37

1 Jakop cu a pai camnak Kanaan ngam ah um hi.

2 Jakop miphun tu le canawn te cu Josep in a kum hei salih a kim ten a U te tuah tuu, kel khal hi. A pai nupi Bilhah le Zilpah te tuah um in, a muhtei sualnak cu a pai nelah son thei hi.
3 Isarel cu a kumham ten capa Josep a neih hang, a dang a cate hempoh sang in Josep cu it saw hi. A zawng a dang cuang mi angki khui sak in pia hi.
4 A pa in a ca hempoh sungpen Josep cu it saw hi tih cu a U hempoh in a theih ten, a mah cu hua in itnak awnkam tuah otpih thei haw ma hi.

5 Josep in mangman in a U tei lakah a hilh leh ten a mun hua dedeuh haw.
6 A mang cu itihbang in hilh hum titale mang ka mat mi cu ngai ten un.
7 Eimuhtei a laizang ah cangtel ken in um laihtak keima cangtel cu ding in a um ten, nangmuhtei cangtel cu ding in keima cangtel cu a kiim in bia haw hitin, son hi.
8 A U hempoh, nang cu kohtei sungah kumpi dektuk cim maw, kohte uktuk cim maw tin a tihten a mang le a ma awnkam hang hua de deuh haw hi.
9 Mahcengten mangman leh leu in a U hempoh lakah a dang mang mu leh leu ing hi. Ni, hade, aksi sawmkhat ten keimah cu bia haw hitin son leh leu hi.
10 Mahtihcun a pa le a U hempoh lakah a son ten a pa in na muh mi mang cu itihbang hum? Keimah le na nu, na U hempoh nangma nelah hung in a thungai in lukun tuk maw tin, a mah cu thuhilh hi.
11 A U hempoh a mah cu sonsia haw hi. A pa in mahmi thu cu sialsiah hi.
A U hempoh Josep a zuaknak

12 A U ten a pai tuu, kel te Shechem khuapi lam ah khaltuk in hawh haw hi.
13 Isarel in Josep sam in na U te cu tuu, kel te Shechem khuapi lam ah khal haw ma maw. Hung in. Nangmah cu a muhtei umnak lamah hawhtik tung hitin a sam ten keimah um hitin a tihten,
14 A pa in hawh ten hi. Na U te dam le dam ngawl tuu, kel te vang phat zet no um haw maw tih zo ten na keimah thu thei leh tik in hitin Hebron umnak munlawn pen hawhtik in a mah cu Shechem khua ah heng hi.
15 Lo sungah vakkawkawi in a um laihtak mihing pakhat cu tawk in a man nang i zei kam tin a dotten,
16 Ka U te zei ing. I laimun ah khal haw hum tin a dotten,
17 A man, hi laimun pen tul haw zo hi. Dothan khua ah hawh nung tin a son lih haw mi cu za ing hitin, ti hi. Josep in a U te zei in Dothan khuapi pen tawk hi.

18 A bulah a hen laihngawl khuala pi a um laih hei in a U ten a muhten that tuk siam khawm in,
19 Zo un. Mangman muhnak saza pa heng zo hi.
20 Man un. A mah cu that in khuk pakhat sungah vawk tuk hung hi. A ngilo sahang pakhat in man zo hitin, son tuk hung hi. Mahtin a bawl uh tale a mang te cu itihbang tuk hum tih cu zo tuk hung hitin, pakhat le pakhat son li haw hi.
21 Mahmi awnkam cu Reuben a zakten a mah cu that tuk ma hung hitin a tihten a muhtei khut sungpen Josep cu dok hi.
22 Mahcengten Reuben in a thisan luang tik pah sun. Na khut tuah bawl ngawl in ngamlak khuksungah vawk un hitin a muhtei khut pen dok in, a pai lakah veikhat ap leh tuk hung hitin ngaihsutnak tuah in ti hi.
23 Josep cu a U tei lakah a henten a silh mi angki, a zawng a dang cuang mi angki cu a duhsak haw cengten,
24 A mah cu man in khuksungah vawk haw. Mahmi khuksung ahcun tui um ma hi. A kang mi tuikhuk hi.

25 Mahcengten an ei tuk in a khunkhawm laihtak khua cuan in Ismael miphun tei hulophkhawmnak cu Gilead ngam pen heng in catei namkim myrrh, balm te kalauk humah koih in Izip ngam ah khualzin mite a muhten,
26 Judah in ohten a nau cu that in a thihnak thu sel tale i nem cuamnak um hum?
27 Man in le that ngawl in Ismael miphun tei lakah zuak tuk hung. A mah cu ohtei nau, ohtei miphun hitin a U tei lakah a son ten a U hempoh lungkim haw hi.
28 Mahcengten Midian miphun sum bawl te khualzin a um laihtak haw in, a U hempoh Josep cu khuksung pen doktul leh in sum kul man tuah Ismael miphun sum bawl tei lakah zuak in a mun Josep cu Izip ngam ah hawhpih haw ta hi.

29 Reuben in khuksungah tolh in khuksungah Josep um mazo hi tih a muhten a ma angki cu bot kek in,
30 A Unau tei umnak ah hawh in ka nau um ma zo hi. Kei cu itihbang in hawhtuk hing ngim tin, ti hi.
31 A mun Josep angki cu lain kelno a thah cengten angki cu kel thi sung ahcun nim haw hi.
32 Mahcengten a zawng a dang cuang mi angki cu a piak hang a hekkhat te cu a pai nelah keng in, hi angki te mu zo ung hi. Capa angki le angki ngawl cu zo in hitin a tihten,
33 A angki cu a pan a sialsiah hang, ka capa angki cu a man mi hi. A mah cu a ngilo mi sahang in man zo hi. A thungai in Josep cu a tum a tang pet in ei zo hitin tiin,
34 A silh mi puan cu bot kek thangkhau puan silh in ni tampi a capa hang, thinnop ngawl in kap hi.
35 Canu le capa hempoh a pa cu nem tukin zuam haw naven, a man nepnak awnkam thu cu ngai ngawl in ka capa umnak thihnak ngam ah a thinnop ngawl kap in tolhsuktuk toh ing hitin, ti hi. Mahtihcun Josep cu a pa in a capa hang kap hi.
36 Josep cu Midian miphun ten Izip ngam ah hawhpih in Pharoah kumpi cingtu Potiphar nelah zuak haw hi.
Judah le Tamar