¹ Ko au ko Jemesa ai talatala ni Kalou kei na Turaga ko Jisu Karisito, ki vei ira a yavusa e jini karua ka ra sa dui tayana. ² Kemudou a wekaqu dou nanuma me ka ni reki ni dou sa lutu ki'na ka ni veivakatovolei. ³ Dou kila ni sa vakatubura a dau vosota a vakatovolei ni omudou vakabauta. ⁴ Me jini vinaka a cakacaka ni dau vosota me kemudou vinaka taucoko kina me kakua ni dua a meca e yali. ⁵ Kevaka e dua e vinakata a vuku ia me kerea ki na Kalou ko koya ka solia vakalevu vei ira ka ra kerea ka tawa veivakaduiduitaki. ⁶ Ia me kerekere ina vakakauta me kakua ni vakajijiqa. Ko koya sa vakajijiqa sa vaka a ua ni watui sa veikauyaki ina dagi ka veitubuyaki. ⁷ Ia me kakua ni nanuma a tamata maici ni na rawata ola meca mai vua a Turaga. ⁸ A tamata lomalomarua sa yamekemeke a ona i valavala. ⁹ Ia me reki a tamata dravudravua ina ona laveji cake, ¹⁰ ia a tamata vutuniyau ina ona lolovira, ena yali laivi yani me vaka a se ni co. ¹¹ Ni na cabe cake a siga ina ona katakata ka vakaraqosalakina a co. Ena mira mai a sena ka na yali a ona rairai vinaka. Ena vakakina a tamata butuniyau ina ona i valavala. ¹² Sa kalougata a tamata dauvosota a ona vakatovolei, ni sa vakatovolei oji ena ra'wata ai sala ni bula ko koya ka yalatakina a Kalou vei ira a lomani koi koya. ¹³ Me kakwa ni kaya e dua, "Sa dau veretaki'ni au a Kalou," baleta a Kalou e Tawa dau veretaki ki na meca ca, e tawa dau veretakina da tamata ko koya. ¹⁴ Sa dauveretakini koi koya ga a tamata yadudua ina ona garogaro ca ka powani ko koya. ¹⁵ Ni sa kunekune a garogaro ca, sa vakasucuma a i valavala ca, ni sa sinai a i valavala ca, sa vakasucuma a mate. ¹⁶ Dou kakua ni cala, kemudou a wekaqu lomani. ¹⁷ A veimeca vinaka taucoko ga e lako mai cake. E lako sobu mai no Tama ni rarama. E segabau vei koi koya a veiveisau se i yaloyalo ni veigoleyaki. ¹⁸ Sa djigitakini keta a Kalou me keta vakasucumi ena vosa ni djina, me keta i sevu ni meca ttaucoko ga ka buli. ¹⁹ Mo dou kila jiko a wekaqu, ni tamata taucoko me dau totolo ni vakarorogo, berabera ni vosa, ka berabera ni borisi. ²⁰ Ni sa tawa vakatubura a dodonu kina Kalou a boriborisi ni tamata. ²¹ Ko koya kai ei mo biuta laivi kina a veimeca polopolowa kei na meca ca taucoko ga. Ka vakabauta ina yalomalua a vos sa tei ina lomamudou me bula kina a yalomudou. ²² Mo dou rogoca a vosa ka kakua ni rogoca wale ga ka vakaisini kemudou kina. ²³ Kevaka e dua e rogoca walega a vosa ka tawa muria, sa tautauvata kei na tamata i sa la'ki ilova a matana ina iloilo. ²⁴ Ni sa la'ki ilovi ko koya sa qai lako laivi yani ka sa tawa nanuma vakasauri a ona i rairai. ²⁵ Ia a tamata sa vakaraica matua sara a lawa ni veisereki ka valata sara, sa tawa rogoca wale ga ka tawa ligoca, ia ena kalougata kina ko koya. ²⁶ Ia kevaka e dua veikemudou sa nanuma sa lotu, ka tawa tarova rawa a yamena, sa vakaisina a yalona, sa segabau a betena a ona lotu. ²⁷ A lotu savaasava ka tawa cala ina mata ni Kalou ko Tamada e vakaiei: me dau vukei ira a luveniyali kei ira a dawai ni ra sa rarawa, me qarauni ko koya talega me kakua ni qeleqelewa ina meca ni vuravura.