¹ Ni sa vakaojia taucoko ko Jisu a meca e via kaya vei ira a tamata me ra rogoca, sa qai curu ko koya ki Kapenaumi. ² Sa qai dua a bobula ni Turaga ni valu sa dau lomana vakalevu, da sa baca, ka sa voleka sara ni mate. ³ Gauna sa rogoca kina a turaganivalu ai Talanoa kei Jisu, sa qai Talai iratou eso a qase vei ira a Jiu, me ratou la'ki kacivi mai Jisu me mai vakabula a ona bobula. ⁴ Ni ratou sa yaco vei Jisu eratou sa qai kerei ko koya me vakabula mada a ona bobula, baleta ni ko koya sa dau yaga vakalevu vei ira a Jiu, ⁵ baleta ni sa dau lomana a weta vanua, ka veivuke talega ina ona tara a weta vale ni soro. ⁶ Sa qai lako vata kei iratou ko Jisu ki na vale ni turaganivalu. Sa bera ni yawa mai na ona vale, sa tala mai e so a ona i tokani me mai kaya vei Jisu, "Turaga nu kakua ni vakadrakaini kemunu, baleta ena tawa veiraurau veikemunu me kemunu curu ki na qo vale. ⁷ Ina jikina maiei, sa na tawa dodonu kina vei au me'u lakovi kemunu yani kina, Ia me kemunu kaya ga mai a vosa, me bula kina a qou bobula. ⁸ Ko yau talega au tamata dau vakarorogo ena bula ni veiliutaki, era jiko Talega a sotia era vakarorogo vei au. Au kaya me ra lako , era sa lako sara, au kaya ga me ra lako mai, era sa lako mai, kaya ga mera valata a meca maiei, era sa valata sara." ⁹ Gauna sa rogoca kina ko Jisu a meca e kaya, sa qoroya sara ga a turaga ni valu maiei, sa qai vuki vei ira a boka vakadua e dua a mataqali vakabauta vakeiei ina vanua taucoko ko Isireli. ¹⁰ Ia ina gauna ratou sa lesu kina ki na ona vale a turaga ni valu, sa ratou qai boka ni sa bulabula vinaka a ona bobula. ¹¹ Ni sa oji maiei, sa qai lako ko Jisu ki na koro ko Neini, ko koya kei ira a tamata era muri iratou jiko. ¹² Gauna sa volekata yani kina a matamata ni koro, sa sotavi ira a lewe vuqa ko koya ni ra sa colata jiko mai e dua a cauravou sa mate, ka luvena e dua a yada, ka sa lako vata jiko mai kei ira. ¹³ Gauna sa boka kina a yada iei ko Jisu, sa dua a ka a ona lomani koi koya ko Jisu, sa kaya vei koi koya "kua ni Tagi." ¹⁴ Sa qai lako yani ko Jisu ka tara a tavata kacu sa cdaji jiko mai kina a yagona a cauravou maiei, sa qai tu vakadua ko ira a oda jiko a tavata, sa qai vosa ko Jisu ka kaya, "Cauravou, au sa kaya mo ko tucake mai." ¹⁵ Sa qai yavu cake mai a cauravou ka mate iei, sa qai tekivu me vosa mai, sa qai soli koi koya vei Jinana. ¹⁶ Sa qai tuburi ira e dua a tamani rere levu, era sa qai vakamalotakina a Kalou, ka ra qai kaya sa jiko maliwai keta e dua a parofita levu, ka sa jiko vata kei ira a ona tamata a Kalou. ¹⁷ Sa qai tete yani ai tukutuku kei Jisu ki na vanua taucoko ko Jiutia kei na veivanua volekata. ¹⁸ Ia ko ratou a tisaipeli i Joni e ratou sa talanoatakina vei koi koya a meca e yaco. ¹⁹ Sa qai kaciva sara e rua a ona tisaipeli ko Joni me vakatalai rau yani vei Jisu me rau laki kaya vei koya vei koi koya, "Do iko djina beka a ona e dodonu me lako mai se, me deimami vakaraica tale e dua?" ²⁰ Ia ni rau voleka yani vei Jisu, erau sa kaya sara vei Jisu, "Sa vakatalai keirau jiko mai ko Joni a dauveipapitaisotaki vei iko me Taroga, "Se ko iko beka e dodonu me lako mai, se me keimami vakaraica tale e dua?" ²¹ Ia ina gauna vata maici, sa vakabulai ira jiko kina ko Jisu e levu a baca, ko ira talega a curumi jimoni kei ira tale eso era sotava e levu a leqa. ²² Sa qai sauma a odra taro ko Jisu, qai kaya veirau, "A gauna drau sa lesu take kina vei Joni drau qai kaya kina a meca drau sa mai boka ka rogoca. Sa rai tale ko ira a matakui, sa rogo tale ko ira a tuli, sa ra lako tale a lokiloki, sa vakasavasavataki ko ira a vukavuka, sa ra bula tale ko ira sa mate, ka sa kacivaki ai tukutuku vinaka vei ira era vinakata. ²³ Ko ira taucoko era sa vakabauti au me baleta a meca au sa valata, era na vakalougatataki. ²⁴ Ina gauna rau sa lesu tale kina ko rau a tisaipeli i Joni, sa qai talanoatakini Joni ko Jisu vei ira a tamata ka kaya vakaiei, "A cava nu dau boka mai lekutu ni kemunu dau lako kina?" "A vunigasau beka sa veisuayaki ina cagi?" ²⁵ (E dua beka a tamata sa vakaisulu ina dua ai sulu mamare? Raica, ko ira