¹ Kambo kenemuya , nobana kuliswe, kuluzyalo lwa Leza , mutondezye milili yenu ibe cipaizyo cumi, cisalala, citambulika kuli Leza . Oyu ngomulimo wenu umwelede. ² Mutabi anga miceto yecino cindi, pele amusanduke kukucitululwa kwe mizezo yenu. Amucite eci kuti muzibe cili kabotu, citambulika, ape ncayanda Leza. ³ Ikuti kuluzyalo ndundakapegwa ndambila nywebo nonse akati kenu: utaliyeyi lwako kwinda mboelede, pele mwelede kuyeya columuno, umwi oumwi mbonyina mbuli mwelwe wolusyomo olo Leza ndwakamupa. ⁴ Kambo mbuli mbotujesi zizo zinji mumubili womwi, pele kutainsi kuti ziza zyonse zijesi mulimo welene. ⁵ Munzila yelene, iswebo tobanji tuli mubili womwi muli kilisitu . Ape tuli zizonyina umwi oumwi. ⁶ Tulijesi zyabelo zindene kuluzyalo ndutwakapegwa,kutina cipego coumwi nkusinsima, amuleke ci citwe kwelanika omwelwe wolusyomo ndwajesi. ⁷ Kuti na umwi cipo cakwe nkukutoka, amumuleke akutoke. KUti na umwi ujesi cipo cokwisya, alekwe aisye. ⁸ Kuti na umwi cipo cakwe nkukombelezya, alekwe akombelezye. Kuti na umwi ujesi cipo cokupa , amumuleke acite namu bwelede. Kuti na umwi ujesi cipo cobwendelezi, amuleke acite cobusungu. Kuti na umwi cipo cakwe cili mukutondezya luzyalo, acicite olumwemwe. ⁹ Luyando lwenu lutabi lokupaupa amenso . Amusesemwe kububi; amukakatile kububotu. ¹⁰ Kwindila muluyando lo bwana nyina, amulemekane kuli umwi oumwi , kwindila mubulemu, amulemekane umwi oumwi. ¹¹ Mutabi bakandu kubusongu, kwindila ku muya, myoyo yenu aipye . Kumanin mwami milimo. ¹² Amube obulangilizi cokukondwa, okujatilila nikuba cindi ca mapenzi. Okujatisya kokumba. ¹³ Amwabane mubucete bwa bantu baleza busalala. Amujane nzila zinji mukutondezya luyando. ¹⁴ Amubaleleke abo bamupezya; mubatembaule ape mutabapilusizi. ¹⁵ Amulekelelane abo babotelwa; amulile abo balila. ¹⁶ Amube amuzezo welene kuli umwi oumwi. Mutayeyi nzila zyokulisumpula , pele amutambule bantu balicesizye. Mutabi basongo kumizezo yenu. ¹⁷ Utabbadezi naba womwi bubi kububi. Cita zintu zibotu kumenso abantu bonse. ¹⁸ Na cilakonzeka, kambo eci cimvwi kuli yebo, mponya mulumuno abantu bonse. ¹⁹ Mutabi ezikoto lwenu, nomuyandwa, pele amupe nzila bukali bwa Leza. Kambo cililembidwe, lubeteko ndulwangu; mebo ndiyobwedezya, mbwamba mwami.'' ²⁰ Pele '' kuti na mulwani nyoko ulienzala mupe alye na ulienyota, mupe anywe. Kuti wacita namu, ²¹ ulalundika malasya o mulilo amutwe wakwe,'' Utazundwi kububi , pele zunda mukucita bubotu.