¹ Mo, Pol ixklav dji Bõdje i thavaio dji Jezi Khi, mo ekhi sa pahol let-la, li voie mo pu bai fos pu ide pou dji Bõdje pu ie ixpua hete pi fo, i pu fe ie konet lavehite-la ki no Ka mõthe. ² Sa lavehite-la Ka bai ie espehãs i paciãs dji lavi ētehnel, ki Bõdje, ki pa puve fe mãto, phomet ãvam kumasmã dji tã-la. ³ I lãda mumã jis li deklane sa pahol ki no Ka pale pu tut pov. Pu zod dji Bõdje, no sēie li bai mo sa thavai pu fe pu li. ⁴ Mo ekhi pu u, Tixto, mo uvemã pitxit lada ixpua, sa ixpua ki a u pa e mo pa; ki Kõtatmã dji Bõdje, Papa dji Jezi Khi, no Sēie hete ke u. ⁵ A pusa mo lese u lãdã zile dji Creta pu kõplete u thavai i ieve presbítero pu kumãde leglis-iela lada xak pei, kõfõm mo mõthe pu u. ⁶ I sa djivet sa ūm hõm pu pies mum pa pale dji mal dji li, djivet sa hõm dji um fãm i so pitxit-iela djivet leve ke pies mum. ⁷ Kumã hespõsav dji thavai dji Bõdje, nesesite ki adjimisthateia la djivet sa ūm hõm pu pies mum pa pale ãiē dji li, li pa djivet gho vei, i pa kõtã bhuiba, pa kõtã bue djivē boku mixã, pu li viv biēm, tu tãm so txto kõtã. ⁸ O li djivet husuve mum la so Kaz, li djivet sa kamahad dji biēm, i ūm mum biēm jis. ⁹ Li djivet hete fiãm lãdã pahol-la, ki mehite kõfiãs, i ki li jis lãdã pahol-La, kõsã li puve ide vot-iela lãdã pahol- la, i osi mõthe ve defo, dji sa mum ki kõt sa ki no Ka mõthe. ¹⁰ Pase li gãiē boku, ki vini dji judeu, pase ie kõt i ie Ka kuiēne vot-iela, ke ie kuienad. ¹¹ No besuē fe ie hete dji kose pase ie Ka jenē lafami-iela ãtxe , pase ie Ka mõthe sa ki pa djivet, pase ie lide hene lasu laxãm. ¹² Exaktamã ūm dji ie, sa ūm profeta dji zile dji Creta, ki mum ki dji: sa mum ki Ka hete lãdã sa zile dji Creta i iela Ka hene fe mãto ie Kumã animal sovaj, ie sãble mum ki feiã ki Ka hēn majinē lasu mãje. ¹³ I li gãie hesõm kã li dji sa. A pusa, zot gãie dji pini sa mum ki pa siaie, pu zot hete fiãm divã Bõdje. ¹⁴ Hete dji bai kõfiãs pu ie ixtua pa kute ixtua dji õm ki Ka sotxi dji lavehite dji Bõdje. ¹⁵ Tut jis pu sa ki jis; pase ãie pa jis pu sa ki pa jis; i pu sa ki pa Ka khe, pase ie gãie um marginaisõ ki sal. ¹⁶ Ie dji ki iē konet Bõdje,mē sa ki ie Ka fe Ka mõthe ki sa a pa lavehite tut tã ie kole, mixã i mal leve, ie pa kapab pu fe ãiē ki bõ.