Sapta 2
1
Maria i podea e Isu iea o Betlehem pololilo o Juda na tahuna e Herot ia king. Lakea e hurika bakovi ni lohoka na ni rikena haro ri valai o Jerusalem ri nana maea,
2
"Ra koma karaba i bele, ia king ne hurika Juda i made vai? Mateu mete masia na ni rikena haro a hada vona mateu mete valai ni turume puruma vona."
3
Tahuna e King Herot i longoa ra ngava iea, ia i luhoi lege turana e hurika tara o Jerusalem.
4
Herot i kalipopo e hurika hetpris turane hurika bakovi ni lohoka na lo ne hurika Juda lakea i nana ria,"Ne erei a tanga e Kristo a bakovi ni bole mule hurika bakovi a ngatavine ge bele?"
5
Lakea ri taki maea ia,"Ia biri bele o Betlehem iea o Juda, e hurika profet ri here maea,
6
'Ioe Betlehem, na malala ne hurika Juda, kimi ioe a tanga kiroko hateka komo uka ramu na palane virika tanga dagi ri tahoka rane ria i dagi iea o Juda. Uka. Na rana, ne vomu tara hetman biri bele ia matakari ne hurika tara nau iea o Israel."
7
Herot i longoa ra ngava iea i kapiloho kunana i gale hurika bakovi ni lohoka ri valai vona i nana ria na ara parava ri masia ra hada i bele.
8
Ia i rudu ria ri lakea o Betlehem, lakea i taki ria,"Mu vano mu matakana kamumua ra koma kiroko. Tuhuna mu puruvisia pali, mu vakaru a ngava ne nau, iau tara ga valai ga turume puruma vona."
9
Ri longoa pali a nitana king, lakea ri vano, ra hada ri masia na ni rikena haro i muga ria i para polomeli na ruma i mahita vona koma.
10
Tahuna ri masia ra hada iea ra tamudine ria i vivi dagi hateka.
11
Ri dili na ruma ri masia koma turane kinana e Maria. Ri pasike puru ri turume puruma vona. Ri vuka virika pou i tahoka virika maki i dagi hateka ri habi vona gol, sanda kamumu, a paura ni vakabele ni huli mangni noro.
12
Deo i taki ria na vurena maea nahani rigi hamule ne Herot. Lakea ri ramai a dala tara ri hamule na tanga ne ria.
13
Hurika bakovi ni lohoka ri vano pali lakea e Josep i vurena i taki maea ia ensel ne ViriDagi,"Pesirike, bolea koma turane kinana moto ha lakea o Isip. Ioe o made o Isip i vano iau ga habi tabu a ngava vomu, na rana, Herot tege rabalakia koma ge mate.
14
Na rodo iea e Josep i pesirike i bolea koma turane kinana to lakea o Isip.
15
To made vonga i vano e king Herot mate. Ra hini nga i bele tege vakatorea tara ngava ia e ViriDagi habia na ngavana profet,"Iau a galea e tugu a bakovi iea o Isip i valai."
16
Herot i pala maea hurika bakovi ni lohoka na ni rikena haro ri tamia, lakea i madihi a hatena. Ia i rudu e hurika nugu maheto rigi rabalaki e hurika koma bakovi kiroko pololilo iea o Betlehem a pida ne ria i rua i puru polotano. Herot i nana kamumu e hurika bakovi ni lohoka na ara parava a hada i bele, na rana, ia i luhoi ni rabalaki hurika koma ri bele na parava iea.
17
Ra ngava iea i ta vona e profet Jeremaea i bele muholi,
18
"Tara ni tangi a ni gale i bele o Rama. Resel i taringi e tuna, lakea kimi ngaru ge tara bakovi o a ngatavine ge tami purua tamudina, na rana, hurike tuna ri mate pali."
19
Tahuna e Herot i mate pali, lakea tara ensel e ViriDagi i valai ne Josep i vurena iea o Isip i takia,
20
"Pesirike o bole koma turana e kinana moto lakea o Israel, hurika bakovi rigi rabalaki koma ri mate pali."
21
Josep i pesirike i bolea a koma turane kinana to lakea o Israel.
22
Tahuna e Josep i longo maea e Akilaus i bolea murine tamana i bele manga a king ne hurika Judia, ia i mageneg ni lakea vona hini nga. Muri e Deo i habi tabua e Josep ia i vurena, ia i lakea iea o distrik Galili.
23
Ri lakea na tanga dagi o Nasaret. Ra hini nga i vakatora ngavana profet maea, bara ri galea a bakovi o Nasaret.