¹ Habsao ha khripbo graothai thaisi khe seniing sainlaiba. ² Sainja gede bonsi daophalanghi bonsi Shinar haphai ni hawar haphlai ha donghiba. ³ Bonsi saosi jang saosi sainlailaiba, "Phai, jing Itha salamnang, hamsisi khlaihi saonang." Longthai khe yawaiyahi bonsi Itha khe yawaiba ode tar atha yawaiba. ⁴ Bonsi thiba, "Phai, jing jarniing thol salamnang ode nokhasao dophasi nohju dangnang ode jing jarni bumu kheniing dengnang. Jing elai khlaiya tikhade phirthima grongbri ha jing dra dri jatharmase." ⁵ Adam ni sahrikh surikhrao thol dangyaba khe naimane Madai akhaibuba. ⁶ Madai thiba, "Nai, ebo subung buthu jadisi gajase ode graothai thaisi kheniing sainlaibase ode bonsi elai khusi dangba jenkha! Kheisa yahon hade bonsi musi khusi khebo dangphuyahi thaonang niya. ⁷ Phai, jing bakhla ha thangnang ode bonsi khe saosi jang saosi grao khmao haphranglairiyanang." ⁸ Odejang, Madai, bonsi khe mulug grongbri ha dradri khlaitharba ode bonsi nohju dangba thaoba. ⁹ Odebani darajang, boni bumu khe Babel dengba bede tikhade habsao ni khrip graothai khe khmao haphranglairiyaba ode mulug grongbri ha bonsi khe dradri khlaitharba. ¹⁰ Ebo buthuniing Shem ni sahrikh surikhrao. Diyungma debani maithaigin yahon ha, Shem, maithai jang rjasi soba ha, bo Arphaxad ni bupha jaba. ¹¹ Shem, Arphaxad ni bupha jaba ni yahon ha bo maithai jang rjabowa maithai habsao ha dongba. Boni ha ar gibin gibin basa bisikh hajaibakho. ¹² Arphaxad, maithaithimji maithai bowa soba ha, bo Shelah ni bupha jaba. ¹³ Arphaxad, Shelah ni bupha jaba ni yahon ha bo, rjabri maithaitham dongba. Boni ha ar basa bisikh hajaibakho. ¹⁴ Shelah, maithaithimji soba ha, bo, Eber ni bupha jaba. ¹⁵ Eber ni bupha jabani yahon ha, Shelah rjabri maithaitham habsao ha dongba. Boni ha ar basa bisikh hajaibakho. ¹⁶ Eber, maithaithimji maithaibri sobaha, bo, Pheleg ni bupha jaba. ¹⁷ Pheleg hajaiba ni yahon ha Eber rjabri maithaithimji habsao ha dongba. Boni ha ar basa bisikh hajaibakho. ¹⁸ Pheleg, maithaithimji soba ha, bo, Reu ni bupha jaba. ¹⁹ Reu hajaibani yahon ha, Pheleg rjagin maithaisugu dongba. Boni ha ar basa bisikh hajaibakho. ²⁰ Reu, maithaithimji maithaigin soba ha, bo, Serug ni bupha jaba. ²¹ Serug ni bupha jabani yahon ha, Reu rjagin maithaisni dongba. Boni ha ar basa bisikh hajaibakho. ²² Serug, maithaithimji maithai soba ha, bo, Nahor ni bupha jaba. ²³ Nahor ni bupha jabani yahon ha, Serug rjagin maithai dongba. Boni ha basa bisikh hajaibakho. ²⁴ Nahor, maithakhonsugu maithai soba ha, bo, Terah ni bupha jaba. ²⁵ Tera ni bupha jaba ni yahon ha, Nahor rjasi maithaijisgu dongba. Boni ha ar basa bisikh hajaibakho. ²⁶ Terah, bisatham maithaiji dongbani yahon ha, bo, Abram, Nahor ode Haran ni bupha jabakho. ²⁷ ebo buthuniing Terah ni sahrikh surikhrao. Terah, Abram, Nahor ode Haran ni bupha jaba, ode Haran, Lot ni bupha jaba. ²⁸ Haran ni bupha Terah hajaiyaba Chaldean ni ur ha bupha ni rogong ha Haran thiiba. ²⁹ Abram jang ode Nahor nobrajikh labuba. Abram ni nobrajikh ni bumu Sarai, ode Nahor ni nobrajikh ni bumu Milkah, Haran ni bisikh, Milkah jang Iskah ni bupha. ³⁰ Sarai, saglangma jahi dongba, ansarao maiya. ³¹ Terah, jarni basa Abram khe, Lot jarni basa Haran ode Sarai boni bahamjikh, basani nobrajikh khe langhi Chaldean ni Ur niprang Kanaan rajiha thangba. Tikhabo bonsi Haran ha phaihi, oraha dongba. ³² Terah, khrip jang rjagin maithai bowa habsao ha dongba ode Haran ha hayu jamba.