raji badamma ni bupha jama. ⁵ Nini bumu dini niprang Abram jajang niyakha, nini bumu Abrahamse jasima - bede tikhade raji badamma ni bupha jamane ang ning khe songba. ⁶ Nini sahrikh surikh khe yerrima, ode nini niprang raji baigorima ode nini niprang rajarao baigoma ⁷ Ning jang, nini sahrikh surikhrao jang, jug jang gal jang thaoglao ni khlaihi ang smai dangma, Madai ning jang dongphama, nini sahrikh surikh ni yahon habo dongma. ⁸ Ode ning Kanaan raji ha dongba, ang nini khlaihi ode nisini sahrikh surikh ne thaoglao ni khlaihi hahyam rima ang bonsi ni Gabara jama." ⁹ Odehe Madai, Abraham khe thiba, "Ning, nini sahrikh surikhrao ar jug jang gal jang ani smai khe mthaoma nangma. ¹⁰ Ning jang ani smai khe ning ode nini sahrikh surikhrao ani ebo smai khe manima nangma ode khrip miyarao sao singli rajaoma nangma. ¹¹ Nisi bugur buju rajaomaniing nangma odehe eboniing ning jang ani smai jama. ¹² Nisini bising ha jug jang gal jang nana mihya, basain jang sainjaiyaba sao singli rajaomaniing nangma. Nini nokhor ha haijaiyaba ode nini sahrikh surikh niyayaba, gibin raji ni khe rang jang braijaoyarao khe sao singli rapha. ¹³ Nini nokhor ha hajaiyaba jathing rang jang braiyaba jathing, sao singli rama niing nangma. Ode ani smai nisi ni saomang ha thaoglao ni smai janang. ¹⁴ Sere subung sao singli rajaoyahi dongdu bo subung boni jadi niprang negarjaoma. Bo subungde ani smai khe maniyabase." ¹⁵ Madai, Abraham khe thiba, " Nini nobrajikh Sarai ni khlaihi, bo khe Sarai thihi dajirikhsi. Boni bumu duha niprangde Sarahse jasima. ¹⁶ Ang bonthane hamthai jang gablairima, ode boni gede jahi ang ninthane basa rima. Ang bonthane hamthai rima ode bo khrip raji ni buma jama. Boni gede rajarao hajaima." ¹⁷ Boni yahon ha Abraham gonglaihi miniba ode khaha elai thiba, "Maithai jang rjasiyaba niha ansarao hajainangkho na? Maithai jang bisabri maithaijiyaba Sarah bede basa maimakho?" ¹⁸ Abraham, Madai khe thiba, "Ishamail, niniha thanghi dongthing." ¹⁹ Madai thiba, "Niya, tikhabo nobrajikh Sarah nana basa mainang ode boni bumu khe ning Isaac dengma. Bojang ode boni sahrikh surikh jang ang thaoglao ni smai dangma. ²⁰ Nisi Ishmael ni khlaihi khainsuyaba khebo khnakha. Ang bonthane hamthai rikha ode boni ha sahrikh surikh khe badamma yerrima ode bangdao bangdao japhalangma. Bo rajarao jigin ni bupha jama ode ang boni raji khe gede salamma. ²¹ Tikhabo phaiginyaba maithai ni thik ebo bubli ha Sarah niha hajaiginyaba jangse angde ani smai khe dangma. ²² Bo, bo jang sainlaiblaiba ni yahon ha, Madai, Abraham niprang gakhulangba. ²³ Boni yahon ha Abraham jarni basa Ishmail khe, boni nokhor ha hajaiyaraosi khe ode rang jang braiyaraosi khe, Abraham niha miyarao hajaiyarao khe Madai sanibalai bo basain ha sao singli rajaoyaraosi khe langhi thangba. ²⁴ Abraham sao singli rajaoba bubli ha, bo maithai jang bisabri maithaijisgu maithai jahi dongba. ²⁵ Ishmail, sao singli rajaoba bubli ha, bo maithai jang maithaijitham maithai jahi dongba. ²⁶ Bo basain sainsi haniing Abraham jang boni basa Ishmail sao singli rajaoba. ²⁷ Boni nokhor ni miyarao dongbasi, boni noh ha hajairaosi, ode rang jang braijaoyarao khripbo sao singli rajaotharba.