50
1
Mah ten Josep in a pai mitmai a zoh tenn kap thah nam thah in um hi.
2
A pai luang cu ngimnam tui tuah bawl tuk in a sila si thiam te thu a piak hang, a mun ngimnam tui bawl haw hi.
3
Ngimnam tui tuah bawl mi a luang cu dan a neih mi bang ni sawmli val tian Izip miphun ten Jakop hang, ni sawm salih sung kap in um haw hi.
4
A kahnak ni a luan hang Josep cu kumpi innsung um mihing hekkhat te sam in, nohten keimah hehpih nak thinlung na nei uh tale Pharaoh kumpi pai nelah hawh in,
5
Kapa in kei cu thi awn zo ing hi. Kanaan ngam sungah kei ma ca tuk ka cawh awng mi khan sungah kei mah phum tuk uh ci tin keimah cu thukam zo ing. Mah hang, kei cu hawh in kapa phum cengten, hun lehnak tuk thu hehpih nak ngen un hitin, ti hi.
6
Pharaoh kumpi in na pai thukam mi bang hawh in phum in hitin, thupia hi.
7
Josep in a pa cu phum tuk a hawh tul ten Pharaoh kumpi sila te cu kumpi umnak uktu, Izip ngam uktu hempoh te le,
8
Josep inn sungsang, a U tei innsung sang, a pai innsung sang hempoh ten zui haw. Naupang te le tuu, khui te bek cu Goshen ngam sungah zam haw hi.
9
Mah tihcun leng te, cipuh khung ngal hang mihing tampi ten Josep cu zui haw.
10
Jodan nguntui pi bulah Atad cangcil nak a hen haw ten nasezet kahnak cu bawl leh leu haw hi. Josep cu a pai hang ni salih sung kap hi.
11
Mah tihcun Atad cangcil nak mun pen bawl mi kahnak cu mah ngam sung mi Kanaan miphun ten a muhten, Izip miphun te nasezet kap haw hitin, ti haw hi. Mah hang, Jodan nguntui pi bulah a um mi umnak mun cu Abel-mizraim tin sam haw hi.
12
Jakop caten a pai thu cahnak bang bawl haw hi.
13
Kanaan ngam ah pua in Abraham a ma neih mi khanmual tuk Hit miphun Ephron nelah lei mi Mamre khuapi mai, Mach-pelah lo sungah a um mi leikua sungah phum haw.
14
Josep in a pa a phum cengten a U te pen pan mithi phum in a zui tu hempoh te tuah Izip ngam ah pin leh haw hi.
A U ten Josep amahkhan nak a piak mi
15
Josep a U ten a pai thih a muh ten ohte cu Josep in hua bel tuk hi. Ohten a mah cu bawlsiat nak a neih zo uh hang, ohte cu a thungai in bawlsiat leh tuk hitin launak tuah,
16
A ma nelah nungzui tu pakhat cu hah in topai U ten phat ngawlnak thu, topa cu a bawl khak haw zo hang,
17
Topa sualnak bawl cu ngaidam in hitin topa nelah nget tuk thu a pai thih laih ngawl in kei muhte thucah nak a neih zo hang, a tuin topa kohtei sualnak luat tik in hitin ngen haw hi. Mah tihcun a nget haw hang, Josep cu a mit hitui luang hi.
18
A U te vang lut tum in Josep mai ah bopkhup in kohte cu topai sila ung hitin, ti haw hi.
19
Josep in lau pah sun. Kei cu Pathian ai awh tu hi ing maw.
20
Nohten kei mah bawlsiat tuk in ngaisung ta vang, Pathian cu tuni tian a hihnak bang in mihing tei nunnak luat tik tuk in a hehpih phat nak ngaisung hi.
21
Mah hang lau pah sun. Nang muhte le naupang te kei man cawm tung hitin tiin, a muhte cu nem in itnak awnkam tuah hilh hi.
Josep thihnak
22
Mah tihcun Josep in a pai miphun te tuah Izip ngam ah um in a kum za le sawm kim hi.
23
Ephraim in tu mu hi. Manasseh ca Machir canu te a khuk hum pen cawm hi.
24
Josep in kei cu thi tuk toh ing. A thungai in Pathian in nang muhte zo in heng suk tuk hi. Abraham, Isak, Jakop te a thukam nak ngam ah hi ngam pen pui tung hitin, a U tei lakah ti hi.
25
Mah cengten, a thungai Pathian in nohte cu zo in heng suk tung hitin, ti hi. Ka nguh te cu hi ngam pen la tuk in Isarel miphun te thukam pia tik hi.
26
Mah tihcun Josep in a kum za le sawm a kim ten thi hi. A luang cu ngimnam tui tuah a bawl cengten Izip ngam sungah koih haw hi.