1

¹ A pat penpan Pathian in van le lei bawl hi.

² Leipi cu a mel neingawl a hawm hol pi in um hi. A thukzet khua thim pi in a khuh hang, Pathian Hawvang cu tuipi hum ah phia hi.

³ Pathian in vaknak cu um hen hitin thu a piak ten vaknak um hi.

⁴ Mahmi vaknak pha hitin a muh hang, vaknak le khuathim cu khen hi.

⁵ Vaknak cu sun tih hei in hihen, khuathim cu zan tih hei in a sam hang zanlam le zinglam huncan cu ni khatnak hi.

⁶ Mahcengten Pathian in tuipi a pen vanhum hei hihen, tuipi le tui cu a dang in um hen hitin, thupia hi.

⁷ Vanhum cu Pathian in a bawl ten vanhum nuai ah a um mi tui le vanhum a sungah a um mi tui cu a khennak bang um hi.

⁸ Vanhum tih hei in Pathian in a sam hang, zanlam le zinglam huncan cu ni nihnak hi.

⁹ Mahcengten Pathian in, vanhum nuai ah a um mi tui cu hulawm tuk in hihen, mualhum cu um hen hitin thu a piak bang um hi.

¹⁰ Mualhum cu leipi tin sam in, tuipi hullawmkhawm cu tuipi tin min tuah samnak in hihen, Pathian samnak a hihhang a bawl mi na cu pha hitin, Pathian in mu hi.

¹¹ Mahcengten Pathian in, lei cu hampa kung hei hihen, ancang a piang tik thei mi cangkung te hei hihen, leihumi ah anci cang um in thingngah a piangtik thei mi thingkung hei hihen, po hen hitin thu a piaknak bang in um hi.

¹² Lei cu hampa kung hei hihen, ancang a piang tik thei mi cangkung hei hihen, a sungah anci um in thingngah a piang tik thei mi thingkung hei hihen po tik hi.

¹³ Pathian in a bawl mi cu pha hitin a muh hang zanlam le zinglam huancan cu ni thumnak hi.

¹⁴ Mahcengten Pathian in, sun le zan cu khentik tuk in vanhum sungah vaknak inn um hen, a tek mi khua huancan ni khennak, kum khennak in cangtik hi.

¹⁵ Vanhum sungah um in leipi vaktik tuk in vaknak inn cu um hen hitin thu a piak bang um hi.

¹⁶ Mahtihbang Pathian in vaknak innpi panih cu sun uktu tuk in a ngeng pakhat, zanhun uktu tuk in a neu pakhat tuah aksi te a bawl cengten,

¹⁷ Leipi sungah vaktik tuk in hihen, sun le zan uk in vaknak le khua thim cu khentik tuk in hihen,

¹⁸ Vanhum sungah Pathian in koih hi. A bawl mi na cu pha hitin a muh hang,

¹⁹ Zanlam le zinglam huncan cu ni linak hi.

²⁰ Mahcengten Pathian in, a nung in a phia thei mi ngamsa te tui sungah tampi keuh tik hi. Vano te vang leihumi, vanhum ah leng hen hitin, a thupiak mi um hi.

²¹ Mahtihcun tui in ngamsa namkim te a keuh hang, ngasa ngengpi tihmi a nung in a phia thei mi ngamsa hempoh hei hihen, a leng thei mi vano namkim hei hihen, Pathian in a bawl hang a bawl mi na cu pha hitin, mu hi.

²² Pathian in tampi pung ta un. Tuipi cu dim tik ta un. Vano te vang leihum ah tampi pung ta hen hitin, ngamsa te thupha pia hi.

²³ Zanlam le zinglam huncan cu ni nganak hi.

²⁴ Mahcengten Pathian in lei cu a nung mi ngamsa phun a beem mi ngamsa te hei hihen, a bop in a vak mi ngamsa te hei hihen, sahang namkim te hei hihen, pung ta hen tin thu a piaknak bang in cang hi.

²⁵ Mahtihcun Pathian in sahang nam, a beem mi ngamsa nam, leihumi ah a bop in a vak thei mi ngamsa namkim a bawl mi na a pha cu mu hi.

²⁶ Mahcengten Pathian in ohtei mel bang a bang ve mihing bawltuk hung. A mah cu tuipi leihumi te hei hihen, vanhum vano te hei hihen, a ngilo ngawl a beem mi ngamsa te hei hihen, hi leihum hempoh le leihumi ah a bop in a vak mi ngamsa hempoh hei hihen, uk hen hitin a thupiak mi um hi.

²⁷ Mahtihcun Pathian in a ma mel bang mihing bawl hi. Pathian in a ma mel bang pano le numei bawl hi.

²⁸ Ka ihmi ngual cam te aw, ca tampi hing ta un. Lei pi cu dim tik in nehnak co ta un. Tuipi sung ngasa te hei hihen, vanhum vano te hei hihen, a nung in leihumi ah a phia thei mi ngamsa hempoh hei hihen, uk ta un hitin thu a piak hang a muhte thupha muicu pia hi.

²⁹ Pathian in zo in. Leihumi hempoh ah ancang a piang tik thei mi cangkung namkim te hei hihen, anci cang a piang thei mi a ngah tuah a dim mi thingkung namkim hei hihen, nangmuhtei eih tuk keiman pia ing.

³⁰ Lei pi, vanhum vano, a nung in leihum ah a bop a vak mi ngamsa namkim tei eih tuk hampa kung namkim te keiman pia tung hitin, a tihbang in cang hi.

³¹ Pathian in a bawl mi na hempoh a zohten phazet tin a muh hang, zanlam le zinglam huancan cu ni luknak hi.