19
1
Vancung mi panih cu zan hun ten Sadom khuapi ah heng hi. Lot cu khuapi kongka bulah khung in a muhte a muhten, khual muak tuk ding lei ah a lukun in,
2
Ka Topa aw, na sila inn ah tum in zan khua um un. Ke som un. Zingtung khua ma no tho in hawh un hitin, ti hi. Vancung miten kohten lut tum ngawl in, zan khua lamzin ah um tuk ung hitin a tih ten,
3
A muhte nasezet a bawl siatnak hang, Lot umnak ah kik leh in a ma inn ah lut tum haw hi. Lot in, a mu ca tuk puai bawl in naman sawh ngawl moh em cengten a mun ei haw hi.
4
A mun a hihbuh laih ngawl Sadom khuapi pano a ngeng a neu mun tih kim pen a heng mi hempoh ten a inn cu kil in,
5
Lot cu sam in tu ni tak na innsung ah a lut tum mite ilai ah um hum? A muhte le kei muhte pawldun nuam hang, kei muhtei lakah suak tul tik in hitin, ti haw hi.
6
Lot in kongka pawlam a muhtei lakah tul in a nunglam kongka pi cu a khah cengten,
7
U le nau te aw, sualnak hitihzah tian in bawl pah sun.
8
Kei man pano tuah pawldun nak a nei laih ngawl mi canu panih nei ing. A muhte cu nang muhtei umnak ah suah tul tukin phalnak pia un. A muhte cu na bawl nuam zah in bawl un. Hi mihing te cu bawl hihim pah sun. Itahum titale a mun ka inn bel in um hitin hehpih a nget ten,
9
A mun, nungkik in hitin ti haw hi. Mah cengten nang cu a cam tuk bek heng in thukhen bawl tuk cim maw. A tuin a muhte na bawl tuk sang nang man a sia saw mi sualnak bawl tuk cim tin a tih ten, Lot cu nasezet nem in kongka pi vang subal in heng haw hi.
10
Mah cengten vancung miten a khut dang in, Lot cu a muhtei umnak inn sungah a dawh tum cengten kongka cu khak haw.
11
Inn kongka bul ah a um a ngeng a neu te mitcaw tik tuk dantat nak a bawl hang, a mun kongka cu zei in thinkham in um haw hi.
12
Vancung miten hi umnak sungah nangmah tuah a seng mi um laih maw. Canu le capa, maakpa, khuapi ah a um mi hempoh hi lai munpen suah tul in.
13
Hi khua cu siatsuah tuk toh ung hi. Itahum titale khuasung miten Pathian mai ah nasezet aunak thawm hang, siatsuah tuk in kei muhte Pathian in hah zo hitin, Lot nel ah hilh hi.
14
Lot cu suak tul in a canu tei pasal, a mak te cu tho un. Hi lai umnak mun pen suak tul un. Hi khuapi cu Pathian in siatsuah tuk hitin a tih ten, cekpan bawl hitin a mak ten ngaisung haw hi.
15
Zing khua vak ten vancung miten Lot cu sosuah in, nang cu ding in hi umnak ah a um mi na nupi le canu panih te keng in. Mah ahima tale khuapi sualnak sungah siatnak heng haw tuk hitin a tihten,
16
Lot in a kham ten Pathian hehpih nak hang vancung miten a mah le a nupi, a canu panih te a khut pen kai in khuapi pawlam ah dok tul haw hi.
17
A pawlam ah a hen ten nang cu nunnak co tuk in tai in hi. Nunglam zo in hek kik pah sin. Mun lawn umnak ah um pah sin. Mual hum ah tai in. Mah a hima tale thi tuk ci tin, ti hi.
18
Lot in, ka Topa aw mah tin tih pah sin.
19
A tuin Topai sila cu na mai ah mitmai ngah zo ing. Ka nunnak na piak hang ka nelah na bawl mi lainat nak tampi hi. Haksat nak pen luat in mual hum ah tai thei mang hi. Haksat nak pakhat tawk in thih tuk cu lau ing.
20
Zo in. Mahmi khuapi cu nai hi. Tai tuk zuam poh hi. Khuapi cu neu poh hi. Haksat nak pen luat in mah lai munah tai tik poh in. Mahmi khuapi cu neu no poh ma maw. Mah tihbang tai tacun nung tuk hitin, ti hi.
21
A man zo in. Hi thu sungah na awnkam cu kei man ngai tuk in mahmi khuapi ca in na kut hang kei man siatsuah mang hi.
22
Haksat nak pen luat tuk in mahmi khuapi ah a man lang tai in. Mah khuapi na hen laih ngawl in, kei man imah thu bawl tuk mang hitin, ti hi. Mah hang, mahmi khuapi cu Zoar khuapi tin sam haw hi.
23
Lot cu Zoar khuapi sungah a luh tum ten leihum ah ni suak zo hi.
24
Mah cengten Pathian in vanhum a ma nel pen Sadom khuapi le Komorrah khuapi hum ah kat mei nguah zu tik hi.
25
Mah khuapi te hei hihen, munlawn hempoh hei hihen, khuapi sung mi hempoh te hei hihen, leihum pen a po mi hempoh te hei hihen siatsuah khawng hi.
26
Lot hi nupi cu a nunglam a hek kik hang cikhuam in cang hi.
27
Zingtung no Abraham cu tho in Pathian mai ah a ding tu umnak ah a hawh ten,
28
Sadom le Komorrah khuapi, munlawn hempoh a zo ten meikam pen meikhu bang, a ngam sung hempoh meikhu kai cu mu hi.
29
Mah tihcun Pathian in munlawn ah a um mi khuapi cu a siatsuah ten Abraham cu ngaisung hi. Lot umnak khuapi a siatsuah ten, siatsuah nak sung pen Lot cu luat hi.
Lot le a canu te
30
Lot cu Zoar khuapi pen tul in canu panih tuah mual hum ah um hi. Zoar khuapi sungah um ngawl in, canu panih te tuah kuahol sungah um hi.
31
Canu U pa saw in, ohtei pa tek zo hi. Leihum hempoh tei bawl mi bang, ohtei lakah a heng tum tuk mi pano pakhat no hei leihum ah um ma hi.
32
Hung in. Ohtei pa cu cabit tui pia tuk hung. Ohtei pai miphun cingkem tuk in a mah tuah zau tuk hung hitin, a nau nui lakah son hi.
33
Mahmi ni a zan ten a canu U pa saw cu lut tum in a pa tuah zau hi. A mah cu zau hi tih hei hihen, tho leh hi tih hei hihen, a pa in thei ma hi.
34
Zinglam ten a canu U pa saw in zantak ka pai lakah zau ing hi. Tu ni tak a mah cu cabit in leh tik tuk hung. Nangmah cu lut tum in a pai miphun cingkem tuk in a mah tuah zau in hitin, a nau nu cu hilh hi.
35
Mah ni tak cu a mun a pa cu cabit tui pia in a nau nu cu lut tum tik in a pa tuah zau tik hi. A zau lam hei hihen, a thawh leh lam hei hihen a pan thei ma hi.
36
Mah tihcun Lot canu panih ten nau pai hi.
37
A canu U pa saw in nau hing in Moab tin sa hi. A mah cu tu ni tian Moab miphun tei pa hi.
38
A canu nau ta saw in capa hing in Benamim tin a min sa hi. A mah cu tu ni tian a um mi Amon miphun teipa in cang hi.
Abimalek thuhilh nak a thuak tu Abraham