¹ Jenjenbaha Madai, nokhasao buthu jang phirthima khe sangsaiba. ² Phirthima khongja dongba, di guthuyaba basao ha andar jahi dongba ode odehe Madai ni bese di basao ha glangbaihi dongba. ³ Madai thiba, "Dei jdanmah baigothing," ⁴ odehe jdanmah baigoba. Jdanmah khe nuhi, Madai hamjaokha. Andar niprang jdanmah khe, bo gibin khlaikha. ⁵ Jdanmah khe Madai "sain" thikha. ode andar khe "hor" thikha. Odehe sahri jakha ode phorong jakha, sainsiba. ⁶ Madai thiba, "Dei di jang di gejer ha hatho baigothing ode di jang di gibin gibin saikhaothing." ⁷ Madai di jang di khe hatho salamba odehe hatho ni basaohabo di ode hatho ni bakhla habo di gibin gibin khlaiba. ⁸ Hatho khe Madai "nokhasao" thikha. Sahri jakha ode phorong jakha, sainginba. ⁹ Madai thiba, "Dei nokhasao ha di dongyaba buthu gathaisi ha bojom jathing ode hahkhong baigothing." Olainiing jaba. ¹⁰ Hahkhong khe Madai "phirthima" di gathisi ha bojom jahi dongyaba khe "dimlang" thiba. Ebo buthu khe nuhi bo hamjaokha. ¹¹ Madai thiba, "Phirthima ha samlai bonglai baigothing: bogrong gnang buphang, khrip jadi bthai bising ha bogrong gnang thaiyaba buphang baigothing.' Olainiing jaba. ¹² Phirthima ha samlai bonglai baigoba, bogrong gnang buphang, bthai bising ha bogrong gnang buphang khrip jadi baigoba. Ebo buthu khe nuhi Madai khajaba. ¹³ Odehe sahri jaba phorong jaba, sainthamba. ¹⁴ Madai thiba, "Hor jang sain khe gibin khlaimane dei nokhasao ha jdanmah baigothing ode bothor, basain ode maithai khe mithirithing. ¹⁵ Phirthima ha jdangmane nokhasao ha jdanmah baigothing." Olainiimng jaba. ¹⁶ Madai, jdangmah magin gede gede sangsaibaba, dedaoyaba jdanmah khe sain ha jdanrimane ode khasedaoyaba jdanmah khe hor ha jdanrimahne. Madai sathrai buthu khebo sangsaiba. ¹⁷ Phirthjima ha jdanrimane Madai, bo jdanmah khe nokhasao ha dengba, ¹⁸ sain ha jnarimane, hor ha jnarimane andar niprang jdanmah khe saikhaoba. Madai nuhi khajaba. ¹⁹ Odehe sahri jaba phorong jaba, sainbriba. ²⁰ Madai thiba, "Dei di bising ha hang gnang badamma baigothing ode phirthima basao nokhasao ha dao buthu birbaithing. ²¹ Madai, dimlang ha hang gnang gede gede khrip jadi sangsaiba, hang gnang maobaiyaba khrip di buthu ha gablaitharba ode khrip jadi dao buthu bagrang gnang sangsaitharba. Ebo buthu khe nuhi Madai khajaba. ²² Madai, bonsine hamthai rihi thiba, "Yerdaophalangthing ode bangdaophalangthing ode di ha gablaithar. Phirthima ha dao buthu bangdaophalangthing." ²³ Ode sahri jakha phorong jakha, sainbowaba. ²⁴ Madai thiba, "Phirthima ha hang gnang khrip jadi buthu baigothing, khrangjaoyaba mih, musu burun, hagrani mih buthu khrip jadi baigothing." Olainiing baigoba. ²⁵ Hagra ni khrip mih buthu khe Madai sangsaiba, khrangjaoyaba mih buthu khebo sangsaiba odehe khrip basa basa mih buthu khe sangsaiba. Ebo buthu khe Madai nuhi khajaba. ²⁶ Madai thiba, "Dei jing jarni saogarilai jasosi marsi khe sangsainang. Dimlang ni nah buthu ni basao ha bonsi yawaithing, nokhasao ha birbaiyaba dao buthu, mih buthu, phirthima khonglang jang, ode phirthima ha hembaiyaba sorbaiyaba khrip jadi ni basao ha yawaithing. ²⁷ Madai jarni saogarilai jasosi marsi khe sangsaiba. Jarni saogarilai jasosi bo khe sangsaiba. Miya masainjikh khe bo sangsaiba. ²⁸ Madai, bonsi ne hamthai rihi bonsi khe thiba, "Yerdaophalangthing bangdaophalangthing. Phirthima ha gablaithar, khrip jadi khe yawaithar. Dimlang ni nah buthu khe bubra jala, nokhasao ni dao buthu khe, ode phirthima ha khrip jadi hang gnang buthu khe bubra jala." ²⁹ Madai thiba, "Phirthima ha khrip jangniing bthai thaiyaba bnuphang, ode bogrong gnang bthai thaiyaba buphang buthu khe ang nisine rikha. Bo buthu nisini khlaihi jimu jama. ³⁰ Phirthima ni khrip mih buthu, nokhasao ni khrip dao buthu ode hahkhong ha hembaiyaba mih buthu ode khrip hang gnang, ode khrip balai gakhrang buphang buthu khe ang nisine jimu ni khlaihi ritharkha." Olainiing jaba. ³¹ Madai jar sangsaiyaba khrip jadi khe naitharkha. Naisang, hamsining hamkha. Ode sahri jakha phorong jakha, saindoba.