sa vakaisulu ina i sulu sau levu, ka jiko ina vanua sau lelevu, maiei era sa jiko ina vale ni tui) ²⁶ Ia, a cava sara mada nu ka boka? A parofita? Io, au sa kaya vei kemunu, sa levu cake mai na parofita. ²⁷ Ko koya saraga mai ei a ona ka vola i kina. "Dou raica, au sa tala yani a qou dau ni tukutuku me mada yani e matamudou, ko koya ena vakarautakina a omudou wakolo vei kemunu. ²⁸ Au sa kaya ona kina vei kemudou, "mai vei ira taucoko era sucu mai vei ira a yalewa, sa sega bau e dua e levu cake mai vei Joni." Ia ko koya sa lailai sobu mai na matanitu ni Kalou, sa levu ko koya. ²⁹ Ia, ko ira taucoko era sa rogoca, kei ira talega a dau kumuna ai vakacavacava, era cakadjinadjina kina Kalou. E ra sa papitasotaki mai vei Joni. ³⁰ Ia ko ira a farisi kei ira talega a dau vunau, era sa tawa via ciqoma ai naki ni Kalou ki na odra bula, baleta era se bera ni papitasotaki mai vei Joni. ³¹ Meu na qai vakatautavata takini ira ai tabatamata iei vata keina cava? Era sa vaka tu beka ivei? ³² Era sa vakatakini ira tu a gone lalai, era dau qito voli ena vei saqata, ka ra sa dau vei kacivi vakai ira ka kaya, "Keitoiu uvuca a i vakatagi, doui tawa meke, keitou lagata a sere ni somate dou tawa tagi." ³³ Ia a gauna e lako mai kina ko Joni a dau veipapitaisotaki, e tawa kana madrai , tawa unu waini, dou qai kaya, "Sa curumi ko koya e dua jimoni? ³⁴ Ia ni sa lako mai a luve ui tamata, sa kana ka unu, dou sa kaya, "Raica sa dua tamata dau kocokoco qai dau mateni a tamata kai ei, sa dau odra i tokani a dau kumuni vakacavacava, kei ira tamata i valavala ca. ³⁵ Ia, a vuku ga sa vakadonua ko ira a luvena. ³⁶ Sa dua vei ira na farisi sa sureji Jisu ki na ona vale me ratou laki kana vata. Gauna sa curu kina ko Jisu kina ona vale, sa vakarautakina sara a tepeli ni kana me ratou kana. ³⁷ E jiko ina loma ni tauni maiei e dua yalewa i valavala ca. Gauna sa boka kina a yalewa iei ni sa vakarau jiko a tepeli ni kana ina ona vale a farisi iei, sa kauta sara mai edua taraya Alapasita boiboi vinaka. ³⁸ sa qai yavu tu i dakui Jisu volekata yavana sa qai tagi vakalevu, sa qai vakabucia ko koya a yavai Jisu ina wai ni matana, sa qai qusia tale a yavana ina dauni uluna, sa qai umaca talega ko koya, ka qai walia talega a yavana ina waliwali boi vinaka moiei. ³⁹ Gauna sa boka kina a farisi ka veisureji a mea ka valata a marama iei vei Jisu sa qai kaya vaka iei ko koya, "Kevaka e parofita djina a tamata ka iei, sa dodonu me kila se mataqali yalewa vakaivei kaiei, ni sa yalewa i valavala ca ko koya. ⁴⁰ Sa qai kaya vei ko koya ko Jisu, "I Saimoni e dua a meca au via kaya vei iko. "Sa qai kaya ko koya, "Kaya ga mai qasenivuli." ⁴¹ Sa qai kaya ko Jisu, "sa lewe rua a tamata erau sa djinau ki na odrau turaga, e dua, sa lima a silini ka dua tale e dua a silini. ⁴² Gauna erau sa tawa sauma rawa kina a odrau djinau, sa qai vosoji tau ruarua. Ko cei vei rau ena lomani koi koya vakalevu cake? ⁴³ Sa qai sauma ko Saimoni ka kaya, "Au nanuma ni ko koya ka soli vakalevu kina a djinau." Sa qai kaya vei ko koya ko Jisu ko sa lewa na ka dodonu djina. ⁴⁴ Sa qai vuki ko Jisu ki vua a yalewa iei, qai kaya vei Saimoni. Raica a yalewa dodonu me ko ka valata vei au na gauna au a curu kina omu vale. E sega bau mada ga a wai ko vakarautakina me sava kina a qetewete ni yavaqu. Ia a yalewa iei, e savata a yavaqu ina wai ni matana qai qusia tale ina drau ni uluna. ⁴⁵ Ko iko mada ga, ko tawa bau umaci ay, ia mai na gauna taucoko au curu mai kina, sa tawa cegu a ona umaca jiko a qeteqete ni yavaqu. ⁴⁶ Ko tawa bau lumuta a uluqu ina waliwali. Ia a yalewa iei e lumuta a yavaqu i na ona i waliwali totoka ka boi vinaka. ⁴⁷ Ko koya ona au sa kaya vei iko, sa bokoci taucoko sara a omu i valavala ca baleta sa lomani cake vakalevu ko koya. ⁴⁸ Sa qai kaya kina yalewa iei, sa bokoci a omu i valavala ca tauciko. ⁴⁹ Ko ira taucoko sara era vakarau jiko i loma ni vale ma iei, e ra vei kaya kina, ko cei tale a tamata iei me dau bokoca a i valavala ca. ⁵⁰ Sa qai kaya ko Jisu kina yalewa mai ei, "Sa vakabulai iko a omu vakabauta." Lako ina vakacegu."