¹ Maya mengo bakikiwa baikilile Yesu na umsambila, “Mnanyi mmosobu m'buolo bwa hekulu?”

² Yesu kugitile mwana gumwechi, na ukimiya hawingi habo. ³ Gee nukana “Winene nihusambila musahuguloa mitima nahi baana, mushigingila ata m'buolo bwa Abetcha Pungu hekulu. ⁴ Bibyo gegese mine kwilisacha nahi gugu mwana, gugo noo mmosobu m'bwolo bwa hekulu. ⁵ na gegese mine kwigingicha mwana nahi gugu wa china lianyi, kwa ngigicha nene.

⁶ Gegese mine kwilubya kumwe mwana nahi baba balihumbwasha, iibibenju kahambwe liwe lya uhelela m'oshi, na utelwa m'benga lya ichiba. ⁷ Luhanga lubi u batu bammebalo wa mishaminyi kya ulubya! Bululi kyichwa tu mishaminyikia ulubia; luhanga lubi wage mine kuileta mshaminyi kwa ulubya! ⁸ Nambo uboo ube nambo ii ugulu obe ube ulubia, uukede, uutele koo nobe, ii bibenju ukingila m'mweko ushina uboo au ugulu, uli gogwe na maboo mabili na magulu mabili na utelua mmahia a milumbu. ⁹ Na liso liobe libeulubia, lichule ulitele koo nobe; ii bibenju ugingila m'mweko na liso limwechi, uli uba na meso mabili, na utelwa m'bibi lya ahia.

¹⁰ Lolwe nangu mtu kuilengia kumwe kwa bano batulenge; yulu nihumsambila hululu bamalaika baba hekulu masukumose balihulola yenyi ya tata kwa hekulu. ¹¹ Yulu mwana kwa Adamu guchwile uihonya iya ibele ichiminyu. ¹² Mulihumona wii? mtu kwahuba na mioo sambi, kumwechi kwahuumshimina, kushinashiga gya maumi yahabula na yahabula na ugya ikono, ugya naenga kuya kuine kuchimine? ¹³ Na kwa hummona, winene nihumsambila, kuimseelela ulikia maumi yahabula na yahabula kisaba kichiminyu. ¹⁴ Bibyo senyu kwa hekulu kushihubenja kumwe kwa bano ba tulenge uchimina.

¹⁵ “Msiwenyu kwahulubila, ukye umlangu lula, gogwe na gee benywe bopi, gabeuhulicha, wampata mshiwenyu. ¹⁶ Nangu, nambo kusahuhulicha, gita kunge kumwechi ata bopi, bululi utunywa tua bamonyi bopi au batatu binywa byose bibe hululu. ¹⁷ Kusahubahulicha babo, usambile lubunge, na kusahuhulicha lubunga nalo, um'bale nahi mlubi na kulipisha mbuli. ¹⁸ Bibe bibyo, nihumsambila, yoyose yineya mwihamba mmgino sii yihambwa na hekulu na yoyose yamwisula mgino sii yisulwa nahekulu. ¹⁹ Iyaka nihumsambila, uba bopi benyu bihulichana usaba mmino ibalo yulu ya ikilakanywa yose biitilwa na senyu kuli hekulu. ²⁰ Hene hali bopi batatu babesambana yulu ya china lianyi, na nene nili haka haho hamwechi nabo.

²¹ Pedelo kuchwile wa Yesu na um'bucha, “Mlume, mshiwetu kunandubila nyendo chinga na mleelele? ata nyendo njwii?

²² Yesu kumsambile, nishihusammbila nyendo njwii, ii njwii nyendo maumi njwii. ²³ Wa bibyo buolo bwa hekulu bulihulingilishiwa na limwe olo libendiche ubala bacha bage. ²⁴ heyulile ubala, bamchilile na mcha gumwe mine kwebele hulipishwa talanta ukii umi. ²⁵ Gugo kuhulile chulipa, mlumiake kukanine gakuchiwe, gee, mmachake na bana bake na bibya byose bieli nabyo, galipwe butunga. ²⁶ Guya mcha kuguile na umpungila machwi, nuukana, mlume, upembe, niulipa byose. ²⁷ Bibyo mlume kwa kuya mcha, kumwene kene, kumsulile, kumleelele liya deni. ²⁸ Wa ugakicha kuya mcha kukile na umona kunge mcha nage, kubele na deni liake lya dinari sambi; kum'pyashile hammino, nuumkanina ndipe chose choli nacho.

²⁹ Kuya mchanage kum'bembeleche, nuumkanina, upembe, niulipa chose. ³⁰ Gushimmliche kum'pyashile na umambia na umtela mmihambo, mpaka helilipa liya deni. ³¹ Baya bange bachanage habamonine bine bikiliye, bachikililwe abisa, bakile na uumsambila mlumiabo byose bikiliye uya.

³² Haho guya mlume kwa kuya mcha kumkishile naukanina, gogwe mcha m'bii, niuleelele gogwe liya deni hulitendelele. ³³ Na gogue wii, bisaba liniye umleelela mcha nobe, nahi biandiuleelele gogue? ³⁴ Mlumiake kuchikililwe, na umila uu basusuchi, na bielilipa liya deni lyose. ³⁵ Bibyo no bibi uli tata kwa hekulu byelimkila benwe, musahubaleelela wa mitima gienyu kila itu na mshiwabo.