¹ Aba Falise naba Saduki baishile nokumwesha mukumwipusha ati abalange icishibilo ukufuma mulwelele. ² Lelo Yesu alibaswike nokulanda kuli bena, "Ilyo caba icungulo, mulanda ati, 'kuleba fye bwino, pantu umulu naukashika.' ³ Ilyo caba ulucelo, mulanda ati, 'umulu tawabe bwino, pantu umulu naukashika nokufutika.' Mwaishiba ukulondolola imimonekele yamulu, nomba mwebo tamwaishiba ukulondolola ifishibilo fyanshita. ⁴ Inkulo iyabubifi kabili iyabucende ikabila icishibilo, lelo takwaba icishibilo icingapelwa kuli ena kanofye icishibilo cakwa Yona." Elo Yesu abashile nokuya aya.

⁵ Ilyo abasambi bafikile kucifulo bushilya, balilabile ukusenda umukate. ⁶ Yesu alandile kuli bena, "Tekanyeni kabili cenjeleni kufilumba fyaba Falise naba Saduli."

⁷ Abasambi batontonkenye abene beka nokulanda ati, "Nico tatwacisenda umukate."

⁸ Yesu ena alishibe kalibela paliifyo nokulanda ati, "Mweba citetekelo cinono, nicinshi ico muleilishanisha mwebene mweka nokulanda ati nipamulandu tamusendele umukate? ⁹ Mucili tamulaumfwisha nangu ukwibukisha imikate isano pabantu amakana yasano, elyo bushe mitonga iinga mwakolonganike? ¹⁰ Nangu mikate cine lubali iyamakana yane, nomba bushe mitonga iinga mwatolele? ¹¹ Nicinshi tamwilukile ukuti temukate nacilalandapo? Cenjeleni ku cilumba caba Falise naba Saduki." ¹² Ilyo bailwike ukuti talebeba ukuba abayangwa icilumba camukate, lelo ukwangwa ukufunda kwaba Falise naba Saduki.

¹³ Ilyo Yesu aishile muncende iya Kaisaliya Filipo, alipwishe abasambi bakwe, nokulanda ati, "Bushe abantu balanda ati ninebo nani?"

¹⁴ Balyaswike ati, "Bamo balanda ati Yohane kabatisha; bamo ati, Eliya; nabambi ati, Yelemia, nangu umo uwamuli bakasesema."

¹⁵ Alandile kuli bena ati, "Nga mwebo mulanda ati ninebo nani?"

¹⁶ Mukwasuka, Simoni Petro alandile ati, "Nimwebo Kristu Umwana mwaume wakwa Lesa wamweo."

¹⁷ Yesu alyaswike nokulanda kuli ena, "Walishuka webo, Simon umwana mwaume wakwa Yona, pantu tekumubili nangu kumolopa eko wayasukila ici, lelo ni Tata uwaba mumulu. ¹⁸ Peka nalanda kuli webo ati niwebo Petro, napelibwe ili epo nkakula icilonganino. Namaka yamfwa tayakacicimfye nakalya. ¹⁹ Nkakupela nenfungulo shabufumu bwamumulu, Naconse ico wakaka pacalo cikakakwa namumulu, naconse ico wakakula pacalo cikakakulwa mumulu." ²⁰ Yesu akambishe abasambi ukukana ebako nangu umo ati ena ewali Kristu.

²¹ Ukufuma panshita ilya Yesu atendeke ukweba abasambi bakwe ati alinokuya ku Yelusalemu, nokuya cula ukwingi mumaboko yabakulu na bashimapepo bakulu naba kalemba, nokwipaiwa, nokubushiwa kubafwa mubumi pabushiku bwalenga nshitatu.

²² Elo Petro amusendele pambali nokumukalipila, ukulanda ati, "Ico cakutali kuli mwebo, Kuuku! Ico tekuti cicitike kuli mwebo."

²³ Yesu alipilibwike nokulanda kuli Petulo ati, "Fuma kuli nebo, Satana! Uli cakuipuntulako kuli nebo, pantu tawangwa ifintu fyakwa Lesa, lelo wangwa ifintu fyabantu." ²⁴ Yesu alandile kubasambi ati, "Nga umo alefwaya ukunkonka, ayikanye umwine, asende nolupanda lyakwe, nokunkonka. ²⁵ Pantu uufwaya ukupususha ubumi bwakwe akabulufya, naonse uwalufya ubumi bwakwe pa bumi wandi akabusanga. ²⁶ Bushe kuti cayafwa shani umuntu ukunonka icalo conse elo alufya ubumi bwakwe? Nicinshi umuntu engakabusha nobumi bwakwe? ²⁷ Pakuti Umwana mwaume wa Muntu aleishila mubukata bwakwa Wishi pamo na bangeli bakwe. Elo akesapeela umuntunse onse umwabela imilimo yakwe. ²⁸ Cishinka nalanda kuli mwebo, bamo muli mwebo pabeminine pano tabakasondepo imfwa mpakafye bakamone Umwana mwaume wa Muntu aleisa mubufumu bwakwe."