¹ E yaco kaiei ni ra sa wavokiji Jisu tu a tamata ka ra vaka rorogo kina Vosa ni Kalou, ka tucake tu i na baji ni drano ko Kenisereji. ² Ka raica e rua a waqa ina i yalayala ni drano. E ra sa lako yawa mai kina a gonedau ka ra sa savata jiko a okdra lawa. ³ E vodo ko Jisu kina dua vei ira a waqa I Saimoni, ka kereiko koya me tosoya yani ki wai me yawa vakalailai mai vanua. Sa qou ece sobu ka vakavulici ira a tamata mai na waqa. ⁴ Ni sa oji a ona vosa, sa qai kaya vei Saimoni, “kauta a qwaqa kina vanua nubu ka biuta sobu a omu lawa me dau a meca ko rawata.” ⁵ Sauma ko Saimoni ka kaya,”Turaga keitou a cakacaka ina bogi taucoko e sega bau da meca e rawa, ia ena vuku ga ni anunu vosa au sa na biuta sobu kina a lawa.” ⁶ A gauna e ratou valata kina iei e ratou rawata e dau a I wiliwili ni ika vakaitamera, ka sa kadresu a odratou lawa. ⁷ E ratou sa qai yalovi iratou a odratou i lala kina waqa ka dua me ratou lako mai ki vukei iratou. Ratou lako mai ka vakalewena ruarua a waqa, ka sa tekivu me dromu ruarua. ⁸ Ia ko Saimoni Pita ni sa boka, sa bale sobu ki yava i Jisu, ka kaya, “Turaga, lako yawa vei au, niu sa tamata i valavala ca.” ⁹ Ko koya kei ira taucoko ka ra jiko vata e ra sa qoroqoro e na levu ni ikae ra sa rawata. ¹⁰ Kei rau talega ko Jemesa kei Joni, rau levei Sepete, ko i rau a i lala i Saimoni. Kaya ko Jisu vei Saimoni, “Kakua ni rere, baleta sa na tekivu iei ko sa na qolivi ria a tamata. ¹¹ Ni ra sa kauta a odra waqa ki vanua, e ra sa biuta laivi a meca taucoko ka muri ko koya. ¹² E yaco iei ni a jiko e na dua a koroturaga, ka jiko kina e dua tagane vukavuka, ni sa boki Jisu, e cuva sobu ka modreji ko i koya, ka kaya, “Turaga, Kevaka Kemunu rawa ni vakasavasavatakini au.” ¹³ Sa qai dodoka ko Jisu a ligana ka tarai ko i koya, ka kaya, au rawa. Mo ko savasava. “vakaloulai ga sa yali a ona vukavuka. ¹⁴ Sa qai vakaroji ko i koya me kakua ni kaya kina na dua tale sa qai kaya kina, “lako ga ina omu i lakolako, ka vakatakei iko kina bete ka vakocabora a omu i soro me ka ni omu vakasavasavataki, me vaka a I vakaro i Mosese, me i vakadjinadjina vei ira.” ¹⁵ Ia a i tukutuku baleji ko i koya sa qai tete ga yani vakayawa, sa qou levu ga a tamata e ra lako vata mai me ra rogoca a i vakavuvuli ka ra vakobulai mai na odra baca. ¹⁶ Ia e dau vakalutu lo yani kina vanua dravuisiga ka masu. ¹⁷ Ia ni a veivakavulici jiko ina dua siga era a jiko kina a Farisi kei ira a i vakavuvuli ni lawa ka ra ece jiko kina ka ra lako mai na veikorokoro mai Kalili, kei Jutia kei Jeruisalemi. E veivakabulai ina kaukauwa ni Kalou, sa tu vei ko koya. ¹⁸ Ka iei era qai lako mai e so a tagane era laveta mai e dua togane paralasi ina dua a yaba, ka ra sa qai yasava e dua a wakolo me rawa ni ra kauta yani kina ki loma me rawa ni ra lai vokotora ina mata i Jisu. ¹⁹ E ra tawa boka rawa e dua a wakolo me ra kauta yani kina ki loma baleta ni sa oso, sa mani