¹ Ko kwe, luvequ, va qwaqwa takhi niko ina loloma koi naki talia ga va Karisito Jisu. ² Na vi kwa kece o rogo mai va au ina kedra maliwa nai vadudu, mo vaganira na tamata yalodu koi re rewa ni vavuli cira leqwa i sewa. ³ Mo vosotia na kwa kaikai qai au me wetai na sotia vina i Karisito Jisu. ⁴ Ei lala na sotia ei dau valu me vaogoa ni koya leqwa ina kwa ni cola kwe, me va loma vinatakhi nia na turaga ni valu. ⁵ Lia leqwa, maga ilia i qatia vali na qito, ia na tam rewa tia na kea i sala maga i tam takucia na kea lawa. ⁶ Na dau laulau cakacaka kaikai ina vai votavota sila ina i matai ni kwa i lau. ⁷ Vakasamatakhi nia no na kwa qu kwaya, ni na solia va iko na Momo mo kilatia na kwa taucoko. ⁸ Numi Jisu Karisito, a vu mai va Tevita, o koya a dure leqwa mai na mate. Ko kwe i sa laikwai ina tukutuku ni kosipeli; ⁹ O koya qu sa vosotia kha na vikwa rarawa me wetai na tamata cakaca mequ vesu ka me wetai na keivesu. Ia na tata ni Kalou i tam vesu rewa. ¹⁰ Koya sara ga kwe qu vosotia no kha na vikwa cokho me baletira na digitakhi, mere rewa ni rewatia muni na cola koi tau no va Karisito Jisu, ina lagilagi tam vaiyalayala. ¹¹ Ko kwe na du ni kwa a kwaya; “nite mate qai koya, tena eda qai koya leqwa. ¹² Nite vosotia, tena lewa vata qaya. Nite cakhitakhi ni koya, ina cakhitakhi ni deta muni. ¹³ Nite tam yalodu, isi yalodu ti keta ga o koya, i tam rewa ni cakhitakhi ni khoya vatakhi ni koya.” ¹⁴ Mo vasalatira ga no ina kwa kece kwe. Vonotira ina mata ni Kalou mere kua ni viletitakhi na tata; ei lala e bete ia ei caca bakhi nira boto na varogo. ¹⁵ Cikabotia sara mo vakakei ikho mo vina ina mata ni Kalou, na tamata dau cakacaka i lala na kwa i madua kha, o koya i wase vadodonu na tata du. ¹⁶ Mo lakha dei mai na vitalanoa vasisila qa lala e bete, ni na mera dei mai ilia nai wase levu mere lotu vakaca. ¹⁷ Na ledra tata ina tete me wetai mate cakaca. Sa setai muni o Imeneo qa Filito, ¹⁸ a ru sa laka dei mai ina du. Are kwaya ni sa rewa makawa na leda dure leqwa, aru sa cacavaki nia vakalia na ledra vabautia a sewa na kea i wase. ¹⁹ Ko kwe, na yavu dei ni Kalou ina dure. Ina wetai kwe na tata ina volai kha: Na Momo i kilatira na lea “qai “Kora kece ere vayacani ie yaca na Momo i dodonu mere lakha dei mai nai valavala ca.” ²⁰ Ina werelevu a tam tau talia no boto kha na bila koula qara siliva. A tau no muni na bilo kai qana qwele. A sewa a vagataki ina vi soqo yalevu qa sewa na soqo yosewa. ²¹ Maga ilia sa vasavasava takhi ni koya mai na vikwa cakaca, so yaco kha o koya me bilo tetelagi. Sa tikici koya dei mai, qa sa yaga vakalevu vua nai vavuvuli, qa sa vakarautakhi tw ina cakacaka vina cokho. ²² Mo tubu dei nia mai na vigagadre cakaca va saravau. Ia me gu tavia mloma na yalododonu, na vabautia, na loloma, qana vakacegu qai kora na dau kere vivuke vua na Momo mai na savasava ni uto. ²³ Ia duaraki nia na lei varivariva qa na taro tam yaga. E kilatia ni na kau ga mai vivala. ²⁴ Na bobula ni Momo Levu me re kua ni dau vivala. Rautia ga me re yalo vina vuara coko, me rewa ni lai vakavuli, qa dau wawa, ²⁵ Dau vakadodonutaki ni kora na kea meca na yalo savu, Lakalaka me qei vagania na Kalou na yalo ni vivutuni me re kilatia na du. ²⁶ Me re rewa ni vatulewa vina leqwa qa ra laka dei mai lea i cori na nitu, ni re sa lai vakavuli na lea lewa.