¹ Paula, nai apositolo i Karisito Jisu mai na ba vatu lewa na Kalou, ina vukhu ni yalatakhi ni cola koi tau talia ga va Karisito Jisu, ² iva Timoci, na driadria dau lai vakhatekhe: na loloma savu, na yalo loloma, gana vakacegu mai vua na Kalou o Tamaya qai Karisito Jisu na leda Momo. ³ Qi vavinavina vua na Kalou, o koya qu qaravia qai kora na tuqwaqwa, ina loma savasava, me wetai niqu dau numi kem va bibita ina lequ qaqa ni masu ina bogi qana siga. ⁴ Niqu sa dau numia mem wai ni mata, ni sa balavu no te tam vilogoci no, me rewa niqu sinai vutuvutu muni ina gadre. ⁵ Niqu sa lai vakanumi no ina lem vabautia, o koya a tau sila vali va tubum yalewa o Loisi qa mnam o Unaisi, koi qi sa vadudutakhi nia muni ni sa no qai iko vali muni. ⁶ Koya soura ga kwe qi togaya no kha va iko mo vacolacola nia nai solisoli ni Kalou okoya itau vali va iko mai na vitabakhi ni qu lima. ⁷ Ni Kalou ei tam solia na yalo ni matakhu, ia na qwaqwa ga na loloma qana cola ei vakha i nakhi. ⁸ Ko ya so kwe me te kua ni madua nite lou tavui me baletia na leda Momo, se o au, o Paula, qi vesu tu. Ia, mete vai votavota vata na kea mosimosi ni tukutuku vina me wetou nau qwaqwa ni Kalou, ⁹ o koya a va cola ni keta qa co vi keta ina i co ni vivakhatekhe. A tara na kwa kwe, i tam baletia na leda cakacaka, ia baletia talia ga na lea i tuvatuva qana lea loloma, o koya a solia mai va keto o Karisito Jisu ni bere nai tautaula ni gauna. ¹⁰ Ia kokwe na vivacolai ni Kalou asa lai vatakei mai na lea tase na leda i vakacola o Karisito Jisu, a mai mudukhai vakalia na mate qa kau mai na cola qa vacedrenia na cece mai na kosipeli. ¹¹ Baletia na kwa kece kwe, qu digitakhi kha mequ dau vunau, mequ tia apositolo, qa qu tia qasenivuli. ¹² Ko ya sara ga kwe na vu ni lequ sotavia kha na dredre. Ia qu tam madua taki nia, niqu kilati koya no okoya kogi vabautia. Sa lequ numia nio koya ei rewa ni maroroi tia na kwa qisa solia vua me yacovia na siga sokwe. ¹³ Marorai tia nai varaitakhi ni tata du kho varogo mai va au, ina vabautia qana loloma iva Karisito Jisu. ¹⁴ Na vi kwa vina a solia na Kalou mo borokutututu nia, mo baitia mai na Yalo Tabu, kou no vali qai keta. ¹⁵ Mo kilatia no, o kora kece na cola tu i Esia ere sa yalobo ti au. Iri wili muni kha o Faijelo qoi Erimojini. ¹⁶ Me sobutia na yalo loloma ni Momo na vuniwere lei Onisivorosi, ni sa dau madila cakhi ni au qa tam dau maduatakhi ni au ina lequ vesu tu. ¹⁷ Me wetai, na lea no vali mai Roma, a sa vadani au rauni ina yalodu, me yacovia sara me dani au. ¹⁸ Me solia re vua na Momo na lea yalo loloma ina siga so kwe. Ina vi sala kece ni lea qwaravi au i Efeso, me wetai em sa kilatia vina tu.