ratou kaba cake ki dola ni vale me tatou tukuca sobu mai, ina ona yaba, ina odra maliwa a tamata, me donua a mata i Jisu. ²⁰ Ni sa vaica a odra vakabauta, sa kaya ko Jisu, "Tagane, sa vosoji a omu i valavala ca". ²¹ Ko ira a vunivola kei ira a Farisi e ra sa vakataroga, ka kaya, “Ko cei ka vosa vakapelusipupi? Ko cei tale e rawa ni vosota a i valavala ca, a Kalou duadua ga?” ²² Ia ko Jisu, ni sa kila a odra vakasama, sa qai sauma vei ira ka kaya, ²³ A cava e rawarawa me kai, ‘ sa vosoji a omu i valavala ca’ se me kai ‘Tucake ka lako’? ²⁴ Ia maiei me me kemuru kila ni luveni tamata e tu kina a lewa I vuravura me vosota a i valavala ca. “ - e kaya kina tagane paralasi-- “Au sa kaya vei iko, tucake, taura a omu yaba ka lako kina omu vale.” ²⁵ Vakalailai ga sa mata cake i matadra ka taura kace a yaba ka koto no kina. Ka sa lako yawa yani kina ona vale, ka vakacaucautokina a Kalou. ²⁶ E ra sa qoroqoro Taucoko ka vakalagilagia a Kalou. Sa tarai ira a rere, ka ra kaya, “Keta sa qai boka da meca vakadomobula ni kua.” ²⁷ Ni gi a meca taucoko maiei, sa lako yawa yani ko Jisu mai na vanua maiei ka boka e dua dau kumuni vakacavacava a yacana ko lovou ni ece toka ina valelaca ni kumuni vakacavacava. Ka kaya kina, “Muri au.” ²⁸ Sa mani tucake ko livai ka muri ko koya, ka biuta tu mai a meca Taucoko. ²⁹ Sa qai valata ko livai e dua a kana magiji levu me baleji Jisu ina ona vale Era lewe levu a dau kumuni vakacavacava era jiko kina kei ra so tale a tamata e ra ece wavoki toka ina Tepeli ni kana ka ra kana vata jiko. ³⁰ Ia ko ira a Farisi kei na Vunivola era sa vakatukutuku vei ira a tisaipeli, ka kaya, “A cava ko lai kana ka unu vata jiko kina kei ira a i valavala ca?” ³¹ E sauma vei ira ko Jisu, “E tawa yaga a vuniwai vei ira tamata e ra bula vivaka; vei ira ga a baca. ³² Au tawa lakomai meu kacivi ira a i valavala ca me ra veivutuni.” ³³ E ra koya kina, “Ko ira a tisaipeli i Joni e ra dau lolo ka masu, kei ira a odra tisaipeli a Farisi e ra vaka talega kina. Ia ko ira a omu tisaipeli e ra kana ka unu.” ³⁴ Kaya vei ira ko Jisu, “e rawa ni dua e valata me lolo ko ira a weka ni tagane vakawaji ni ra jiko lako kei na tagane vakawaji? ³⁵ Ia ena yaco mai a gauna sa na kau yawa yani kina a tagane vakawaji mai vei ira, sa na qai gauna maiei me ra lolo kina. ³⁶ Sa qai vosa vakaibalebale talega vei ira ko Jisu. “E sega ena dresuka a jiki ni sulu vou ka banota kina a i sulu makawa. Kevaka e na valata maiei, e na kadresu a i sulu vou, kei na jiki ni sulu mai na i sulu vou e na tawa rauta a i sulu mai na i sulu makawa. ³⁷ E sega bau ena sovara a waini vou kina tavaya waini makawa. Kevaka e na valata maiei, a waini vou e na vakacakotetakina a tavaya, ka na tasova a waini, ka sa na wetea a tavaya. ³⁸ Ia a waini vou me biu kina tavoya ni wainivou. ³⁹ E tawa dua e sa unuma oji a waini makawa me via unuma a waini vou e na kaya, “E maleka ga a matua”