¹ Jesu nakabira mubwato, akuyenda kushilya, akezya kuhura mu ntoropo yakwe. ² Cware, bokumuretera mukwame ozyo karwara ruñañali narere heshasha. Aha abona entumero yabo, Jesu aku sumwina mukwame ozyo karwara ruñañali, "Mwanangu, obe muntabo, cibi cako cakwatirwa." ³ Cware haho, bañoli bamwi boku amba hakati kabo, "Ozyu mukwame akwesi enyefuro". ⁴ Jesu kazyi mihupuro yabo aku ta, "cinji aha munahana bubi mumyozyo yenu? ⁵ Cware eciyambo cintore njecibo 'zibi zenu za kwatirwa' kapa kuwamba e 'zyimane oyende'? ⁶ Kono e muzyibe kutae Mwana wa Muntu akwesi amanta mwi fasi oku kwatira ezibi,..." akuwamba ku muñañali, "buke, nanune eshasha lyako, nokuyenda kujuo yako." ⁷ Cware mukwame okuzyimana nokuyenda kunjuo yakwe. ⁸ Hababona bulyaho bantu, nebakomokwa noku rumba Nyambe, ozyu naha bantu amanta obulyaho. ⁹ Aha ahitaho Jesu kuzwa ko, akubona mukwame akuiwa Mateu, ozyo kakere hacibaka ca be mutero. akumuta ee, "Ndicilire." Akuzyimana noku mucilira. ¹⁰ Aha akara hanshi Jesu kuti alye, kwakezya be mitero ne bantu ba batendi bezibi boku kezya kukulya ne Jesu nebarutiwa bakwe. ¹¹ Hababona bulyaho baFalisi, bokubuza barutiwa bakwe ee "Zinji alila na bantu bemitero ne batendi bezibi?" ¹² Aha ashuwa bulyaho Jesu sata e, "Bantu abakaba rwali mumubili kaba kabashaki omusiriki, mbita bena barwara. ¹³ Muswanera kuyenda mukakitute entaruso eyi 'Nditabera cishemo kali cintabero.' Kakuli kali nenda kezya ku kukuwa bacena e babake, kono nenda kezyera batendi becibi." ¹⁴ Cware abarutiwa ba Joani bakukezya kwake noku kezya kuta e "Cinji aha tukinyimanga ezilyo ne maFalisi, kono abarutiwa bako kabakinyimi zilyo?" ¹⁵ Jesu akuba taba e, "Aba bayenda kumukiti we cinawenga, bakaranga no musheshi ne myozyo icokete? Kono mbolikezye ezyuba aha omusheshi shana hindiwa kwabo, nga shaka neba kinyime zilyo. ¹⁶ Kwazya zyo arukira cisira cihya hecizyabaro cakare, kakuli kasira mboka ñatuke nokuzwa kuci zyabaro, hape mbociñatuke hawa kuhitilila. ¹⁷ Hape bantu kababiki veine mumabotela ezikabi ze veine nja. Habashitenda bulyaho, amabotela ezikabi mboa ñatuke, ne veine mboitike nezikabi ze veine mbozi shinyehe. Kono, babika eveine nja, muzikabi ze veine zihya, mi zonshe bonzi hare." ¹⁸ Aha ka baambira ezi zintu Jesu, haho, shimurao akukezya aku mugunkamena. Akuta ee, "Mwanangu omu kentu nga nafwa ahanu, kono okezye obike eyanja lyako hakwe imi mbwa hare." ¹⁹ Cware Jesu oku zyimana nokumu cilila, ne barutiwa bakwe. ²⁰ Haho bulyo, kwakezya omukentu ozyo karwara mweya ke zilimo zekumi netobire, oku kezya kumashara a Jesu mi akukwata mungundo we mukanjo wakwe, ²¹ Kakuli nakisumwina ee "Nali ndikwata bulyo zizyabaro zakwe, mbondi hore." ²² Kono Jesu aku zoka nokumubona, nokuta ee, "Mwanangu womu kentu, ogolise. entumero yako yakuhozi." Neye mukentu oku hora haho bulyo. ²³ Aha akezya kukabira munjuo yo shimurao Jesu, oku bona balizi betulimba ne cicaba kaci tenda erata hawa. ²⁴ Akuta ee "Muka zwe, kakuli azya kufwite mukazana arere bulyo". Kono bokumusheka komushauzi. ²⁵ Aha sheca twariwa hanje ecicaba, aku kabira omo karere mukazana nokumu kwata kuyanja, mukazana neye oku buka. ²⁶ Eñusa lyenkezaharo yi lyoku hasana mucikiliti conshe. ²⁷ Aha akezya kuhita Jesu kukazwa ko, bakwame bezibofu bobire kaba mucilile. Kabakwesi bahuwa nebata ee "Tufwire nshe, mwana wa Davida!". ²⁸ Aha shakabilite munjuo Jesu, bakwame bezibofu boku kezya kwakwe. Jesu okuta kwabo, "Kana muzumina ee ndiwora kucitenda eci?" boku mutaba ee, "Eni, Nfumu." ²⁹ Cware Jesu aku bakwata kumensho abo nokuta ee "Kutendahare kwenu kuya ke ntumero yenu." ³⁰ Cware oku aruka mensho abo. Jesu akuba raera hawa nokuta ee, "Mumamere ee kwazya zyo shaka azizyibe zinu." ³¹ Kono abo bakwame bobire boku yendaka neba hasanya embuzi zateni mucikiliti conshe. ³² Aha bazwaho abo bakwame bobire, nikwaretwa kwa Jesu omukwame wecipurupuru ozyo kakwezi edimona. ³³ Aha litandiwa edimona, omukwame wecipurupuru akuamba. Amacaba neba komoka nokuta ee, "Zishini kubonahara ezi mwa Isilaele". ³⁴ Kono ama Falisi bokuta ee "Asebelisa omuyendesi we madimona, kuku tanda madimona." ³⁵ Jesu oku yenda mwi ntoropo zonshe neminzi yonshe. Aku zwerapili oku ruta muma sinagoge abo, na kutaza evangeli yo mubuso. Nahoza amatuku onshe nobuyanga bonshe. ³⁶ Aha abona cicaba, akuba fwira enshe, kakuli kaba katazehete noku zwafa. Kabafwana mbwe emberere zaazya omulisani. ³⁷ Akuta ku barutiwa bakwe, "Enkuturo njingi, kono babereki bacenya. ³⁸ Cware murapere wangu kwa Nfumu we nkuturo, kuta ee atumine ababereki mwi nkuturo yakwe."