¹ Ni sa oti a siga ni vacecegu, o odru o Meri a yalewa ni Makitala, ei Meri a tinai Jemesa ei Salomi, dru sa volia ai lumi vasaluwai, medru lai lumiti oya. ² Na rawarawa caca i nai matai ni siga ni wiki, dru sa qai lao mai nai bulubulu ni sa qai cabe a siga. ³ Dru sa qai veitarogi vai edru, "O cei e na vaqiqia tani a vatu ina taari ni bulubulu?" ⁴ Ia ni dru sa iga cae, dru sa igavia a batu, ni sa tui a levu, qai sa vaqiqi tani tu. ⁵ Ni dru sa curu i nai bulubulu, dru sa igavia e dua a turaga ni sa vaisulu balavu vulavula tu, qa notu ina yasana i matau, qa dru sa rere. ⁶ Sa aya ve edru o oya; "Dou uwa ni rere," Dou sa vaigavi Jisu a ai Nasareci, o oya ma vaoti ina Kauvelatai, Sa tucae leqa o oya! Sa maqa leqa ga ni notu ei, dou igavia a vainua ma vaotori ina. ⁷ Dou lao, dou lai aya vei edru a tisaipeli ei Pita, "O oya sa lao ima da veiemudou i Kalili, dou na qai igavi oya ina ⁸ Io dru sa sautaninini qa idroa, qa dru sa lao tani mai vatotolo qa ubu mai nai bulubulu; dru sa maqa leqa ni aya e dua a a vei dua, ni dru sa rere. ⁹ Ni sa tucae leqa o Jisu na roaroa caca i nai matai ni Siga ni wiki, qa basia matai o oya vei Meri a yalewa ni Makitala, o oya ma utia tani mai ve eya e vitu a tevoro. ¹⁰ Sa qai lao o oya qa aya ve edra e dra dau notu vata ei oya, ni dra sa rarawa qa tagi. ¹¹ Ni dra sa rogo ni sa bula leqa o Jisu, ni dra sa igavi oya, qa dra maqa ni vabautia. ¹² Ni sa qai basia o Jisu, sa dua tani a igaigavi ni ona gau vei e dru a lewe rua, na gauna dru sa lao bale ina ina dua a yasani vanua. ¹³ Ni dru sa lao qa aya ve edra a ena vo; qa dra maqa ni vadinati e dru. ¹⁴ Sa oti, sa qai basia ve edru a lewe tiniadua, ni dra sa ana no; Sa qai vunauci edra, na odra lailai ni vabauta, ei na odra yalo kaukauwa, ni dur sa maqa ni vadinati edru na ona tucae leqa mai na mate. ¹⁵ Sa qai aya veedru. Dou lao waqe i vuravura qa vunautainia ai tuutuu re vei edra tauco i vuravura. ¹⁶ O oya sa vabauta qa papitaiso na bula, ia e na civoti ga o oya sa maqa ni vabauta. ¹⁷ O oya ai vatailaila ai e dra na velee ga o odra sa vabauta: e dra na utia a tevoro i na oqu yaca, qa dra na vosa tainia a vosa ni veivanuatani ¹⁸ edra na tomi iya cae a gata na odra liga; ia ni dra sa somia a a e gaga sara, e na maqa ni a ca veedra, e dra na tabai e dra a tamata tauvi mate qa dra na qai bula ina. ¹⁹ Ni sa vosa oti vei edra a turaga o Jisu, sa qai di cae i lomalagi, qa no sobu in a liga i matau ni Alou. ²⁰ Dru sa qai lao waqe a tisaipeli qa vunautainia ai tuutuu re ina vei vanua, Sa qai lao vata ei edru a turaga, qa dra sa vadinadina tainia i vuravura ai vatailaila e i na vosa e na muri.