¹ Mo'di alu alu a'ire a'jo Yesu ni Kristu ni Rubanga a ovile ri'i ri andaa nin'burabRubanga di'i, ongu mo'di zi mo'di 'bura tire ni lele ri, kule andaa 'bura saa to. ² De amale Rubanga ri ra, ongu amoko Andaa cara ni vu 'i, di ke'be amaniye a'jo amale boronji Rubanga di. ³ A'dusiku Rubanga ni leka ni Andaa car ni vu okoka. Ongu cara Andaa di angi ama dige ku. ⁴ a'dusi mo'di alu alu Rubanga a tile ni ri kuzwa vu ra. Nga amazwa du vu ra ri ama a'i 'i. ⁵ A'di'i adi kuzwa vu wa ri'i? Mo'di a'ire a'jo Yesu ni 'Bura Rubanga di'i ri'i ku ⁶ Yesu Kristu ni mo'di anda emure iyi to pi eri to r'i. Emu iyi to a'dule papala ku, ti emu iyi to pi eri to saa. ⁷ Endi Ole ni Andaa sadeni 'i, a'dusiku Endi andaa ni gba. ⁸ 'Disidu sadenia aa na: Endi Ole 'i, iyi pi eri to; a'i na 'di le'jo a'ia sadeni di esi si ra. ⁹ Ama'i sadeni 'ba a ngele ri, ti sadeni Rubanga di amgbu zwa a'idi ra. 'Di le'jo sadeni Rubanga di'i, Andaa ngele Ngwa a ruge r'i. ¹⁰ Ayosi mo'di Rubanga a Ngwa ni a'ire ri aa sadeni to andaa 'aga andaa nga si. Mo'di Rubanga ni a'ire ku ri keco Rubanga ni enjo, a'dusiku kesuo andaa a'i sadeni Rubanga di Andaa ngele Ngwa a ruge ri kuru. ¹¹ Sadeni ile andaa ni a'jo Rubanga ke amani lidi lokore ku ri ra, ongu lidi 'di aa Ngwa ni 'aga. ¹² Mo'di Ngwa to ri aa lidi lokore ku ri to, mo'di Ngwa Rubanga oli oko ri lidi oko. ¹³ Macwi le'jo 'di anyini, anyi 'ba ru Ngwa Rubanga di ni a'i'ba ri ni, dudu anyini a'jo anyi 'ba lidi lokore ku ri to 'i. ¹⁴ Nga 'bare anolu igeni to ANda ru ge ri di 'i, de ama'i nga Andaa di si esu amako nga Andaa lele ri ni vu 'i, Andaa keri ama elegi. ¹⁵ 'Disi de amani a'jo Andaa keri awa elegi, amaniye wo amesu nga ama a'ile Andaa di si ri ra. ¹⁶ De mo'di kunde adozi kede enji atere 'ba zire de aga ku r'i, kulee kelegi andaa si, pi Rubanga kumu kuke andaa ni lidi, a'i 'ba enji ede'ba ate da ni ku ri pi ni. Enji zi'ba aa kuzi 'ba da aga; ma'jo ku akelegi ovi enji ileni ri pi si. ¹⁷ Le'jo ego tuwadu 'ba a edele ri, enji, ti enji zi'ba aa zi mo'di da aga ku.('D'i ovidu mo'di a'i ku, kusa ni ku 'ibu Yesu a edele kuruce dige ama enji si ri nga nika ku si.) ¹⁸ Amani ra, mo'di Rubanga a tile ni ri olu enji edere ga ku, ti Rubanga a Ngwa kumuba ta na losodu, ku'ba avire lo andaa ni ku. ¹⁹ Amani ra ama 'bonji Rubanga di 'i, pi vu di ndutu Avire a diga. ²⁰ Ongu amani ra, Rubanga a Ngwa ni emu ra, eke ama ni mo'di ri ni nika, ongu amalu mo'di anda ile a 'aga, a'dusiku amalu Andaa Ngwa 'aga, Andaa ni Yesu Kristu 'i. 'Di Andaa ni Rubanga gba ri 'i, ongu 'di ayo lidi lokore ku ri 'i, ²¹ Maa 'bonji, anyekuka ru, anyiru ori in ku.