1
तब यूसुफ ऊ सब के सामने, जे ओनके आस पास खड़ा रहलन, अपने के अऊर रोक ना सकलन; अऊर पुकार के कहलन, "हमरे आस पास के सब लोगन के बहरे कर दा।" भाइयन के सामने अपने के प्रगट करत के समय यूसुफ के संगे अऊर केहु ना रहल।
2
तब ऊ चिल्ला चिल्ला के रोवअ लगलन; अऊर मिस्रीयन सुनलन, अऊर फिरौन के घरे के लोगन के भी ई समाचार मिलल।
3
तब युसूफ अपने भाईयन से कहअ लगलन, "हम यूसुफ हई, का हमार पिता अब तक जीवित हयन?" एकर उत्तर ओनकर भाई लोग ना दे सकलन; काहेकि ऊ लोग ओनके सामने घबरा गयल रहलन।
4
फिर यूसुफ अपने भाईयन से कहलन, "हमरे लग्गे आवा।" ई सुन के ऊ लोग लग्गे गईलन। फिर ओन कहलन, ”हम तोहार भाई यूसुफ हई, जेके तू मिस्र में आवअ वालन के हाथे बेच डलले रहलअ।
5
अब तू लोग मत पछता, अऊर तू लोग जवन हमके इहाँ बेच देहला, एसे उदास मत होवा; काहेकि परमेश्वर तोहरे प्राण के बचावअ बदे हमके आगे भेज देहले हयन।
6
काहेकि अब दु साल से ई देश में अकाल हौ; अऊर अब पांच साल अऊर अइसहीं होई की ओम्मे न त हल चली अऊर न अन्न काटल जाई।
7
एही से परमेश्वर हमके तोहरे आगे ए बदे भेजलन कि तू पृथ्वी पे जीवित रहा, अऊर तोहरे प्राण के बचअ से तोहार वंश बढ़अ
8
ए बदे अब हम के इहाँ भेजअ वाला तू नाही, परमेश्वर हयन; अऊर ओनही हमके फिरौन के पिता जईसन, अऊर ओनके पूरा घरे क मालिक, अऊर पूरा मिस्र देश क प्रभु ठहरा देहले हयन।
9
अत: जल्दी से हमरे पिता के लग्गे जाके कहा, 'तोहार लड़का यूसुफ ए प्रकार से कहत हयन, की परमेश्वर हमके पूरा मिस्र देश क मालिक ठहरईले हयन; एही से तू हमरे लग्गे बिना देरी कईले चल आवा।
10
अऊर तोहार निवास गोशेन देश में होई, अऊर तू बेटवा, पोता, भेड़-बकरियन गाय-बैल, अऊर अपने सब कुछ समेत हमरे लग्गे रहबा।
11
अऊर अकाल क जवन पांच साल अऊर होई, ओम्मे हम ओहि जगह पे तोहार पालन पोषण करब; अइसन न होवअ की तू अऊर तोहार घराना वरन जेतना तोहार लोग हयन ऊ लोग भूखा मरअ।'
12
अऊर तू अपने आँख से देखत हयअ, अऊर हमार भाई बिन्यामीन भी अपने आँख से देखत हयन की जे हम से बात करत हव ऊ यूसुफ हयन।
13
तू हमरे सब वैभव क जवन मिस्र में हौ, अऊर जवन कुछ तू देखले हया, ऊ सब क हमरे पिता से वर्णन करिहा; और तुरंत हमरे पिता के इहाँ ले आवा।"
14
अऊर ओन अपने भाई बिन्यामीन के गले से लिपके रोवलन; अऊर बिन्यामीन भी ओनके गले से लिपट के रोवलन।
15
ओन अपने सब भाईयन के चूम के रोवलन अऊर ओकरे बाद ओनकर सब भाई ओनसे बात करअ लगलन।