1 E na o na masu tio o Jisu na dua ti'i ni vanua a na! ni sa qai tinia a o na masu sa qai aya vei oya e dua ona tisaipeli "Turaga mi au va vulici ei mami ra na masu, me mami masu tautau vata ni va vulici edra a ona tisaipeli o Joni." 2 Sa qai aya vei edra o Jisu "Ni o dou sa masu dai aya!" " Tamai eimami mai Lomalagi me va ro'oro'o tai a omiau Yaca. Me yaco mai a omi au Lewe. Me ca'a a lomami au i vuravura me e na ga sa ca'a mai Lomalagi. 3 Mi au solia mai vei eimami ina visiga yadua a magiti e rauti eimami. 4 Ia mi au ua ni civo ti eimami e na vu'u ni oimami valavala ca ni mami sa maqa leqa ga ni dau civoti oya ei valavala ca no vei eimami , Mi au ua ni di eimami i na vere, qa mi au vabulai eimanu mai na ca 6 5 O cei vei emudou e'sa dua a we a na sa lao mai vei ea ina lomaloma ni bogi qa mai aya vei ea "Neaqu Au erea mo solia walega maiv ei au e tolu a i buli madrai /v 6 E dua tio a oqu vulagi e na mai va'acegu vei au ni bogi au, qa se maqa no vei au a magiti meu solia vei ea. 7 E na qai tovola mai o ea. Lao lai va cegu ua ni mai va o ca i au. Au sa maqa ni rawa ni tu cae meu solia vei io. 8 Au sa aya vei emudou e na maqa ni rawa ni cata a wea na. E na tu cae ga qa solia a vei'a e retia a weana. 9 Au sa aya leqa ga vei emudou "Dou ereere ena soli vei emudou. Dou ve une dou na qai Une rawa. Dau tui tui e na qai do lavi vei emudai. 10 E na soli vei ea yadua sa ere ere, qa une o oya e va u'u. Ia ena do lavi vei oya leqa ga e tu'i tu'i. 11 E na dua lu vei emudou a tama ni gone, e va'a e mai ere madrai vei oya a luvena e na solia vei eya a vatu? Sa e va'a e ere ia ena solia vea vei oya a ga ta 12 Qa e va'a e ere yaloa ena solia bea vei yea a bati basaga. 13 Mo dou ila a tamata ca, dou dau solia ga vei edra a luvemudou. Sa na qai dina va levu ca e ni na dau solia a yalotabu o ea Tamamudou va lomalagi vei edra sa ere ere vei ea. 14 Sa sqai utia tani tio e dua tevoro o Jisu ni ma tamu rawa tu ni vosa. Ni sa leva a tevoro sa qai vosa mai o oya ma galu tio. Sa dra qai urabui tauco'o ga. 15 Ia eso vei edra e ra aya ni utia a tevoro i na Kaukauwa i Pielisepupi o oya odra Turaga a tevoro. 16 E so edra va tovolei oya qa ra gutia me ra une e so ai va tailaila mai Lomalagi. 17 Ia o Jisu sa ila oti a odra va nananu, qa aya vei edra. A matanitu tauco'o e dau vei vala va ai ea ga ena rusa. ia a vale e na veivala ga va ai ea e na bale. 18 E sa veisei ga va ai ea o Setani e na qai tu cae rawa va cava a ona matanitu? ni dou aya no niu utia no a tevoro na Kaukauwa oi Pielisepupi. 19 Ia qa e u utia a tevoro na Kaukauwa i Pielisepupi? Qa mudou na qou utia na Kaukauwa oi cei? O oyua ai era na uti emudou ina. 20 E u sa utia a tani a tevoro i na liga ni Alou, sa na qai yaco vei emudou a matanitu ni Alou. 21 E dua tamata Kaukauwa sa va yaragi tu ga vatawa nia ona vale, sa na tu va re ga a ana i yau. 22 Qa e sa tu vei ea e dua e uasiviti oya a ona Kaukauwa qa rawati oya, sa na tari a ona i yaragi tauco'o ga sa va raravi voli ina, sa qai vei vota ya ina a o na yaragi ni valu. 23 O ea e maqa ni tovata ei au, sa i to tani. ia o ea e soqona vata vei au sa dui biubiu tia. 24 Ni sa lao tani a vei a ma awa e tu vei ea, sa va une a vanua dravuisiga me cegu ina. 'Qa e va'a ena maqa ni une ena lesu via leqa a vanua ga ma no tu mai ina. 25 Ni sa une sa tavirainia qa u'utainia 26 Sa qai lesu qa dia lesu leqa e vitu leqa a yalo ca me levu sara ena ca, edru sa qai curu ina qa dru no tu ina. Sa ca va lem sara o oya, qa lailai a ona a ca i mada. 27 Sa yaco ai ni sa cavuta oti a vei a ai, sa gai vosa mai e dua ena marama na vanua ma ra tio lelevu ina, " Sa Alougata va levu a ete o Sucu mai ina vata sucu o sucuma mai. 28 Sa aya vei edra "Sa Alougata va levu o oya sa rogocia a vosa ni Alou qa va bautia. 