Njamwiimbi mupati; yakabambilwa kuliSyosyanimu. Intembawuzyo yaDevidi. ¹ Ndifutule, Leza; nkaambo maanzi abika buumi bwangu muntenda. ² Ndilanjila mumatope aabila, aatakwe musena bwakwiimikila; ndasika kumaanzi malamfu, ooko mazambangulwe nkwaayenda aajulu lyangu. ³ Ndakatala akulila kwangu; gulyukumena lyangu lyayuma; menso angu akatala aawo nelinda Leza wangu. ⁴ Aabo bandisula kakutakwe kaambo mbiingi kwiinda masusu aali aamutwe wangu; aabo bakonzya kundigonka, kabalio basinkondoma munzila iitali njiyo, mbaasinguzu; nzindakatabba pe, ndeelede kuzibweedezya. ⁵ Leza, ulizi bufubafuba bwangu, alimwi zibi zyangu tazisisidwe pe kuzwa kulinduwe. ⁶ Ikaka aabo basyoma mulinduwe batakafwisigwi nsoni akaambo kangu, Mwami Jehova wamakamu; ikaka aabo bakuyanduula batakawubulwi akaambo kangu, Leza waIzilayeli. ⁷ Akaambo kako ndabweza kusampawulwa; bweeme bwavumba chinso changu. ⁸ Ndaba mutuba kubakwesu bangu, mweenzu muzwakule kubana babaama. ⁹ Nkaambo chiyandisyo cheng'anda yako chandilya, ansampawulo zyabaabo bakusampawula zyawida aalindime. ¹⁰ Aawo nindakalila akutalya, bakanditukila. ¹¹ Aawo nindakazwaata saka, ndakaba chintu chakasimpi kulimbabo. ¹² Aabo bakkala kumulyango wamuunzi baambuula aatala andime; ndili lwiimbo lwabakolwi. ¹³ Pesi kulindime, nkombyo yangu iza kulinduwe, Jehova, kuchiindi nchotakatambule; kandisandule mubusyomesi bwalufutuko lwako. ¹⁴ Kwandigwisye mumatope, alimwi utakandilekeli kuti nkanjile; ikaka kandigwisye kulibaabo bandisula akundigwisya kuzwa mumaanzi malamfu. ¹⁵ Utaleki zambangulwe lyamaanzi kti linditole, nikuba dambwa kuti lindimene. Utalekeli dindi kuti lindijalile mukati. ¹⁶ Ndisandule, Jehova, nkaambo busyomesi bwachikonke chako mbubotu; nkaambo luse lwako kulindime ndwiingi, kondichebuka. ¹⁷ Utasisi busyu bwako kumulanda wako, ndilimukukataazikana; ndisandule chakufwambana. ¹⁸ Sika kulindime undivune. Akaambo kabasinkondoma, ndisanzye. ¹⁹ Ulizi lusampawulo lwangu, bweeme bwangu, alkufwiinsigwa kwangu; basinkondoma ban gu boonse bali kunembo lyako. ²⁰ Lusampawulo lwatyola moyo wangu; ndizwide kulemenwa; ndakalanguula umwi kuti andifwide nsoni, pesi takwe wakaliwo pe; ndakalanguula basikunduumbulizya, pesi takwe ngundakajana pe. ²¹ Bakandipa musamu uujaya kuti ndilye; mukufwa nyota, bakandipa viniga kuti ndinywe. ²² Tafula lili aanembo lyabo libe kakkole; aawo nibayeeya aanga balikwabililidwe, ngakakabe kakkole. ²³ Menso aabo ngaakasiizigwe kuchitila kuti batakaboni; akuchita zikungu zyabo kuti zitekete. ²⁴ Tila bukali bwako aalimbabo, alimwi bukali bwalunyemo lwako bubaselukile akubazunda. ²⁵ Busena bwabo bube tongo; kutakabi muntu uukkala mumatenta aabo. ²⁶ Nkaambo bakasyonsya ooyo nguwakuumina aansi. Bakiindulula machise aabaabo mbuwakachisa. ²⁷ Kabape mulandu wakuchita chibi musule lyachibi; utakabalekeli kuti bakasike kuluzundo lwako lusalala. ²⁸ Ngabakazimwe kuzwa muBbuku lyaBuumi akutalembwa antoomwe abasalali. ²⁹ Pesi ndilmuchete wuuside; ikaka lufutuko lwako, Leza, ngalukandibike aajulu. ³⁰ Ndiyoolumbayizya zina lyaLeza alwiimbo alimwi ndiyoomunyampula akupa kulumba. ³¹ Eezyo ziyoobotezya Jehova kwiinda musune na mupule uli aameja ansumba. ³² Babombe bakachibona alimwi balabotelwa; nywebo nimuyanduula Leza, myoyo yenu kayipona. ³³ Nkaambo Jehova ulamvwa babula alimwi tafwisyi nsoni baange bakwe. ³⁴ Julu anyika ngazikamutembawule, lwizi azyoonse zyeenda mukati kalo. ³⁵ Nkaambo Leza uyoovuna Ziyoni akuyakulula myuunzi yaJuda; bantu bayoopona mumo akuyoovuba. ³⁶ Lunyungu lwabalanda bakwe luyooyikona akwiivuba; abaabo bayanda zina lyakwe bayookkala nkukooko.