¹ Kemudou a wekaqu, dou a wekaqu, dou kakua ni taura vata a vakabauta a Turaga ko Jisu Karisito, a Turaga sa vakarokorokotaki kei ira a tamata sa djigitaki. ² Ia kevaka sa curu yani e dua ki na vanua ni omudou vakasoqoni vata ka vakamama koula kei na i sulu vinaka, sa curu Talega ki vei koi koya a tamata dravudravua ina i sulu qeleqelewa. ³ Ia kevaka ko sa raica e dua tamata sa vakaisulu ina i sulu vinaka ka kaya kina, "Iako mai ka mai ece toka ina vanua vinaka kai ei," ka ko na kaya ki na tamata dravudravua "Ia'ki tucake tu vakajikijilei ki ei," se "Mai ece toka i rucu ni yavaqu," ⁴ ko sa tawa viavia lewa vakai iko? Ka yaco kina mo ko dau lewa ina vakasama ca? ⁵ Rogoca sara kemudou a wekaqu, e tawa djigitakina beka a Kalou a meca dravudravua ina vuravura kai ei me ra vutuniyau ina vakabauta ka me odra a matanitu sa yalatakina vei ira sa lomani koi koya? ⁶ Ia kemudou sa beci ira a dravudravua! Ia a tawa ko ira a vutuniyau ka ra vakasauraratakini kemudou ka yaratikini kemudou yani ki na mataveilewai? ⁷ E ra sa tawa kakaya vakaca beka a yaca vinaka ka kemudou vakayacani kina? ⁸ Kevaka dou vakamuria vakavinaka sara a lawa, me vaka e kaya ai Vola Tabu, "Me ko lomana a we kamu me vaka ko sa lomani iko," kemudou na qai valavala vinaka. ⁹ Kevaka dou sa djigidiigi tamata, dou sa i valavala ca, kemudou sa beitaki ina lawa ni kemudou dau talaidredre. ¹⁰ Ko koya sa muria a lawa taucoko, ka sa cala ina dua ga a jikina, sa na beita ki ni sa voroka a lawa taoucoko. ¹¹ Ko koya ga sa kaya "Kua ni lasa i tuba," ko koya talega sa kaya, "Kua ni laba." Kevaka ko tawa lasa i tuba, ka ko laba ga, ia ko sa talaidredre ki na vunau. ¹² Dou vosa ka valavala vakakina me vakai ira sa lewai me vaka ai vunau ni veisereki. ¹³ Ni na lewai ka tawa lomani ko koya sa tawa loloma. Ia a dauloloma sa rawa a veilewai. ¹⁴ A cva vinaka keiei na wekaqu, kevaka e dua a tamata e kaya sa vakabauta, ia e tawa cakacaka? Ena vakabulai koi koya a ena vakabauta? ¹⁵ Ia ka vakaivei kevaka e dua a tagane se yalewa sa segabau a ona i sulu se segabau a kena kakana ina veisiga. ¹⁶ Kevaka ena dua veikemudou ena kaya, "Dou lako ina vakacegu, ka vakatakatatakini kemudou ka dousinai." Ka dou tawa solia a meca e yaga kina yagona, a cava mai betena? ¹⁷ Sa tautauvata ga, ni sa tu duadua ga a vakabauta ka sega bau a cakacaka, sa mate ga. ¹⁸ Ia kevaka e kaya e dua, "Sa tu vei iko a vakabauta ka tu vei au a cakacaka. Vakaraitakina mai a omu vakabauta ka segabau a cakacaka, ka'u na qai vakaraitakina yani a qou vakabauta ina qou cakacaka. ¹⁹ Kemudou vakabauta ni dua a Kalou; ko sa valavala vinaka. Ia a jimoni talega e vakabauta mai ei, ka ra sa ninini talega. ²⁰ Ko via kila ko iko a tamata lialia, ni sa mate ga a vakabauta ni segabau a cakacaka? ²¹ Sa tawa vakadonui beka ko Eparama a tamada ina vuku ni ona cakacaka ni sa vakacabori Aisake a luvena ina dela ni cabocabo ni soro? ²² Dou sa raica ni sa cakacaka a vakabauta ina vuku ni ona cakacaka, ka sa taucoko kina a ona cakabauta ena vuku ni ona cakacaka. ²³ Sa qai taucoko kina a vosa ni Vola Tabu ni kaya, Sa vakabauta a Kalou ko Eparaama, ka sa wili ko koya me tamata dodonu." Ka sa kai kina ni ko koya a weka ni Kalou. ²⁴ Ia dou sa raica ni sa vakadonui a tamata ina vuku ni cakacaka ka tawa vakabauta sai koi koya ga. ²⁵ E vaka talega kina ko Reapi a yalewa dautagane, sa vakadonui ina vuku ni ona cakacaka, ni sa vakacegui rau ka Talai yani ka vakalesui rau lesu tale ina dua tani tale a wakolo. ²⁶ Me vaka sa mate a yago ni sa lako laivi a yalo, sa mate vaka talega kina a vakabauta ni sa segabau a cakacaka.