¹ Ni sa siro sobu mai delana ko Jisu era sa muri koya mai e lewe levu. ² Sa lako mai e dua a tauvi vukavuka ka cuva vua ka kaya, " Turaga kevaka kemunu vinakata, kemunu rawa ni vakabulai au". ³ Sa dodoka yani a ligana ko Jisu ka tarai koya ka kaya, "Au vinakata mo savasava". A sa vakabulai mai na vukavuka ena gauna sara ga mai ei. ⁴ Sa vakaroji koya ko Jisu me kakua ni tukutuku ki na dua baleta a ona vakabulai koya ia me lako ki na Bete ka vakaraitakini koya ka vakacabora a ona i soro me vaka ai vunau i Mosese. ⁵ Ni sa yaco yani ki Kapenaumi ko Jisu sa lako mai vua e dua a turaganivalu, ⁶ ka vakamasuji koya me vakabula a ona tamata cakacaka sa tauvi paralasi ka vutu vakalevu. ⁷ Sa sauma ko Jisu ka kaya , Au na lako yani ki vakabulai koya. ⁸ Sa sauma a turaganivalu, Turaga kemunu sa rui cecere me kemunu curu ki na qou vale. Kemunu vosa ga sa na bula a qou tamata cakacaka. ⁹ Ko au e dua era vakarorogo vei au a sotia au kaya ki na dua me lako mai e lako mai, valata a cakacaka I ei e valata. ¹⁰ Ni sa rogoca ko Jisu sa rideutakina la sa kaya vei ira a vakamuri kota jiko, Au sa kaya vakaijina vei kemudou niu sa bera ni raica e dua a vakabauta e Isireli me vaka I ei a ona I levu. ¹¹ Au sa kaya vakaijina vei kemudou ni levu era na lako mai Natuicake kei na ra ka tiko sobu ena teveli kei Eparama, Aisake kei Jekope. ¹² Ia ko ira a luve ni Kalou era na viritaki ki na butobuto e tautuba ka ra na tagi kina ka vakasequruqurubati kina. ¹³ A sa kaya ko Jisu vua na turaganivalu, " Lako ni sa vakabulai iko a omu vakabauta, me vaka a omu vakabauta". Sa vakabulai a ona tamata cakacaka ena au sara ga mai ei. ¹⁴ Ni sa yaco yani ko Jisu ki na vale nei Pita sa raica ni sa curumi katakata sivia. ¹⁵ Sa taura na ligana ko Jisu ka sa biuti koya na tauvi mate. Sa duri cake na Vugoi Pita ka vakatekivu me veiqaravi vua. ¹⁶ Ni sa kayavi mai era sa kauta mai vei koya e lewe levu a tuavi mate kei na curumi yalo velavela. E wacarai ira a tevoro ena vosa ni Kalou ka vakabulai ira taucoko a baca. ¹⁷ Sa vakayacori kina a vosa ni paroCsai i Isaia a Parofita ni a kaya, " A sa colata ko Jisu Karisito a weta baca ena vukuna". ¹⁸ Ni sa raici ira a lewe levu ko Jisu sa kaya vei ira mera lako ki na tai kadua ni Drano mai Kalili. ¹⁹ Sa qai lako mai e dua a turaga ka kaya vei Jisu, " Vakavuvuli au na muri kemunu ki na vanua cava ga kemunu lako kina'. ²⁰ Sa kaya vua ko Jisu, " Sa vaqara a fokisi ka ra vaka sova a manumanu vuka, ia sa sega a vanua me vakotora kina a uluna a luve ni tamata". ²¹ Sa dua vei iratou a tisaipeli sa kerei koya, " turaga nu vakatarai au me'u la'ki buluji tamaqu". ²² Sauma ko Jisu ka kaya vua," Muri au mai, laivi ira a mate mera buluta a odra mate". ²³ Ni sa vodo ena dua a waqa ko Jisu era sa muri koya yani ki waqa a ona tisaipeli. ²⁴ Sa tubu mai e dua cagilaba ka sa tubu mai a ua lelevu ka sa ubia a waqa . ²⁵ Ko Jisu e moce no e waqa ka ratou sa lako mai a ona tisaipeli me vakayadraji koya ka kaya, Turaga nu vakabulai keta sa vakarau me keta mate". ²⁶ Sa kaya vei iratou ko Jisu," A cava dou sa rere kina, kemudou sa lailai a omudou vakabauta". Sa borisi ki na cagi kei na ua. Sa malumu na cagi ka sa malumu mai a ua. ²⁷ Era sa veikaya yakina ka qoroqoro ka kaya, " A mataqali vakaevei ka i ni sa talairawarawa kina a cagi kei na ua?" ²⁸ Ni sa yaco yani ko Jisu ki na yasana kadua e Kerikesa sa basika mai e rua a turaga e curumi rau a yalo velavela. E rau sa lako mai me sota kei Jisu. E rau vakaijikojiko ena i bulubulu ka ra sa rere ni siviji rau . ²⁹ Ni rau sa raici Jisu e rau sa kaila mai, " A cava me keirau valata vei kemunu a Luve ni Kalou. ³⁰ Ko sa lako mai me ko mai vakararawatakini keirou ni bera ni yaco mai a ona gauna?' ³¹ Edua a qele ni puaka levu era a kana tu ena tokaitua volekaji iratou. Era sa kerei Jisu a tevoro me vakatalai ira mera curuma a qele ni puaka mai ei. ³² Na gauna ga e vakatalai ira kina mai vei rau a turaga era a curumi ira a puaka ka ra sa kada sobu ena delana mai ei ka lade yani ki waitui ka ra mate taucoko. ³³ Ko ira ka vakatawa puaka jiko era sa domobula ka tuba yani ki na koro levu me ra talanoatakina a meca e yaco vei rau a curumi yalo velavela kei ira a odra puaka. ³⁴ Era sa lako mai me sota kei Jisu ni ra sa raici koya era sa kerei koya me biuta a odra yasana.