पाठ 13
1
तब अब्राम आपन पत्नी अऊर आपन सब सम्पत्ति ले के लूत के भी संगे लेहले मिस्र देश के छोड़ के कनान के दक्षिण देश मे अईलन।
2
अब्राम भेड़-बकरी, गाय-बैल, अऊर सोना-चांदी क बड़ा धनी रहलन।
3
फिर ऊ दक्षिण देश से चल के, बेतेल के लग्गे ओही जगह पहुंचलन, जहाँ पहिले ऊ आपन तम्बू खड़ा कईले रहलन, जवन बेतेल अऊर आई के बीच मे हव।
4
ई स्थान ऊ वेदी क हव, जेके ऊ पहिले बनईले रहलन, अऊर ऊहाँ अब्राम फिर यहोवा से प्रार्थना कईलन।
5
लूत के लग्गे भी, जे अब्राम के साथे चलत रहलन, भेड़-बकरी, गाय-बैल, अऊर तम्बू रहल।
6
एही से ऊ देश में उ दूनो बदे पर्याप्त जगह नाही रहल की ऊ लोग इकट्ठा रहअ काहेकि ओनकरे लग्गे बहुत सम्पत्ति रहल एही से ऊ इकट्ठा नाही रह सकलन।
7
एही से अब्राम, अऊर लूत क भेड़-बकरी अऊर गाय-बैल के चरवाहन मे झगड़ा भयल। ओ समय कनानी, अऊर परिज्जी लोग ऊ देश मे रहत रहलन।
8
तब अब्राम लूत से कहअ लगलन, "हमरे अऊर तोहरे बीच, अऊर हमरे अऊर तोहरे चरवाहन के बीच झगड़ा न हो पावअ; काहेकि हमने भाई-बन्धू हई।
9
का सब देश तोहरे सामने नाही हव?" एहि से हम से अलग होवा, अगर तू बाई ओर जईबा त हम दहिने ओर जाईब; अऊर अगर तू दहिने ओर जईबा तब हम बाईं ओर जाईब।"
10
तब लूत आंख ऊठा के यरदन नदी के लगे क सब तराई देखलन की ऊ सब सिंचल हव। जब तक यहोवा सदोम अऊर अमोरा के नाश ना कईले रहलन, तब तक सोअर के रस्ता तक क ऊ तराई यहोवा के वाटिका, अऊर मिस्र देश के जईसन उपजाऊ रहल।
11
एही से लूत अपने बदे यरदन क सब तराई के चुन के पूरब के तरफ चललन, अऊर ऊ लोग एक-दूसरे से अलग हो गईलन।
12
अब्राम त कनान देश मे रहलन, पर लूत ऊ तराई के नगर मे रहअ लगलन; अऊर आपन तम्बू सदोम के लग्गे खड़ा कईलन।
13
सदोम क लोग यहोवा के नजर मे बड़ा दुष्ट अऊर पापी रहलन।
14
जब लूत अब्राम से अलग हो गईलन तब ओकरे बाद यहोवा अब्राम से कहलन, "आँख उठाके जउने जगह पे तू हया, ऊहा से उत्तर-दक्षिण, पूरब-पश्चिम, चारो तरफ नजर करा।
15
काहेकि जेतना भूमि तोहके देखात हव, ऊ सब के हम तोहके अऊर तोहरे वंश के युग-युग बदे देब।
16
अऊर हम तोहरे वंश के धरती के धूल के किनकन के जईसन बहुत करब, ईहा तक की जे केहू धरती के धूल के किनकन के गिन सकी ऊहअ तोहरे वंश के भी गिन सकी।
17
उठा, ई देश के लम्बाई अऊर चऊड़ाई मे चला-फिरा; काहेकि हम ओके तोही के देब।"
18
एकरे बाद अब्राम आपन तम्बू उखाड़ के, मम्रे के बांज वृक्ष के बीच जवन हेब्रोन मे रहल, जाके रहअ लगलन, अऊर ऊहा भी यहोवा क एक वेदी बनईलन।