¹ A qai meia cake o Jisu na Yalo Tabu i vikaikai me lai temaki niya na nitu. ² Ia avo lolo o kiya me vasagavulu na siga qeiniya e vasagavulu na bogi, e qai mata kana. ³ A qai lamai vuwa na dauvitemaki, e qai kwa vuwa ''Kodaki ojia luve ni Kalou, mo kwaya re me vuki mei buli madrai na vivatu iqoi.'' ⁴ A qai kwa o Jisu vuwa, ''E volai, 'E na tasi cola na tamata i na madrai takiya ga, ena cola ga ena kwakwa taucoko e lamai na gusu ni Kalou.'' ⁵ A qai meia na nitu ina rara tabu, a qai vatuniya o Jisu ina vatelaga ni were ni soro, ⁶ a qai kwa vuwa, ''Kodaki ojia i Luve ni Kalou, mo ula bale bale mai, ni volai, ''E na varojidru na leya agilosi meru na maroroi jiko, Ia ena varojiya e lima, ke kiya na siga ena tavutu ke mu la ina vatu.'' ⁷ A qai kwaya vuwa o Jisu, ''E volai talega, 'Mo kuwa ni vatovoliya o Jiova na lemu Kalou.'' ⁸ E qai meia tale na nitu i na kiya na vatelaga yawa i yata, a qai varaitaki niya vuwa na vimatanitu taucoko i vuravura, qainiya na kedru i ukuuku. ⁹ A qai kwa vuwa, ''Na kwa taucoko ikwe qu na solia vuwako, kodaki o na cuva bale mo varokoroko voko yau.'' ¹⁰ E qai kwa vuwa o Jisu, ''Mo ladai qu lobo setani! Ni vo volai, 'Mo varokoroko vua o Jiova na lemu Kalou ia mo qwaraviya takiya ga.''

¹¹ E a qai biubiu na nitu, e a tolaviya, eru yavalu na agilosi me ru mai qwaraviya.

¹² Niya varogo o Jisu ni vo biu i werenivivesu o Joni, a lesu tale i Kalili. ¹³ Avu deidei mai Nasareci qai lai nokoto no i Kapenaumi, o kiya e a tucake tu i matacawa, ina i yalayala i Sevuloni qaineya o Navitalai. ¹⁴ Me vayacori ke na leya kwakwa e a kwa o Aisea na parovita ea kwaya, ¹⁷ Mai na gauna igi vo vatekivu ke o Jisu me dauvunau, qai kwa ''vivutuni, ni vo voleka na matanitu valomalagi.'' ¹⁸ A vo yato yaji o Jisu i na matacawa o Kalili, a tolaviya eru lewe ruwa eru vitacini, o Saimoni vatokai muni me o Pita, qaneya o Adriu leya tacini, eru viritakiniya na ledru lawa i ruwai eru jiya gonedau. ¹⁹ O Jisu e qai kwa vuwadru, ''lamai, tekuciko yau, qu na qai lesiko muru mo murujiya gonedau ni tamata.'' ²⁰ Aru vo biujiya sara tu na ledru lawa, ru tekucia sara. ²¹ Ni ru vo ladai mai ke o kiya mai mata, a tolaviya e ru rua tale eru vitacini o Jemesa lai luve o Sepete vata qeiniya o Joni la tacini aru nokoto vata o Sepete na ledru momo i yaloga ni waqa aru yaviciya no na ledru lawa. ²² E covidrumai o kiya, ia ru vo biujiya sara tu na ledru waqa qaneya na ledru momo, aru qai tekuciya o Jisu.

²³ O Jisu aru vo la wavoki jiya taucoko o Kalili, ea vatavuvuli cidru ina ledru vi werenilotu, e vunautaki niya na i tukutuku oka ni matanitu valomalagi, a vacola nidru na tamata mai na tauvimate taucoko vata qainiya o rau na malumalumu taucoko. ²⁴ Avo rogotaki yaji na kedru i rogorogo i Siriya taucoko, aru meia yaji vuwa na tauvimate taucoko, e tauvidru na mate kanikiya qaniya na yaluma, o rau muni na curumi nitu, qainoiya o rau muni na curumi nitu, qaneya orau na tauvi liyaliya, vata qaneya na tauvi paralase. ava cola nidru taucoko o kiya. ²⁵ Aru vo lewe levu sara ru tekuciya i Kalili, vata o Tikapoli, vata o Jeruisalemi, vata o Jutia, qainiya na jiliva ni Joritani.