¹ Ma'jo le'jo opko opko amba anya lelega ri pi ni, masa ma mo'di amba anyi ani pi sadeni candi Kristu dii, ongu masa mamu memuru yayi mule e'detele ri ni aga. ² Anyeleyi bilo Rubanga di anya diga ri, anyinde a'i di-ari anyi laka ri ku, ti anya leka si, kende Rubanga a lezo anyede ri ana-limi dinja di si ku, ki le si. ³ Anyolu 'ba dige kende opi duku 'ba anya diga ile ni. Rari anyolu ovi du bilo ni ndele. ⁴ De indi leyi Amba ri kumukelende ra, anyivo anyesu anyesu tegia opi di yayi di ri ra. ⁵ Ovi alu ri ani, anyi yayi, anyeri 'ba amba. Anyi tuwadu, anyulusuru olu i'bwwe si pi anyede i'bu anyi ni anya lelega. A'dusiku Rubanga ku'ja 'ba recu'ba ri to, ti Andaa kuke kiza 'ba olu'ba 'di ri ni . ⁶ Disidu anyolu 'di Rubanga a di opko ri ni ga dudu kenga anyi oru de saa na kumu kesa ra na'i. ⁷ Anyiwa anya icandi tuwadu Andaa paga a'dusiku Andaa kura anyi. ⁸ Anyolu anyami kolu ngbo, anyinde nga losodu. Anya avire, Satani ni kalamu ibi lu'dure ri ani kundu mo'di andaani vule cho. Anyede opko anyi'ja andaa to. ⁹ Anyede opko anya a'i ni ga. Anyina ra a' i 'baazi vudige 'dia ripi saa kepikii asi icandi ovi ileni ri pi ni ga si. ¹⁰ De anye candi ru gaangwadu ra, Rubanga ni kize tuwadu to pi anyini lungwere yayi Andaa di lokore ku Kristu ni aga ri kumuku'ba anyate ra ku'ba anyede opko, pi kumu kemba anyi ra. ¹¹ Keri kolu Andaa ni tadu tadu. Amen. ¹² Mara Silvano ni kende adozi egeni le wari ani, ongu macwi anyini le'jo gaangwadu ra andaa di ga si. Make anyini le'jo opko rii ongu ma'joo anyini a'jo le'jo ma cwile anyini ile kiza gba Rubanga dii. Anyede opko laka ¹³ zi Bablonia ga rii ovile anyito kare aluga rii, zi anyi laka. Ongu Marko ma ngwa 'i saa zi anyi laka. ¹⁴ Anyiziru anyianyini elemuu njuka lale si ri si. I'bwe kolu anyi Kristu ni aga ri to tuwadu.