29 E dra sa qai soqoni vata no ga mai a tamata, qa dra vei sugusugu no mai. Sa qai vosa vei edra qa aya "Ai taba tamata ca edra dau tarogia ai vatailaila, ia ena maqa ni soli vei edra e dua ai vatailai la, ia ai vatailaila ga io Joni a Parofita. 30 Me ena ga ni sa mai vatailaila o Joni vei edra a ai Ninive, e na ve ana leqa ga a Luve ni tamata vei edra ai taba tamata ai. 31 E na tu cae a Ranadi ni ceva qa vadina dina tainia a odra cala ai taba tamata ai, e na veilewai, ni ma lao mai o oya na dua yasa ni vanua va yawa sara ei Vuravura me mai rogocia a Vu'u io Solomoni qa une ni no tu leqa ga ina e dua e Uasivi sara vei o ya. 32 E dra na tu cae a ai Ninive me dra va dinadina tainia a odra cala ai taba tamata ai, ena veilewai me ra veivutuni nai va vuvuli io Jona qa dra une ni no tu ene e dua e uasivi ca e vei Jona. 33 E maqa leqa ni dua e va'a reana a cina qai lai vunitainia na dua ti'i na tani se na ru'u ni va'a rau sila e na biu ga na e na i tutu, me dra une a rarama o edra a curu mai. 34 A cina ni yago a mata; e va'a e a re no a omu mata, sa na rarama ina omu gau tauco'o, e va'a e ca e na Iloilo a omu gau tauco'o. 35 Mu dou qai va Une se sa iloilo a rarama e tu e na omu loraga. 36 O oya ai e sa rarama a omu gau tauco'o qa maqa e na ti i e iloilo ena rarama tauco'o a omu gau, me tautauvata ga ni sa cinavi emudou a cina sa ramase sara. 37 Sa yaco ni sa vosa oti tio o oya sa qai sureti oya e dua a Farisi me dru lai vasigalevi vata, sa qai dabe sobu o oya me ana. 38 Ni sa unei oya a Farisi ni sa ana no, sa qai urabui va levu ni maqa mada ga ni vuluvulu i mada 39 Sa qai vosa vei oya a Turaga! "Omudou a Farisi dou sa vasavasava tainia a bilo vata ei a dari e dakuna ga lomamudou sa Sinai na daubutako ei na i valavala ca. 40 Dou yavu yalowai! E maqa bea ni o oya ga e bulia a tuba e bulia leqa ga a lomada. 41 Solia vei edra a dravudravua a vei a e tu i lomamudou, e na qai savasava a vei a tauco'o ga omudou vele'e. 42 E ca vei emudou a Farisi ni dou a katini ni acu ca ei na vei drauni acu tauco'o ga mai na omudou teitei, iaqa dou sa biuta tani a lewa dodonu vata ei a loloma ni Alou. O oya vei a ai e dodonu mo dou ua ni biuta 43 E ca leqa ga vei emudou a Farisi! ni dou sa dau o co veia ai nono i mada o ya era dau no i na a qase ni lotu ei na omudou dau vei i da vai'i na vanua ni volivoli. 44 E ca vei emudou, ni dou sa tautauvata ei a i bulubulu. e maqa ni unei! e dra lao voli waqe ina a tamata qa ra maqa ni ilai 45 Sa qai tarogi oya e dua Dua vunau va vuvuli ni o sa aya ai o bilitai eitou leqa ga. 46 E ca leqa ga vei emudou a Dauvunauni dou dau va ocai edra a tamata nai colacola e bibi sara ni colati, qa dou maqa ni tari a i colacola ana na omudou qaqalo. 47 O mu dou sa ca leqa ga ni dou tara no a vale ni odra bulubulu a Parofita ni dra va mate ga o edra omudou qase. 48 O mudou sai va dinadina ni vei a edra vele'e a omudou qase ni dra vamatei edra a Parofita qa mu dou tara a edra vale ni bulubulu. 49 O oya ai a Vuna sa aya ina a Alou. A na talou edra waqe a Parofita ei edra a Apositolo, qa so vei edra era na va mate qa va caca ni edra. 50 E na qai tarogi ina ai taba tamata ai ena edra dra a parofita tauco'o ga e ra va davei a edra dra mai na i va'a tei'ni ei vuravura. 51 Me teivu mai na dra i Epeli qa yacovia a drai Sakaraia o oya a va matei na tadrua ni cabocabo ni soro Au sa aya va'a i dina vei emudou Omudou na tarogi ina ai taba tamata ai. 52 E ca leqa ga vei emudou a Dauvunau ni dou sa biuta tavu au dola vu vu'u dou maqa ni curu ina, qa dou tarovi edra leqa ga me dra ua ni curu. 53 Ni sa oti ovia tio ene o Jisu, sa dra qai ei evi oya toa o edra a vuvuvola ei edra a Farisi me ra va tarogi oya no. 54 E dra sa gutia me dra lawai tai oya me dra rogocia e dua a me ra beitaini oya ina.