पाठ 46
1
तब इस्राएल आपन सब कुछ लेके बेर्शेबा के गईलन, अऊर उहाँ अपने पिता इसहाक के परमेश्वर के बलिदान चढ़ईलन।
2
तब परमेश्वर इस्राएल से राती के दर्शन में कहलन, “हे याकूब, हे याकूब।" ऊ कहलन, “का आज्ञा।"
3
ओन कहलन, ”हम परमेश्वर तोहरे पिता क परमेश्वर हई, तू मिस्र में जाए से मत डेरा; काहेकि हम तोहसे उहाँ एखे बड़ी जाति बनाईब।
4
हम तोहरे संगे-संगे मिस्र के चलत हई; अऊर हम तोहके उहाँ से फिर जरूर ले आईब; अऊर यूसुफ अपने हाथे से तोहरे आँख के बंद करिहन।"
5
तब याकूब बर्शेबा से चललन; अऊर इस्राएल क लड़का अपने पिता याकूब, अऊर अपने बाल-बच्चन, अऊर स्त्रियन के ऊ गाड़ियन पे, जवन फिरौन ओनके ली आवअ बदे भेजले रहलन, चढ़ा के चल देहलन।
6
ऊ लोग अपने भेड़-बकरी, गाय-बैल, अऊर कनान देश में अपने इकठ्ठा करल सब धन के लेके मिस्र में अईलन।
7
अऊर याकूब अपने बेटवा-बिटिया, पोता-पोतियन अर्थात अपने वंश भर के अपने संगे मिस्र में ले अईलन।
8
याकूब के संगे जवन इस्राएली, अर्थात ओनकर बेटा, पोता आदि मिस्र में अईलन ओनकर नाम ई हौ; याकूब क जेठ रुबेन रहलन।
9
अऊर रुबेन क पुत्र हनोक, पल्लू, हेस्रोन, अऊर कर्मी रहलन।
10
शिमोन क लड़का यमूएल, यामीन, ओहद, याकीन, सोहर, अऊर एक कनानी स्त्री से जन्मल शाऊल भी रहलन।
11
लेवी क लड़का, गेर्शोन, कहात, अऊर मरारी रहलन।
12
यहुदा क एर, ओनान, शेला, पेरेस, अऊर जेरह नाम क लड़का भयल त रहलन; लेकिन एर अऊर ओनान कनान देश में मर गयल रहलन; अऊर पेरेस क लड़का हेस्रोन अऊर हामूल रहलन।
13
इस्साकार क लड़का तोला, पुव्वा, योब, अऊर शिम्रोन रहलन ।
14
जबूलून क लड़का सेरेद, एलोन, अऊर यहलेल रहलन।
15
लिआ क लड़का जवन याकूब से पदनराम में पैदा भयल रहलन, ओनकर बेटा, पोता ईहअ रहलन, अऊर ओनसे अधिक ऊ ओनके संगे एखे बिटिया दीना के भी जनम देहलिन। इहाँ तक त याकूब क सब वंश वाले तैंतीस प्राणी भईलन।
16
फिर गाद क लड़का सपोन, हाग्गी, शूनी, एसबोन, एरी, अरोदी, अऊर अरेली रहलन।
17
आशेर क लड़का यिम्ना, यिश्वा, यिश्वी, अऊर बरीआ रहलन, अऊर ओनकर बहिन सेरह रहलीन; अऊर बरीआ क लड़का हेबेर अऊर मल्कीएल रहलन।
18
जिल्पा, जेके लाबान अपने बिटिया लिआ के देहले रहलन, ओनकर बेटा, पोता ईहअ रहलन; अऊर ओनके जरिये याकूब के सोलह प्राणी उत्पन्न भईलन।
19
फिर याकूब क पत्नी राहेल क लड़का यूसुफ अऊर बिन्यामीन रहलन।
20
अऊर मिस्र देश में ओनके याजक पोतिपेरा के बिटिया आसनत से यूसुफ क ई लड़का भईलन, अर्थात मनश्शे अऊर एप्रैम।
21
बिन्यामीन क लड़का बेला, बेकेर, अश्बेल, गेरा, नामान, एही, रोश, मुप्पीम, हुप्पीम अऊर अर्द रहलन।
22
राहेल क लड़का जवन याकूब से उत्पन्न भयल रहलन ओनकर ईहअ लड़का रहलन; ओनकर ई सब बेटा, पोता चउदह प्राणी भईलन।
23
फिर दान क लड़का हूशीम रहलन।
24
नप्ताली क लड़का येसेर, गुनी, सेसेर, अऊर शिल्लेम रहलन।
25
बिल्हा जेके लाबान अपने बिटिया राहेल के देहलन, अऊर ओनकर बेटा, पोता ईहअ हयन; ओनके जरिये याकूब के वंश में सात प्राणी भईलन।
26
याकूब के निज वंश क जवन प्राणी मिस्र में अईलन, ऊ ओनके बहुवन के छोड़के सब मिल के छियासठ प्राणी रहलन।
27
अऊर यूसुफ क लड़का जवन मिस्र में ओनसे उत्पन्न भईलन ऊ दु प्राणी रहलन; ए प्रकार याकूब के घराना क जवन प्राणी मिस्र में अईलन, सब मिल के सत्तर भईलन।
28
फिर ऊ यहूदा के अपने आगे यूसुफ के लग्गे भेज देहलन की ऊ ओनके गोशेन क मार्ग देखावअ; अऊर ऊ लोग गोशेन देश में अईलन।
29
तब यूसुफ आपन रथ जोतवा के अपने पिता इस्राएल से भेंट करअ बदे गोशेन देश में गईलन, अऊर ओनसे भेट कईके ओनके गले से लिपटलन, अऊर कुछ देर तक ओनके गले से लिपट के रोवत ही रहलन।
30
तब इस्राएल यूसुफ से कहलन, ”अब हम मरअ से भी खुश हई, काहेकि तोहके जीवित पईली अऊर तोहार मुंह देख लेहली।"
31
तब यूसुफ अपने भाईयन से अऊर अपने पिता के घराने से कहलन, ”हम जाके फिरौन के ई समाचार देब, 'हमरे भाई अऊर हमरे पिता के घराने क सब लोग, जवन कनान देश में रहत रहलन, ऊ लोग हमरे लग्गे आ गयल हयन;
32
अऊर ऊ लोग चरवाहा हयन, काहेकि ऊ लोग पशुवन के पालत आयल हयन; एही से ऊ लोग अपने भेड़-बकरी, गाय-बैल, अऊर जवन कुछ ओनकर हौ सब ले आयल हयन।'
33
जब फिरौन तोहके बोला के पुछिहन, 'तोहार उद्यम का हौ?'
34
तब ई कईहा, 'तोहार दास लड़कपन से लेके आज तक पशुवन के पालत आयल हयन, वरन हमार पुरखा भी अईसहीं करत रहलन।' एसे तू गोशेन देश में रह पईबा; काहेकि सब चरवाहन से मिस्री लोग घृणा करअ लन।"