¹ Sa qei vatakhe vakhe au na bati ni wai ni cola, ma khare sese. Jha sa drodro mai na i nono vakhaturaga ni Khalou qa na Lami, ² kina buto donu ni sala ni khoro. I na sakhesakhe ni bati ni wai ruarua kha sa tau tu khe na khai ni cola, kha vuatakhi kha tirukharua e vimataqali vua, qa vuatakhi e vua i na vi vula. E rau na vu ru khai kha baletia na vivakhacola i vuara na vimarutu. ³ Ia, khei na tikhai tlia leqwa na yalo ca. Na nono vakhaturaga ni Khalou qa na Lami khei na nakhi i na buto ni khoro, qa ra na qwaravi khoya kho khora na leya tamata. ⁴ E ri na tolavia e mata, qa na tau muni e yaca i dra ra. ⁵ Khei na tikhai leqwa na bogi; e ri na tamu vinatia leqwa na cece ni cina se na siga baletia na Turaga na Khalou khei na serauni khora. E ri na viliutakhi qa tamu mudu. ⁶ Kha sa kwaya va khe au na agilosi, "Na tata kwe khei mana qa du. Na Turaga, na Khalou ni dra yalo na Parofita, sa vakhatala mai na leya agilosi me vatakhe vuara na leya tamata na vi kwa sa na vakharay yaco." ⁷ "Tolavia! sa vovolekhe sara no ni la yati! Sa khalougata kho khoya khei rokhovia na tata ni parofisai ni vola kwe." ⁸ Kho au, kho Joni, qu varogocia qa qu tolavia na vikwa kwe. Na gauna qu varogocia qa qu tolavia khe, qu khoruva qa qu vacacabo i e la na agilosi kho khoya kha vatakhe no mai va khe au na vikwa kwe. ⁹ Kha sa kwaya mai va khe au kho khoya, "Mo khua ni tara wakhi! Daru te dauniviqwaravi vatat ga, qai khora na wekhamu na parogita, qai khora qa muni khei ri rokhovia na tata ni vola kwe. Qwaravia na Khalou!" ¹⁰ Sa qei kwaya kho khoya va khe au, "Mo khua ro ni dregatia na tata ni parofisai ni vola kwe, ni sa volekhe na gauna. ¹¹ Kho khora na tamu dodonu, me ra tamu dodonu no ga. Kho khoya sa tamu savasava, me tamu savasava no ga. Kho khoya khei dodonu, denia me tara no ga na kwa dodonu. Qei khoya sa yalo savasava, me yalo savasava no ga." ¹² "Tolavia! sa volekhe na lequ lesu yati. Na lequ i covi sa tau no vakhe au, me qu saumia vuara me odakhi na ledra i valavala. ¹³ Kho au na Alifa qa na Omeka, na i matai qa na devudevu, na i tikhitikhivu qa na i cavacava. ¹⁴ Sa khalougata kho khora khei sava na ledra i sulu, me ra khana doudou i na khai ni cola qa ra na rusu i na matamata levu ni khoro. ¹⁵ E ri na dei tu i tuba na tui, khora na drodroti, khora na vidavidauci, na daulaba, khora na dau khoruva i na vimatakhau qai khora khece e ri vinatia na rekwa qai khora na dau rekwa. ¹⁶ Kho au, kho Jisu, qu sa vatala tati lequ agilosi me vatakhe va khe ikho na vikwa kwe me baleti khora na soqosoqo lotu. Kho au na wakha qa na khawa li Tevita, na khalokhalo i vola siga sa serau tu." ¹⁷ Kha sa kwaya na Yalo Tabu qai khoya muni na yalewa vakharau vakhawati, "La mai!" Kho khora muni ra varogocia me ra kwaya, "La mai!" Kho khora khece e ri mata somu, me ra la mai, qei khora khece e ri vinatia, me ra somu sese i na wai ni cola. ¹⁸ Qi sa tukhutukhu no i vuara e ri varogocia na tata ni parofisai ni vola kwe: khoya khei tlia khei vakhuria, khei na vakha levunia vua na Khalou na mate cakhaca khei volai no i na i vola kwe. ¹⁹ Khoya khei tlia me khau dei mai so tata mai na i vola ni parofisai, na khau dei muni na Khalou na leya i votavota mai na khai ni cola qa na vikwa sa volai tu i na i vola kwe me baletia na khoro tabu. ²⁰ Sa kwaya kho khoya kha vatakhe na vikwa khwe, "E! Qi sa vovolekhe ni la yati." Emeni! La mai, Turaga Jisu!" ²¹ Me lemu na loloma ni leda Turaga kho kho Jisu. Emeni.